A Pas anun o Pol torom a taro
Rom
A wasiso talapor mugu
Ra o Pol i kis tong o Korin, i tumus a pas ri torom a taro na lotu tong o Rom. I pitari torom ara ino a risano o Pibi ra i losi utong o Rom (tama o Rom 16:1).
O Rom a tarai na tamon doko. A labino king, ra di watungi nama Sisa i kis iai.
Ra o Pol i tumus a pas ri, kabaut i wan utong o Rom ma kabaut i ususer det. Ra una pas ri, i nem na ususer det una susut na utna. Ara labino utna ra i nemi sur det in talapor uni i lenri: A taro rop det sa pam a sakino ma kataio i tokodos umatan o God. Dat in tokodos umatan o God ra dat nurnur kut un o Iesu Karisito. Ma ra dat nurnur un o Karisito dat in laun nama matok na nilaun ma dat in muri mo a Tokodos na Nion. I watungi kai una taro Juda, lena o God ke dumano det.
O Pol i inanos det kai lena i nem na wan torom det.
A inawan ina Pas Rom:
A turturkibin ina buk ri (1:1-17)
A taro rop det pam a sakino ma det sibo sur taio in ulaun det (1:18-3:20)
O God in ulaun dat uni dat nurnur un o Karisito (3:21-4:25)
Un o Karisito dat laun nama matok na nilaun (5:1-8:39)
O God ke dumano a taro Israel (9:1-11:36)
A kum wakak na petutna ra dat in muri (12:1-15:13)
A ururop na wasiso anun o Pol torom a taro Rom (15:14-16:27)
1
O Pol i wasiso una nun a pinapam na aposel
Ap 9:15Iau o Pol, a tultul anun o Karisito Iesu, a tumus a pas ri torom mot. O God i kabo pas iau, sur an aposel, ma i pilok pas iau sur an warawai nama nun a Wakak na Wasiso torom a taro. Rom 16:25-26A Wakak na Wasiso ri, o God i sa uliliman mugu taru uni ma anun a kum poropet det sa tumus tari una Buk Tabu. A Wakak na Wasiso i wasiso un o Nutunulik, ra di usus pasi tagun a kabotaro anun o king Dewid. Ma una nun a katkatutur melet gusun a minat, a Tokodos na Nion i ese i lena, i a Nutun o God ma i dekdek. I ut o Iesu Karisito anundat a Labino. Ap 26:16-18; Gal 2:7-9Un o Karisito ut, o God i maris met ma i pitar a pinapam na aposel torom met, sur met in ulabo pas a risan o Karisito, ma met in warawai torom a taro rop ra awu sur a taro Juda, sur det in nurnur ma det in mur anun a wasiso. Mot kai ara taro tagun det, ra o God i kabo pas mot, sur mot anun o Iesu Karisito.
Nam 6:25-26A tumtumus torom mot rop tiro o Rom, ra o God i maris mot, ma i kabo pas mot sur mot anun a taro. A marmaris ma a malmal tan o God a Tamandat ma a Labino o Iesu Karisito in kis tomo nam mot.
O Pol i wararing sur a taro Rom
Iri a mugano utna, una risan o Iesu Karisito, a watung wakak torom anung a God un mot rop, uni a taro tagun a rakrakon bual rop, det wasiso puaso una numot a nurnur. A papam torom o God nama nung a nilaun rop, ra a ser warawai nama Wakak na Wasiso un o Nutunu, ma o God ut i tasmani lena, a ser nuk pas mot 10  Ap 19:21; Rom 15:23nama nung a kum niaring una kum bung rop. A wararing kai lena, ra a nemnem ut anun o God, kanapi an pet sot pasi ut sur an nanpat torom mot.
11 A nem doko i sur an tama mot, sur an tabor mot nama etabor, sur in udekdek a niomot. 12 Lenra, ra an tama anumot a nurnur, ma mot kai mot in tama anung a nurnur, dat in uragot etetalai dat. 13  Ap 19:21A kum tistising, a nemi sur mot in tasmani lena, a susut na bung a nuki lena an nan torom mot, sur an warut mot tuk ra an tama a win anung a etowo una numot a nilaun, elar nama win anung a etowo ra a tama i una kum tamon gisen tandet ra awu sur a taro Juda. Ikut, tuk uniri, a kum utna i turbat iau, ma ka wan lar pas.
14 Anung a pinapam utra, o God i pitar tari tang, sur an warawai torom a taro ra det tasman a wasiso Grik ma a taro ra ka det tasmani kai, torom a kum tene mananos ma det ra anundet a mananos ke labo. 15 I mo ra a nem doko i, sur an warawai nama Wakak na Wasiso torom mot kai, tiro o Rom.
A Wakak na Wasiso i a dekdekin o God
16  Mk 8:38; 1 Kor 1:18-24; Ap 13:46Ka maimai una Wakak na Wasiso, uni i a dekdekin o God sur in ulaun pas a taro rop ra det nurnur. Torom met a taro Juda mugu, ma uniri torom mot kai, ra awu sur a taro Juda. 17  Rom 3:21-22Uni a Wakak na Wasiso i upuaso a kisapi ra o God i pami, sur a taro det in tokodos umatan o God. A kisapi na nurnur kut, a taro det in tokodos uni, a nurnur sot kut tagun a turturkibino tuk una ururopino. Elar nami ra di sa tumus tari una Buk Tabu lenri, “Osi kut ra i nurnur, o God in watungi a tene tokodos, ma in laun.” Hab 2:4
O God i kankan una magiran a taro
18 O God i upuaso anun a kankan tagisapat una langit, uni a taro ka det mur a petutna ra i wakak umatano, ma det pam a sakino, ma una nundet a kum sakino petutna, det turbat a lingmulusino. 19  Ap 14:15-17; 17:24-28O God i kankan, uni a kum utna ra din tasmani un o God i talapor kut torom det, uni i ut i sa utalapor tari torom det. 20  Jop 12:7-9; Sng 19:1Turpasi una ukukis ina rakrakon bual, a taro det tama a kum ukukis. I mo ra det pet lar pasi sur det in tasman a kum magiran o God, a kum magiran o God, ra ka din tama i. Det tasmani lena, a dekdekino in tur tukum, ma i o God. I mo ra katu kisapi sur det in ipul ru i.
21  Ep 4:17-18Det tasmani ut o God, ikut ka det ulabo pasi lenri, i a God, ma ka det watung wakak kai toromi. Det nuk penpen oros kut, ma a balandet i dumirum, uni kalako mananosin det. 22  Jer 10:14; 1 Kor 1:20Det watungi lena, det mananos doko, ikut det wanpat a kum longlong. 23  Lo 4:15-19; Sng 106:20Ka det lotu torom o God ra i laun tukum, ma i bukus nama minamar. Det lotu kut torom a kum toktok ina kum musano ra det ser mat kut, ma torom a kum toktok ina kum piko, ma a kum wewegua, ma a kum utna ra det kaukawar nin upiso.
24 I mo ra, o God i madek tar det sur det in pam a kum dur na petutna elar nama kum sakino nemnem tagun a balandet, ra det in pam a petutna na maimai etetalai una pinindet. 25 Det keles ru a lingmulus na etowo anun o God sur a torotoro. Det lotu ma det wararing mukut torom a kum utna ra o God i ukis tar det, ma ka det lotu mo torom a Tene Ukukis, i ra din watung ulabo pasi ma in tur tukum. Amen.
26 I mo ra, o God i madek tar det una nundet a labino nemnem sur a kum sakino petutna na maimai. I lenri: A wardain det keles ru a kisapi na nolin, ra di sa ukis tari, ma det ser inep etetalai nam det melet ut. 27  Wkp 18:22; 20:13; 1 Kor 6:9Lenkutkai ra a kum musano, det wan gisen gusun a kisapi na nolin ra di sa ukis tari lena, det in nolin nama wardain, ma a balandet i kalkal doko sur a kum musano, ma det pam a sakino torom det melet ut a kum musano. Kalako maimai indet, ra det pami lenra. Det ut, det los a warkurai na minabalu, ra i sot nam anundet a kum niraro.
28 I kai ri, ka det nuk pasi mo o God, det nuki lena, a etowo un o God i utna oros kut. I mo ra i madek tar det sur in laulau a nuknukin det, ma det pami mukut a kum utna ra ke sot sur din pami. 29 Det bukus nama kum wur ngas na sakino petutna rop ri: Det pam a sakino torom a taro, det nemnem sur a susut na ululeng, ma det nem na ban laulau a taro. Det bukus nama nuknuk laulau sur a utna anun taio, det um doko a taro, det engaras, det torotoro, ma det nget a taro. Det wasiso eno, 30 det emang, det nget o God, det waim, det uman labino, ma det warango pas det. Det nuknuk sur a kum matok na kisapi, sur a pam sakino. Det pitarngat torom a kum tamandet, ma a kum nandet. 31 Kalako wakak na mananos, ka det ser pam sot pas anundet a kum liliman, ka det tasmani mo a marmaris, ma a wakak na petutna torom a taro. 32 A ngas na taro lenri, det tasmani ut a warkurai anun o God lena, det ra det ser pam a kum petutna ri, i sot sur det in mat. Ikut det pami kut, ma det mulaot sur a taro gisen kai det in pami.

1:1: Ap 9:15

1:2: Rom 16:25-26

1:5: Ap 26:16-18; Gal 2:7-9

1:7: Nam 6:25-26

1:10: Ap 19:21; Rom 15:23

1:13: Ap 19:21

1:16: Mk 8:38; 1 Kor 1:18-24; Ap 13:46

1:17: Rom 3:21-22

1:19: Ap 14:15-17; 17:24-28

1:20: Jop 12:7-9; Sng 19:1

1:21: Ep 4:17-18

1:22: Jer 10:14; 1 Kor 1:20

1:23: Lo 4:15-19; Sng 106:20

1:27: Wkp 18:22; 20:13; 1 Kor 6:9