24
-19-
1 Apālan mo sabaw marahet a tawo,
kan chakalam mwabaw machisīt dyira,
2 ta iyaw aktokto da, magpangta so kinaranggas,
kan no bibi da, ki mapahtot so riribok.
-20-
3 Do kinasīrib, ki maparin iyaw bahay,
kan maynamot do kapakaāwat, ki mapatnek.
4 Do kapakatoneng, mapno saw kwarto na
so mapapateg kan makaay-āyo a kinabaknang.
-21-
5 No masīrib a tawo, ki mabilbīleg kan panakabalin,
as no myan so kapakatoneng, masissisīta kan kayit,
6 ta do kapachigobat, machitaw nainsirīban a kapangidaōlo,
kan do kāro no mamagbaga, ki myan ballīgi.
-22-
7 Iyaw kinasīrib, matodah aba no abos arang.
Do rowangan no syodad a pangokoman, abaw maibahey na.
-23-
8 Iyaw magplāno so marahet,
mapangaranan anchi so mangipangta.
9 Siraw pangta no abos arang, ki gatos,
as ipsopsok dan tawo iyaw mangoy-oyaw.
-24-
10 An mapleng ka do chimpo no riribok,
ayket, sinsinan kayit mo!
-25-
11 Isalākan mo saw maiyangayaw do kadiman da,
kan pagpeten mo saw madodogaw a komwan do pagpartyan.
12 An batahen mo a, “Ki chinapatak namen abayaw nya,”
maimangmang abawri no mangtimtimbangaw so pōso?
Chapatak abawri no magbanbantayaw so byay mo?
Mamahes abawri do tawo sigon do pinarin na?
-26-
13 Anak ko, koman kas tagapolot no yokan, ta maganay.
As iyaw maytetedtedaw a yapo do bahay naw, ki matami so taham.
14 Komwan iyaw kinasīrib a matami do byay mo.
An machichwasan mo, maganay namnamāen mo do masakbayan.
-27-
15 Magdāan kaba akmas marahetaw a manakaw do bahay no malinteg.
Magranggas kaba do pagyanan na,
16 ta aran maypapito a malbaw malinteg, makapaybangon panchi,
ki siraw marahet, albahen sanchi no kalamidad.
-28-
17 Magragsak kaba an masday kabōsor mo,
kan an madodog, chasoyot mwaba,
18 ta an maboya ni ĀPO, ki mahwahok aba dyimo,
kan āngwan ibabāwi naw kasoli na dya.
-29-
19 Mariribokan kaba do marahet saya tawo,
mana apālan mo sabaw marahet a tawo,
20 ta iyaw marahet, abaw masakbayan na.
Iyanchiw soho dan marahet, mawsepan.*24:20 Prob. 13:9
-30-
21 Anak ko, mamo ka di ĀPO kan do āri,
kan machirāman kaba dyirad magsōkir,
22 ta sira dadwa, manoboy sanchis maychehat a didigra,
kan sino makapatak so pakarārayawanaw a yapo dyira?
Siraw Kadwan Pa a Nainsīriban a Panyinyirin
23 Siraw nyaya panyinyirin, ki yapo pa dyirad mamasīrib saw:
Iyaw kapangitatārek do kapangokom, ki maganay aba.
24 Iyaw makabataw sya do marahetaw a, “Malinteg ka,”
abayen danchin tawotawo kan ipsok danchin nasnasyon,
25 ki siraw okom a mangdōsa so nakagatos, ki myan kasoyot da,
kan mangay anchiw maganay a bindisyon dyira.
26 Iyaw mapodno a atbay,
ki ipaboya naw oyod a kapaysīt.†24:26 Do Hebreo a chirin, ki “akmay kapachidādek do bibi”.
27 Mangisagāna ka so tarabāko mo do gagan.
Isagāna mo saw hakawan mo,
Katayoka nawri, patneken mo bahay mo.
28 Mangpaneknek kaba so kontra do karoba mo a abos paynamotan,
kan osaren mwabaw bibi mo a pangallīlaw.
29 Batahen mwaba a, “Parinen ko dyaw akmas pinarin naw dyaken.
Pabidyen ko dya sigon do pinarin naw.”
30 Homnabas ako do bengkagaw no masadot,
do kaobāsanaw no tawo a kōrang so sīrib.
31 Naboya kwaw a kinalomotan danan manōlok a tamek.
Naspetan dana no tametamek,
as kan naloyo danaw ahad naw a bato.
32 Do nakaboya kwaw so nyaya, nangtokto ako,
as iyaw nyayaw nananawo ko:
33 Dēkey a kapakaycheh, dēkey a kadoho,
dēkey a kapagsadalikepkep,
34 ki mawara anchiw kapobri a akmay manakanakaw,
kan iyaw kachita a akmay nakaarmas a tolisan.