2
Jesuzi ŋic ʒeke puriŋ moc bâpiaŋkewec
(Mat 9:1–8; Luk 5:17–26)
1 Jesu e juku mocwâc Kafanaum haeo rarâ fic mocko feme hae rune jaŋe biac manarâ 2 bocjahazi ere hae ʒoŋao tumaŋnerâ fusucmarâ ficmotâc mâmâc ŋebâzickehapie miti jazawec. 3 Ehame ŋic 4‐zi ʒeke puriŋ moc erao reŋke fisimbiŋ. 4 Ehuc maŋfuŋnao râeniŋte ŋicguruo hetakirerâ ficbupuo ferâ Jesure qizec botâŋko bupu bâropiepie hawecne fuame ira ŋic ʒeke puriŋ kanʒehec râepie wahawec. 5 Iŋuc epie Jesuzi mamanasiŋ‐jeŋicte fuŋne hone manac erâ ŋic ʒeke puriŋ ʒiŋuc âzâcnewec: “Motec‐mae, sâqocnege bâtâmire‐garekicne.” 6 Eme miti qaqazu tucne ira ŋembiŋ jaŋe maŋjeŋiczi ʒiŋuc manasumbiŋ: 7 “Hâc, ŋic keci e wemo dâŋ mukac? E Anutu âkehockekac i! Mo ŋiczi sâqocne mutâmireekac, i Anutuzi buc eekac i!” Jes 43:25 8 Iŋuc manasupie Jesu e maŋticnezi mana tara‐jarerâ jazawec, “Maŋŋeŋiczi wemocte dâŋ iŋucne manasuŋgopieŋ? 9 Wenimoizi afecne, ŋic ʒeke puriŋ ʒiŋuc âzâcnezo: ‘Sâqocnege bâtâmire‐garekicne’ me ʒiŋuc âzâcnezo: ‘Fahare fofoge hâporâ rac’? 10 Ŋic Fâri Wâtuŋne e mâreŋko sâqocne bâtâmireocte tâpiri focnekac irec fuŋne hone taraniŋ!” Iŋuc murâ ŋic ʒeke puriŋ ʒiŋuc âzâcnewec: 11 “No gazakopac, fahare fofoge ameckerâ ficgao rac.” 12 Mume izia ʒâŋe mai‐jeŋicko fofo‐ticne ameckerâ rawec. Eme ŋic jaŋe hone warec erâ Anutu mucne bacnehuc mumbiŋ, “Wiac ʒâŋe furu jâmbâŋ‐nâŋec fuame honeŋgopeneŋ.”
Jesu e sâqocne bapa iqic‐jopawec
(Mat 9:9–13; Luk 5:27–32)
13 Jesu e iŋuc erâ mocwâc riqic moŋgeŋko huwec. Hume ŋic mâmâc sasawa bâjâpepie miti jazawec. 14 Eme irecnec raku Lewi Alifaiore ŋokâ moneŋfic‐ticnao ŋehame âzâcnerâ muwec, “Ware bâjâpecnuc.” Mume faharerâ bâjâpewec. Joh 1:43 15 Erâ Jesu hefâreme ficticnao ferâ ŋehame takesi roro â sâqocne bapa bocjaha fisirâ Jesu â motecfâcne jaŋehec nânâ mâmâc nâmbiŋ. Ŋic iŋucne bocjahazi Jesu bâjâpembiŋ irec. 16 Eme farisaio jaŋere guruonec miti qaqazu tucne jaŋe Jesu e takesi roro â sâqocne bapa jaŋehec ŋehuc nânâ nâme honerâ motecfâcne ʒiŋuc jazambiŋ: “Hâc, e wemocte takesi roro â sâqocne bapa jaŋehec ŋehuc nânâ nakac?” 17 Mupie Jesuzi manarâ jazawec, “Ɋiɋicne jaŋe doktare mi mueŋgopieŋ, huchec jaŋe ine mueŋgopieŋ. No ŋic tiŋne hefârec‐jopazore mâcne, sâqocne bapa hefârec‐jopazore wahapo.”
Jesu sowa jujure wiocnembiŋ
(Mat 9:14–17; Luk 5:33–38)
18 Johanere motecfâc â farisaio jaŋe dameŋ ira nânâ sowa jumbiŋ. Eme ŋic tucne jaŋe Jesurao rarâ ʒiŋuc muhuc wiocnembiŋ: “Johanere motecfâc â farisaio jaŋere motecfâc jaŋe nânâ sowa juhapie gahacne motecfâc jaŋe wemocte sowa tâmiric jueŋgopieŋ?” 19 Wiocnepie Jesuzi jazawec, “Ŋicwofuŋ e kikefuŋfâc‐ticne jaŋehec juhame busâqoc erâ sowa juniŋmu me? Aricne, ŋicwofuŋ‐jeŋichec juhuc wemocko sowa juniŋmu. 20 Juku ŋicwofuŋ jowac ropie basahuc busâqoc erâ sowa juniŋmu. 21 Nâŋâc ŋaqi raŋɋane suckekicnao qoruc susuc ɋâricne mi râerâ ɋâtâeŋgopeneŋ. Iŋuc epene muzac, ɋâricnezi raŋɋane fâreme tâcneme hawecne kâcɋene sâko fuazac. 22 Erâ wâc waiŋ opâ ɋâricne ʒopo raŋɋanao mi qoŋgiŋkepene huekac. Iŋuc epene muzac, waiŋzi ʒopo âte fâuckeme waiŋ mecne ʒopo mecne mâmâc sipirickezapic. Irec waiŋ ɋâricnezi ʒopo ɋâricnao hume sâckeocmu.”
Sabata hombaŋte dâŋ
(Mat 12:1–8; Luk 6:1–5)
23 Sabata hombaŋ mocko Jesu â motecfâc‐ticne jaŋe padi gie ŋondeŋko rambiŋ. Rahuc motecfâc‐ticne jaŋe fârine moc moc fuŋkerâ mezi bâtâcnembiŋ. 24 Epie farisaio jaŋe Jesu ʒiŋuc âzâcnembiŋ: “Honec, jaŋe sabata hombaŋko wiac mi eene eŋgopieŋ i!” 25 Eme Jesuzi jazawec, “Dawidi â ŋicfâc‐ticne nânâre hâmohuc wiac embiŋ i ŋoŋe wose manac mi eeŋgopieŋ me? 26 E Abiatazi taha bapa sâko juwec dameŋ ira Anuture ufuŋko ferâ poroŋ Anuture biŋe râekicne i rorâ nâhuc ŋicfâcne mâmâc jareme nâmbiŋ. Poroŋ i ŋic omane bâtâc bajarekicne, bâzi ririke micbuc‐jeŋic, eme i sifu nâmbiŋ.” Sam I 21:1–6; Tah 24:9 27 Iŋuc murâ muwec, “Sabata hombaŋ i ŋicte erâ fuawec, ŋiczi sabata hombaŋte erâ mi fuawec. Sâc 5:14 28 Eme Ŋic Fâri Wâtuŋne e hombaŋ irec rune jukac wâc.”