26
1 Akmay chimoy a yilo an rayon mana chimoy do chimpon kapagāpit,
komwan pammadāyaw a dya kombini do abos arang.
2 Akmay billit toleng a mayadiyadis mana haphapnyit a nāw na somayasayap,
komwan abay a abos paynamotan, domna aba do tawo a abos gatos.
3 Iyaw saplit, ki para do kabalyo. Iyaw prino, ki para do asno,
kan iyaw babāot, ki para do bokot no abos arang a tawo.*26:3 Prob. 10:13
4 Atbayen mwabaw abos arang akmas kabon sīrib na,
ta tod ka mayparin a akma dya.
5 Atbayen mo abos arang so nainsirīban do kabon sīrib na,
tan dyi na iktoko a masīrib do mismo na kapakaboya.
6 Akmay mangpokol so kokod na mana minom so binīno,†26:6 Do Hebreo a chirin, ki “minom so ranggas”.
komwan iyaw mangitoboy so minsāhi do abos arang.
7 Akmas kokod saw a logpi a maylōdyit a abos sīrbi,
komwan panyinyirin do dangoy no abos arang.
8 Akmay mapabedbed so bato do palsiit,
komwan pammadāyaw do abos arang.
9 Akmay chīnay do tanoro no nabok,
komwan panyinyirin do dangoy no abos arang.
10 No manghornal so abos arang mana aran sino a homabas,
akmay maypapana a manglahelaheb.
11 Akmay chito a maybidi a koman so ota na,
komwan abos arang a pirwahen naw kabon sīrib na.
12 Maboya moriw no mangtokto a masīrib do mismo na kapakaboya?
Arwaro paw manamnāma do abos arang a tawo kan iya.
13 No masadot, batahen na, “Aryaw lion do rarahan!
Aryaw lion do kalkalsāda!”
14 Akmay aneb a mapinyapinyay do misagra na,
komwan iyaw masadot a maybadibadyichid do katri na.
15 No masadot, ilomlom naw kakamay na do labay na,
ki chasadot na pasobohen do dangoy na.‡26:15 Prob. 19:24
16 No masadot, iktokto na masirsīrib do mismo na kapakaboya
kan papito saw a tombay a makaikeddeng.
17 Akmay magtiliw so chito a nawriw gamatan na saw tadyinya na,
komwan homabasaw a machibibyang do kapagsosopyat no kadwan.
18 Akmay magatit a mapagsid siras ahoten
mana makadiman saw a pana,
19 komwan tawo a mangallīlaw so karoba na,
kan batahen na a, “Sisyabak ko lang!”
20 An abo danas songrod, mawsep apoy,
as an abo kaparaherahet, magsardeng kapagsosopyat.
21 Akmay orin do inmaya, kan irotong do apoy,
komwan magsosopyat a tawo a mangrobrob so kapaydidiman.
22 Siraw chirin kaparaherahet, akma say taydedekey a maīmas
a romapit do makatayrahem a katatawo.§26:22 Prob. 18:8
23 Akmay kalopkop a mapasileng so banga,
komwan malamōyot a chirin a itayo naw karahet no tawo.
24 No mangipsok so kadwan, magpamarang do kapaychirin na,
ki no kaoyodan na, im-imten naw kapangallīlaw na.
25 Aran maīmas kapaychirin na, anohdan mwaba,
ta iyaw irahem naw, napnos papito a makabābaba.*26:25Prob 6:16
26 Maparin na a itayo kasoli na do kapangallīlaw na,
ki alit na, magparang anchiw karahet naw do kakpekpehan.
27 Aran sino a maychadi so aridos, iyanchiw maridos,
as iyaw mamadede so bato, iyanchiw agpidan na.
28 Iyaw bayataw a rida, ipsok na saw napaynyinan na,
as iyaw malamōyot a chirin do dangoy, ki makarārayaw.