28
Tong o Malta
Ra met sa saur rop taru, met tasmani maragom a ailan ra, a risano o Malta. 2 Kor 11:27A taro tagitiro iai det maris doko met, ra det tagol tar a sungun ma det ben pas met rop, uni i bato ma i kotokoto doko. Ra o Pol i los pas a kabo duwai, sur in ukarangop a sungun nami, ra teken laulau na sui i kawar pat gusun a kabo duwai ra, uni a sungun i mararong, ra i kakarot dekdek taru una lamano. A taro tagitiro iai una ailan, det tama i lena in nusui i kete taru una laman o Pol, ra det wasiso etetalai torom det lena, “Kutiro, a musano ri, a tene um doko a taro. I sa laun sikot tagisa utasi, ikut o god na minabalu ke mulaot sur in laun.” Mk 16:18Ikut o Pol i lakro ru in nusui gusun a lamano usapat una sungun, ma ke ban laulau i. Ap 14:11Det nuki lena a lamano ina surung, o in puku pirso ra in mat. Ikut, det kis langlang ma i sa suano i, ma katu laulau na utna i wanpat uni, ra det pukus a nuknukin det, ra det nuki lena o Pol ara god.
Ara mugumugu tagitiro una ailan ri, a risano o Publius, anun a du piso pi kura iai. I ben pas met utiro una nun a rumu, ma i ugasgas met. Ra met kis pas a tulu bung tiro una nun a rumu. Ma o taman o Publius i inep, i misait nama mararong, ma in balano i kalabor. Ra o Pol i ruk toromi, ra i wararing, ma i ubek aru lamano sapat netes uni, ra i ulangolango pasi. Ra i sa pam tari lenri, a kum misait rop tagun a ailan, det wanpat ma di ulangolango det. 10 Ma det pam a susut na wakak na pinapam torom met sur det in ese anundet a urur. Ma numur, ra met waninar sur met in kas una sip, det tabor met nama kum utna rop ra met sibo suri.
Tagitong o Malta utong o Rom
11 Ra i sa rop a tulu kalang, met kas una ara sip ra i kis ru a kum kalang na wuwu una ailan ra. A sip ra, tagitong o Aleksanderia ma sa numugu uni di sa tok tar a malalarin aru kasango, aru nutun a god Sus. 12 Met sot pas tiro o Sirakus, ra met kis pas a tulu bung tiro iai. 13 Met kalabor tagitiro iai ma met sot tong o Regium. Ra una bung numur, a tobar i wanpat. Ma ara bung melet numur tano, met sot tiro o Puteoli. 14 Tiro iai met pastorom pas a kum tistisi mot una nurnur, ra det saring met sur met in kis pas lako wonom mawit na bung nisandet. Numur met wan mo utong o Rom. 15 Det ra det tar tistisino una nurnur tagitiro o Rom, det longoro a wasiso un met, ra det wan barato met tong una nubual na siuru a risano o Apius, ma tong una nubual di watungi nama A tulu Rumu na Usiro. Ra o Pol i tama pas det, i watung wakak torom o God. Ma a magirandet, i udekdek anun a nilaun.
O Pol i kis tong o Rom
16 Ra met sa wanpat tong o Rom, di mulaot tar o Pol sur i kut in kis un tu rumu, ma tu tene inaim in tamtamabati.
17 Ra a tulu bung i sa rop, o Pol i kabo tomo pas a kum mugumugu anun a taro Juda. Ra det wanpat tomo, i watungi tandet lena, “A kum tistising, ka ban laulau anundat a taro, o lako kum petutna kai anun a kum tumtubun dat tagun numugu. Ikut det pam ukai pas iau sapat o Jerusalem, ma det pitar tar iau torom a taro Rom. 18  Ap 26:31Ra a taro Rom det sa longoro tar anung a wasiso ra a wasiso bat iau nami, det nemi sur det in palos ru iau, uni ka det sio pas tu utna ra din um doko iau uni. 19  Ap 25:11Ra a taro Juda ka det mulaot, ka sio pas tu kisapi sur an langolango uni, ra a sasaring sur a Sisa in warkurai iau. Ikut katu sakino utna ra an takun anung a taro uni. 20  Ap 26:6-7A itula sur mot, sur dat in kis tomo ma an wasiso talapor una kibino ra di sen ukai tar iau. Di sen ukai tar iau uni a kis langlang nama nurnur sur o naro ra a taro Israel kai det kis langlang suri.”
21 Ra det watungi tano lena, “Katu pas tagisa o Judia i wanpat torom met un ui, ma katu tisimet kai i wanpat nam tu wasiso tagisa un ui, o tu wasiso un tu sakino utna ra u pam tari. 22  Ap 24:14Met nemi sur met in longoro a nuknukim, uni met sa tasmani lena, una kum tamon rop di watung laulau a matok na lotu ri.”
23 Det nam o Pol det kubus pas ara bung sur det in wasiso. A susut na taro det wanpat toromi, una rumu ra i kis uni. I turpas a wasiso una kobot ma i tuk una lirop. I papalos torom det una matanitu anun o God. Ma i papalos utkai una Warkurai anun o Moses ma a kum tumtumus anun a kum poropet, sur in ukatutur a nuknukin det sur det in nurnur un o Iesu. 24 A ramano taro tagun det, det nurnur un asau ra o Pol i watungi, ikut ara taro kai, ka det nurnur. 25 Det engaras epotor tandet ra det katutur na inawan. Ikut numugu ra ka det wan utmakai, o Pol i watung a ururop na wasiso tandet lena, “A lingmulus ut ra a Tokodos na Nion i wasiso una wan a poropet Aisaia, torom a tumtubu mot tagun numugu lena, 26 ‘Un nan torom a taro ri ma un inanos det lena,
Mot in longoro ma mot in longoro, ikut ka mot in longoro lele i,
mot in tamtama ma mot in tamtama, ikut ka mot in tama lele i.
27 Uni a balan a taro ri i dekdek,
ma a taltalngan det i kutkut,
ma a matmatan det i pulu.
Ra gunuk det in tamtama lele nama matmatan det,
ma det in longoro lele nama taltalngan det,
ma det in tastasman nama nuknukin det,
sako det in tupukus torom iau, ma iau ut, an ulaun pas det.’ ” Ais 6:9-10
28-29 Ra o Pol i watungi tandet lena, “I mo ra mot in tasmani lena, a pinapam anun o God ra i ulaun pas a taro, i sa wan torom det ra awu sur a taro Juda. Ra det, det na rakoni!”* Una ramano kum du buk una wasiso Grik, a ramano kum wasiso kai i kis una vers ri. I lenri: Numur tan anun a wasiso, a taro Juda det wan susuaro, ma det engaras dekdek epotor tandet.
30 Aru kudulano kilalo, o Pol i kis una rumu ra i ut i ser tokomi, ma i gas pas a taro rop ra det wanan pat toromi. 31 Ra i ser warawai una matanitu anun o God, ma i ser ususer a taro una Labino o Iesu Karisito, ma ke ngara, ma kataio kai i turbati.

28:2: 2 Kor 11:27

28:5: Mk 16:18

28:6: Ap 14:11

28:18: Ap 26:31

28:19: Ap 25:11

28:20: Ap 26:6-7

28:22: Ap 24:14

*28:28-29: Una ramano kum du buk una wasiso Grik, a ramano kum wasiso kai i kis una vers ri. I lenri: Numur tan anun a wasiso, a taro Juda det wan susuaro, ma det engaras dekdek epotor tandet.