1 Una nundat a nurnur ut, o God i watung dat lena dat tokodos umatano. I mo ra dat kis na malmal tomo nam o God, kibino una nundat a Labino o Iesu Karisito. 2 Ra dat nurnur un o Karisito, i mugu dat ma i uruk dat una marmaris anun o God. Ra uniri, dat sa laun uni. Ma dat gas, ra dat kis langlang nama nurnur sur a minamar anun o God, ra kura numur dat in kis uni.

3  Jem 1:2-3; 1 Pit 1:5-7Ma awu sur i kut ra dat gas suri, dat gas utkai una kum mamaut ra dat taramo i, uni dat tasmani lena a kum mamaut i pam pat anundat a tuntunur dekdek. 4 Ma anundat a tuntunur dekdek i pam pat a ngas na nilaun ra a kum larlar ka det in upuku pas dat. Ma a ngas na nilaun ri, i pam pat anundat a kinkinis langlang nama nurnur. 5 Ra dat kis langlang nama nurnur, dat tasmani lena a utna ra o God i sa uliliman taru uni in nanpat ut. Uni o God i sa pitar tar a Tokodos na Nion tandat. Ra a Tokodos na Nion i sa lingis tar a marmaris anun o God unin balandat.

6 Numugu ka dat mur a petutna ra i wakak umatan o God, ra ka dat pet sot pas tu utna. Ikut ra a du bung i sot, o Karisito i mat sur dat. 7 I ngangitin doko ra taio in mat sur tu tokodos na musano. Kutiro taio in pet lar pasi sur in mat sur tu wakak na musano. 8  Jn 3:16; 1 Jon 4:10Ikut o God i ese anun a marmaris torom dat una kisapi lenri: Ra dat laun utmakai una sakino petutna, o Karisito i mat sur dat. 9  Rom 1:18; 2:5Ma una gapin o Iesu, o God i watung dat lena dat tokodos umatano. I mo ra i lingmulus sakit lena, o Iesu in ulaun pas dat gusun a kankan anun o God, una bung na warkurai. 10 Ra dat kis na ebar utmakai nam o God, i tulu ru o Nutunu sur in mat sur dat, sur dat in emarom melet nam o God. Ra dat kis na emarom nam o God, i lingmulus sakit, in ulaun pas dat, kibino una nilaun anun o Nutunu.

11 Awu sur i kut ra. Uniri dat gas utkai tomo nam o God, kibino ut una nundat a Labino o Iesu Karisito, ra i umarom tomo tar dat nam o God.

12  Stat 3:6; Rom 6:23Ara musano kut i pam a sakino petutna, ma una petutna ra, a sakino petutna i wanpat una rakrakon bual. A sakino petutna i pam pat a minat. Ma una kisapi ra, a minat i wan sur a taro rop, uni det rop det pam a sakino petutna. 13  Rom 4:15Uni numugu, ra kabaut o God i pitar a kum Warkurai, a sakino petutna i sa kis una rakrakon bual. Ra kalako Warkurai, o God ken takun taio lena i pam a sakino petutna. 14 Ikut, tagun a kum kilalo anun o Adam tuk una kum kilalo anun o Moses, a taro rop det kis utuntudu ina dekdekin a minat. Ara taro ka det pam a ngas na sakino elar nam o Adam, ra i lakai a warkurai. Ikut, det utkai, det kis utuntudu ina dekdekin a minat.

O Adam i a malalarin o naro ra in nanpat numur. 15 Ikut a etabor anun o God ke elar nama sakino petutna anun o Adam. Uni a susut na taro det mat una sakino petutna anun ara musano kut. Ikut, i lingmulus sakit, a marmaris anun o God i bukus ma i pulpulas, ma un ara musano kut, o Iesu Karisito, ma una nun a marmaris, i pitar oros tari kut a etabor torom a susut na taro.

16 Ara utna kai, a etabor anun o God ke elar nama utna ra i wanpat tagun a sakino petutna anun o Adam. Anun ara petutna i dat tar a taro, sur det in iru una warkurai na minabalu anun o God. Ikut a etabor anun o God i lenri, ra a taro det pami utmakai a kum sakino petutna, o God i watung det a kum tene tokodos. 17 Ma una petutna na lakai warkurai anun ara musano kut, a taro rop det kis utuntudu ina dekdekin a minat. Ikut, i lingmulus sakit, a taro ra det los pas a marmaris anun o God ra i bukus ma i pulpulas, ma det los pasi kai anun a etabor ra i watung det a kum tene tokodos, det in laun tukum ma det in warkurai elar nama kum king, kibino un ara musano kut, o Iesu Karisito.

18  1 Kor 15:22I mo ra un ara petutna na lakai warkurai kut anun o Adam, a taro rop det kis una warkurai na minabalu anun o God. Lenutkai ra, un ara tokodos na petutna ra o Iesu i pami, o God in watung a taro rop a kum tene tokodos, ma det in laun. 19  Ais 53:11Una pitarngat anun ara musano kut, a susut na taro det a kum tene sakino. Lenkutkai ra, una mur wasiso anun ara musano kut, o Iesu Karisito, a susut na taro det a kum tene tokodos.

20 Ra o God i pitar tar a kum Warkurai, a sakino petutna anun a taro i lubung. Ikut ra a sakino petutna i lubung, a marmaris kai anun o God i labo tauni. 21  Rom 6:23A taro det kis utuntudu ina dekdekin a sakino petutna, ra i pitar a minat torom det. Ikut uniri, a taro ra det kis utuntudu ina dekdekin a marmaris anun o God, o God i watung det a kum tene tokodos, ra i pitar a nilaun tukum torom det, kibino una pinapam ra o Iesu Karisito anundat a Labino i sa pam tari.