4
O Abaram i nurnur un o God
1 Asau ra dat in watungi un o Abaram, a tamamet a taro Juda? Asau ra i ususer pas uni una kisapi ra taio in tokodos umatan o God? 2 Gunuk ra o God i watung o Abaram lena i tokodos, kibino una kum wakak na pinapam ra i pami, i topasi ra o Abaram in ulabo pasi ut uni. Ikut awu, ken ulabo lar pasi umatan o God. 3 Gal 3:6A Buk Tabu i watungi lena, “O Abaram i nurnur un o God. I mo ra o God i watungi a tene tokodos.” Stat 15:6
4 Ra taio i papam, anun a ikul, awu sur a etabor, awu. Anun a ikul tagun a pinapam ut anunu ra i pami. 5 Ikut o God ken watung taio lena i tokodos uni i pam tar a pinapam. In watungi lena, i tokodos uni i nurnur. Uni i nurnur un o God ra i ser watung a kum tene sakino lena det tokodos. 6 O Dewid kai i watungi lenri. I watungi lena, a musano i dan ra o God i watungi lena i tokodos, awu sur i kibino una kum pinapam a musano ra i pami, awu. I watungi lena,
7 “Det ra o God i sa unus ru anundet a kum petutna na lakai warkurai, det dan,
ma det ra o God i sa nuk dumano ru anundet a kum sakino petutna, det dan.
8 A musano i dan ra a Labino ke nuk pas anun a kum sakino petutna,
ma ken warkurai meleti mo.” Sng 32:1-2
9 Pepetlai, a taro kut ra di tok talilis det, det dan? Awu. A taro utkai ra ka di tok talilis det. Uni dat tasmani lena, o Abaram i nurnur, i mo ra o God i watungi a tene tokodos. 10 Nangisin ra o God i watung o Abaram lena i tokodos? Numugu tan a bung ra di tok talilis a pinino, o numur? Numugu, awu sur numur. 11 Stat 17:10-11Ra kabaut di tok talilis o Abaram, o God i watungi lena i tokodos umatano, kibino una nun a nurnur ut. Ra o Abaram i los pas a ukinalong na tinotok talilis, i ese i lena i tokodos umatan o God. I mo ra o Abaram a taman a taro ra ka di tok talilis det. Det nurnur, ra o God i watung det, det tokodos umatano. 12 Ma i a tamandet kai ra di tok talilis det. Awu sur kibino ra di tok talilis det, ikut uni det mur a kisapi na nurnur ra tamandat o Abaram i muri, ra kabaut di tok talilis a pinino.
13 Stat 17:4-6; 22:17-18; Gal 3:29O God i uliliman tar o Abaram sur in pitar tar a rakrakon bual tano ma torom a kum tumtubunu kai. A liliman ri, o God i pam tari torom o Abaram awu sur i kibino ra i mur a kum Warkurai, awu. I kibino uni i nurnur, ra o God i watungi lena i tokodos umatano. 14 Gal 3:18Gunuk ra o God in pitar a rakrakon bual tan a taro uni det mur Warkurai, a nurnur ke gas un tu utna, ma a liliman anun o God a utna oros kut. 15 Rom 3:20; 5:13Uni a kankan anun o God i kis un det ra det nem na mur a kum Warkurai, ikut ka det mur sot pasi. Ra kalako kum Warkurai, ka din takun taio lena i lakai warkurai.
16 Gal 3:7I mo ra a utna ra o God i uliliman tari, in pitari torom det ra det nurnur. O God i pami lenra, sur in elar nama etabor na marmaris, ma in nan ut torom a kabotaro rop anun o Abaram. Awu sur torom a taro Juda kut ra di pitar tar a kum Warkurai tandet. Awu! Torom det utkai ra det nurnur elar nam o Abaram, i ra a tamandat rop. 17 Elar nami ra di sa tumus tari una Buk Tabu:
“A ukis tar ui sur ui a taman a taro tagun a susut na gapman.” Stat 17:5
Umatan o God, o Abaram a tamandat, uni i nurnur un o God, i ra i ser ukatutur a taro melet gusun a minat, ma i ser wasiso kut, ra a kum utna ra kabaut i wanpat, i wanpat kut.
18 Stat 15:5O God i uliliman tar o Abaram sur in ulabo pas tu nutunu. Una tamtama anun o Abaram, ke sot sur din pam sot pas a liliman ra. Ikut, i nurnur, ra i wanpat a taman a taro tagun a susut na gapman. Elar nama liliman anun o God toromi lena, “A kum tumtubum det in susut.” 19 Stat 17:17Ma anun a nurnur ke puku ra i tama i lena, anun a kilalo i sa elar nam ara mar, ma ke elar melet mo sur in ululabo. Ma o Sara kai i sa takano ra ke elar mo sur in usus. 20 Ikut o Abaram ke wur nuknuk una liliman anun o God. I tur dekdek una nun a nurnur ma o God i udekdek anun a nurnur, ra o Abaram i watung ulabo pas o God. 21 Ma una nun a nurnur i tasmani ut lena, o God i pet lari sur in pam sot pasi ut anun a liliman. 22 Stat 15:6I mo ra “O God i watungi a tene tokodos.” 23 Ra a Buk Tabu i watungi lena, “O God i watungi a tene tokodos,” awu sur i watungi kut un o Abaram, awu. 24 I watungi utkai un dat. Ra dat nurnur un o God, ra i ukatutur melet pas o Iesu anundat a Labino gusun a minat, in watung dat kai a kum tene tokodos. 25 Ais 53:4-5O God i pitar ru o Iesu, sur in mat una nundat a kum sakino petutna, ma i ukatutur melet pasi gusun a minat, sur dat in tokodos umatan o God.