1 I mo ra dat in nan usa numugu sur a kum etowo bulung ra in sot sur a taro ra det sa labo una nurnur. Gong dat ususer melet una kum mugano etowo un o Karisito ra dat sa ususer pas uni. A kum etowo lenri: a nukpukus gusun a kum petutna ra in ben dat sur a minat, a nurnur un o God, 2 a etowo una wur ngas na kisapi tagun a baptais, a etowo una ubek lamandi netes una taro, a katkatutur melet gusun a minat ma a warkurai na minabalu tukum. 3 Ra o God in mulaot, dat in nan usa numugu.

4 Katutaio in ben pukus lar pas a taro sur det in nukpukus torom o God ra det sa wan gisen gusuni. Det sa tasman tar a talapor anun o God, det sa wan tama tar a etabor tagisapat una langit, det sa los pas a Tokodos na Nion, 5 det sa tasman tar a wakakino tagun a wasiso anun o God ma det sa taramo tar a dekdekin o God ra numur in nanpat puaso. 6  Mt 12:31; Ibr 10:26-27; 1 Jon 5:16Ra det in rosumur gusun o God, katutaio in ben pukus lar pas det, sur det in nukpukus. Uni i elar nami ra det sak wat melet a Nutun o God unin nanai kutus, ma det ban umaimai i umatan a taro.

7 A piso ra i inum pas a polono bato ra i ser puku, ma i pitar a utna na inangon ra i warut det ra det marut tari, a piso ra o God i udani. 8  Stat 3:17-18Ikut a piso ra i pitari kut a kum laulau na wuliso ma a kum suksuk, katu utna i gas uni. Ken suano i kut, ra o God in pitar a warkurai na minabalu toromi, ma numur in tun ru i una sungun.

9 A kum wakak na paspasa met, met sa watung tar a kum dekdek na wasiso ri torom mot. Ikut met nurnur lena, mot mur a wakak na petutna ra i sot una taro ra o God i sa ulaun pas det. 10  Ibr 10:32-34O God ke ser pam tu utna ra ke tokodos. Ken dumano anumot a pinapam ma anumot a marmaris ra mot ese i toromi una numot a warut torom anun a taro ra mot sa pam tari ma mot pami utmakai. 11 Anumet a labino nemnem sur mot rop taktakai mot in dekdek una marmaris lenutra mot ser pami, tuk una ururopino. Mot in pami lenra, sur a kum utna ra mot kis langlang nama nurnur suri, in nanpat mulus ut torom mot. 12 Ka met nemi sur mot in tabalamat, awu. Met nemi sur mot in mur a magirandet ra det nurnur ma det kis langlang ma pinindet ke ngoro, ra det in utur ukai asau ra o God i sa uliliman taru nami.

13 Ra o God i uliliman tar o Abaram, i udekdek anun a liliman nama risano ut, uni katu risan taio melet i labo tauni. 14  Stat 22:16-17I uliliman tari lena, “A lingmulus an udan ui, ma an pitar tar lako susut na nutnutum.” Stat 22:17

16 Ra a taro det liliman, det udekdek anundet a liliman nama risan taio ra i labo taun det. Ra det pami lenra, a liliman ra, in tur dekdek, ma katutaio in engaras melet mo uni. 17 Ma o God kai, i udekdek anun a liliman nama risano ut, sur in upuaso i torom anun a taro, det ra i uliliman tar det, lena ken pukusi melet a nuknukino. 18  Nam 23:19Aru utna ri, a liliman, ma a risano ra i udekdek anun a liliman nami, ka din keles lar pasi, ma o God ken toro lar pas nami. O God i pami lenra sur in uragot dat, ra dat sa kalabor bakit taru uni, sur dat in tur dekdek una nundat a kinkinis langlang nama nurnur sur a liliman anun o God, ra kura numur in nanpat. 19  Wkp 16:2-3Anundat a nurnur ra dat kis langlang nami sur a liliman anun o God, i elar nama ega ra i pam ukai a niondat, ra ken karai. I ruk una rumu na etabor una nubual ra i Tabu Sakit numur tan in namalu na minabat kutus sapat una langit. 20 O Iesu i sa ruk mugu taru una nubual ra, sur in warut dat. I anundat a mugumugu na tene etabor torom o God, elar nam o Melkisedek, ma anun a pinapam ra in tur tukum.