109
[Psalm lal David]
Torkaskas Lun Sie Mwet Su Muta In Ongoiya
1 Nga kaksakin kom, O God; nikmet mutana misla!
2 Mwet koluk ac mwet kikiap elos lainyu.
Elos fahk kas kikiap keik,
3 Ac elos fahk kas koluk keik —
Elos lainyu ke wangin sripa.
4 Nga ne lungse elos ac pre kaclos
A elos nu srungayu na.
5 Elos folokin orekma wo luk ke orekma koluk,
Ac srungayu ke nga lungse elos.
6 Sulela sie mwet nununku sesuwos in nununku mwet lokoalok luk,
Ac lela sie mwet su srungal in tafwel.
7 Lela in nununkeyuk el ac koneyukyak tuh na oasr mwatal.
Lela God Elan akilen lah kas in pre lal uh oana sie ma koluk.
8 Lela tuh in fototo moul lal;
Ac lela siena mwet in eis acn sel!Orek 1:20
9 Lela tuh tulik natul in mukaimtal,
Ac mutan kial in katinmas!
10 Lela tulik natul in mwet takusrkusr ac mwet ngusr;
Lela tuh elos in lillilyak liki mahnum in lohm elos muta loac.
11 Lela tuh mwet el orek soemoul yoro in eisla ma lal nukewa,
Ac lela tuh mwetsac in eis woiyen orekma lal.
12 Lela in wangin mwet sifilpa kulang nu sel
Ac in wangin pac mwet lohang nu sin tulik mukaimtal natul uh.
13 Lela tuh fwil natul nukewa in misa,
Ac in mulkinyukla inel ke fwil se tokol.
14 Lela tuh LEUM GOD Elan esam na ma koluk lun papa tumal
Ac tia nunak munas nu ke ma koluk lun nina kial.
15 Lela tuh LEUM GOD Elan esam ma koluk lalos pacl e nukewa,
A elos sifacna in iyuklana ac tiana sifil esamyuk!
16 Mweyen mwet se ingan el tiana nunkauk elan moul in kulang;
El akkeokye ac uniya mwet sukasrup,
Mwet enenu, ac mwet munas.
17 El lungse selngawi mwet — lela in selngawiyuk el!
El srunga in akinsewowoye mwet — lela in wangin mwet akinsewowoyal!
18 El oru selnga uh fisrasr oana nuknukyang uh;
Lela manol in toki ac arulana sroksroki ke selnga lal,
Ac in tilyang nu in sri kacl oana mwe akmusra.
19 Lela selnga lal uh in nokmulla oana nuknuk
Ac in losilya oana sie mwe lohl.
20 LEUM GOD, kalyei mwet lokoalok luk in lumah ingan —
Elos su fahk kas koluk lainyu.
21 Tusruktu, O LEUM GOD Fulat luk, kasreyu oana ke kom wulela,
Ac moliyula ke wolana lun lungse lom.
22 Tuh nga mwet sukasrup ac enenu;
Mwe keok luk arulana fakisya insiuk,
23 Ac nga apkuran in wanginla, oana lullul in eku —
Ukukla nga, oana sie won srisrik.
24 Intik munasla ke wanginla loalok,
Ac nga sri na kolo.
25 Ke mwet elos liyeyu, elos isrunyu;
Elos niwurwur sik ac usruk sifalos.Mt 27:39; Mk 15:29
26 O LEUM GOD luk, kasreyu;
Moliyula ke lungse pwaye lom.
27 Oru tuh mwet lokoalok luk in etu
Lah kom pa moliyula uh.
28 Sahp elos ac selngawiyu, tusruktu kom fah akinsewowoyeyu.
Lela tuh elos su akkeokyeyu in kutangyukla,
Ac lela tuh nga, su mwet kulansap lom, in engan.
29 Lela mwet lokoalok luk in nukla ke mwekin;
Lela elos in nokomang mwekin lalos oana sie nuknuk.
30 Nga fah sang kulo nu sin LEUM GOD ke pusra lulap;
Nga fah kaksakunul in walil uh,
31 Mweyen El kasru el su sukasrup,
Ac molella liki poun mwet su kena eisalang nu ke misa.