1  Ap 4:35Una kum bung ra, a niluluk ina taro na ususer i ka toto nanan. Det tagun aru ngas na taro, ara taro Juda ra det wasiso nama wasiso Grik, ma ara taro Juda kai ra det wasiso nama wasiso Ibru. Det ra det wasiso Grik, det ururai un det ra det wasiso Ibru, lena, “Ra mot ser tibo a kum ula nama utna na inangon una kum bung, mot wanan sakit ru i kut a kum ula tagun met.” 2 Ra a noino ma aru aposel det kabo tomo pas a taro na ususer rop, ma det watungi tandet lena, “Ke tokodos sur met in balon mukut una etabor nama utna na inangon, ma ka met in pam a pinapam na warawai nama wasiso anun o God. 3 A kum tistisi met, mot in pilok pas lako wonom mawit na wakak na musano tagun mot, det ra det mananos ma det bukus nama Tokodos na Nion, sur met in pitar tar a pinapam na etabor ri torom det. 4 Ma met, met in balon ut nama niaring ma a pinapam na warawai nama wasiso anun o God.”

5 Det rop det gas una wasiso ri. Ra det pilok pas o Stiwen, a musano ra i bukus nama nurnur ma a Tokodos na Nion. Ra det pilok pasi kai o Pilip, o Prokorus, o Nikano, o Timon, o Pamenas, ma o Nikolas, a musano tagitong o Antiok, ra awu sur a te Juda, ikut i ruk una lotu Juda. 6 Ra det ben pas det torom a kum aposel. Ma det ubek a kum lamandet sapat netes un det, ma det wararing.

7  Ap 2:41; 16:5A wasiso anun o God i wan sarara, ma a niluluk ina taro na ususer sapat o Jerusalem, i labo nanan kai. Ma a susut na tene etabor torom o God kai, det nurnur ma det mur a Wakak na Wasiso.

8 O Stiwen i bukus nama dekdek ma a marmaris anun o God, ra i pam a kum lamlabino utna na ukisin, ma a kum ukinalong utkai umatan a taro. 9 Ikut ara taro Juda det engaras nam o Stiwen. A taro ri tagun a rumu na lotu ra di watungi lena, Anun a Langolango na Taro. Det tagun aru tamon, o Sairini ma o Aleksanderia ma tagitong una ru papor, o Silisia ma o Asia. 10  Lk 21:15Det lagano balubalu tar anun a wasiso, uni a Tokodos na Nion ut i pitar a mananos tano.

11 Ma det ungongos eno pas a ramano kum musano, sur det in watungi lena, “Met longoro tari ut ra i wasiso laulau un o Moses ma un o God kai.” 12 Ra det usungun balan a kum mugumugu, ma a kum tene ususer tagun a Warkurai ma a taro oros kai. Det wan torom o Stiwen, det pam ukai pasi, ma det beni sur in tur sa numugu umatan a taro na kiwung. 13 Ra det ben pas a taro sur det in takuni nama kum torotoro na wasiso, ma det watungi lena, “A musano ri ke mana nama wasiso laulau una nundat a rumu na etabor, a rumu anun o God, ma una Warkurai kai anun o Moses. 14 Met longoro i, ra i watungi lena o Iesu, a te Nasaret, in rege ru a rumu ri, ma in keles ru a kum ngasino ra o Moses i sa ususer tar dat nami.”

15 Det rop ra det kis una kiwung, det tama dekdek o Stiwen, ma det tama i lena, in masarino i elar namin masarin a ensel.