25
No Kadwan a Proberbyo ni Solomon
1 Sira paw nyaw proberbyo ni Solomon a kinopya dan tawo saw*25:1 Chapatak taba an sino saw nya mamagbaga mana opisyalis. Ki do 2 Ar-āri 18:18, naibahey a sa Eliakim, Sebna, kan Joda. ni Āri Hesekyas do Joda.
2 Pakaidayāwan no Dyos maytayotayo so bānag saya,
ki dāyaw dan āriw, omdoktal sira.
3 'Mas katohos no kahanyihanyitan mana 'mas karahem no tāw,
komwan kapangtokto dan āri a dya matokod.
4 Pakarohen mo lapos no pirak,
as kan myan chīpohen no manyīpo.
5 Pakarohen mo marahet a tawo do salapen no āri,
kan iyanchiw pagtorayan na, ki maypayit do kinalinteg.
6 Dayāwen mwabaw inawan mo do salapen no āri,
kan maytēnek kaba do yanan dan mabibīleg saw a tawo,
7 ta maganaganay a maibahey dyimo a “Maypatohos ka dya,”
kan mapabodis ka do salapen matohos a tawo.
Iyaw chichiban mata mo,
8 taykalo kaba mangidarom do pangokoman,
ta āngonchiw parinen mo do panawdyan
an iyaw karoba mo asnesnekan naymo?
9 An myan kapagsopyat nyo kan karoba mo, pagsaritāan nyo.
Katayoka nya, pahtoten mo paba do kadwan,
10 ta āngwan iyaw makadngey, ki asnesnekan nanchimo,
kan nāw na pakasnesnekan mo a abos pandan.
11 Iyaw maitotop a chirin a naibahey,
ki akma saw napōtar a balitok a sinan mansanas a napasdot do pirak.
12 Akmas balitokaw a arītos mana balitok a alāhas,
komwan kapaydabdab no masīrib do makey a mangadngey.
13 Akmas mahanebnebaw a ranom do chimpon kapagāpit,
komwan mapagtalkan a tobotoboyen dyirad manoboyaw sya.
Makapasalidyaga do pōso dan āmo na.
14 Akmay konem kan salawsaw a abos chimoy,
komwan tawo a mangipangas so rigālo na a dyi na itoroh.
15 Iyaw kaānos, makapagbāliw so kapangtokto no magtoray,
as no kalamōyot no chirin, pahmahen naw matwa a pōso.†25:15 Do Hebreo a chirin, ki “iyaw mahma a rida, ki makapotot so tohang”.
16 An madongso mo tagapolot no yokan, koman ka lang so manawob,
ta an mataywaran mo, iyota monchi.
17 Masanyib kaba mangay do bahay no karoba mo,
ta āngonchan chaoma naymo, as ipsok naymo.
18 Akmay mamālo mana ispāda mana matarem a pana,
komwan tawo a mangsistīgo so bayataw do karoba na.
19 Akmay binokbok a nyepen mana logpi a kokod,
komwan kapagtalek do dya mapodno a tawo do chimpo no riribok.
20 No mangikanta siras kankanta do maliday,
ki akmas maybahabahasaw do araw no kahanebneb,
kan akmay soka a pinado do bigar.
21 An mapteng kabōsor mo, ki pakanen mo.
An mawaw, ki paynomen mo so ranom.
22 An komwan, mangyangay ka so oltimo a kasnek do kapaybiybinākel na,‡25:22 Do Hebreo a chirin, ki “payen mo inmaya do oho na”.
kan do dāwri, gon-gonaan nanchi imo ni ĀPO.
23 Akmas ayokayamaw a mangyangay so chimoy,
komwan maparaherahet a rida a mapaklaklal so kasoli.
24 Maganaganay a omyan do aroywan atep no bahay
kan machiwpok do baket a maganay a machidiman.§25:24 Prob. 19:13; 21:9
25 Akmay mahanebneb a ranom do tawo a mawaw,
komwan maganay a dāmag a yapo do mateng a logar.
26 Akmay maparek a akbod mana malapos a bobon,
komwan malinteg a tawo a ipalōbos naw marahet a mangābak.
27 Maganay abaw sobra koman so tagapolot no yokan,
mana maganay abaw maychadi so bōkod na dāyaw.
28 Akmay syodad a narārayaw so ahad a masonong a asdepen,
komwan tawo a chapatak naba a igpet inawan na.
*25:1 25:1 Chapatak taba an sino saw nya mamagbaga mana opisyalis. Ki do 2 Ar-āri 18:18, naibahey a sa Eliakim, Sebna, kan Joda.
†25:15 25:15 Do Hebreo a chirin, ki “iyaw mahma a rida, ki makapotot so tohang”.
‡25:22 25:22 Do Hebreo a chirin, ki “payen mo inmaya do oho na”.
§25:24 25:24 Prob. 19:13; 21:9