1 Be koai e dugu anga ia gi Dimaadua e benebene,

geia gaa noho i lala nia madamada humalia o Dimaadua Koia e Aamua.

2 Tangada deelaa e mee di helekai gi Mee,

“Goe go dogu Dangada Daa mo dogu Abaaba.

Goe go dogu God, dela e hagadagadagagee ginai au.”

3 Mee ga benebene mai goe gi daha mo nia mee hagalliga huogodoo ala e de gidee,

ge mai gi daha mo nia hagadilinga magi huogodoo ala ga hidi mai iei goe gaa made.

4 Mee gaa gahu goe gi ono bakau, gei Mee ga benebene goe hagahumalia.

Dono manawa dahi ga benebene mo di abaaba goe.

5 Gei goe ga hagalee madagu i nia mee balua i di boo,

be nia heebagi hagalimalima i di aa,

6 be nia hagadilinga magi ala e tale adu hagalimalima i lodo di bouli,

be go nia hagadilinga mee huaidu ala e daaligi dangada gii made

i lodo di maalama o di aa.

7 Dolomaa, nia daangada e mana gaa tinga gi lala i doo baahi guu mmade,

e madangaholu mana dangada guu mmade i doo gili hagatau, gei goe hagalee lauwa.

8 Goe gaa mmada ga gidee nia daangada huaidu ala ma ga hagaduadua.

9 Goe guu hai Dimaadua go doo duuli,

guu hai Dimaadua Aamua Muginua di abaaba ni oou.

10 Deai di haingadaa e tale adu gi di goe ai,

ge deai di hagaduadua e hanimoi gi hoohoo adu gi do guongo ai.

11 God ga dugu adu ana daangada di langi e madamada humalia i di goe,

e abaaba goe i oo ala huogodoo ala e haele iei goe.*Matthew 4.6; Luke 4.10

12 Digaula ga daahi goe gi nua gi nadau lima

gi dee tugi hua oo wae i nia hadugalaa.*Matthew 4.6; Luke 4.11

13 Goe ga dagadagahi nia laion mono gihaa,

nia laion llamu dauwa mono gihaa poisin.*Luke 10.19

14 Dimaadua ga helekai, “Au ga benebene digau ala e aloho i di Au,

ge e abaaba digau ala e iloo ginaadou au bolo au go Yihowah.

15 Digaula ma gaa gahi Au, gei Au gaa hila ang gi digaula.

Digaula ma gaa tale gi di haingadaa, gei Au ga madalia digaula.

Au ga benebene digaula mai gi daha, ga hagalaamua digaula.

16 Au gaa dugu ang gi digaula gi mouli waalooloo. Au ga benebene digaula.”