A Mugano Pas
anun o Pol torom a taro
Korin
A wasiso talapor mugu
Ra o Pol i kis tong o Epeses, i tumus a pas ri torom a taro na lotu tong o Korin.
O Korin i a labino tamon ra i kis nago utasi, una papor Akaia. A tamon anun a taro Grik, ikut a susut na taro Juda kai det kis tiro iai.
O Pol i wan utong o Korin una nun a manru na inawan, ra i warawai nama Wakak na Wasiso torom det. I kis ara kilalo ma ara kukur tong, ma i ususer det (tama Ap 18:1-17). Numur, o Apolos i wan torom det (tama Ap 18:27).
O Pol i tumus a pas ri uni i longoro a wasiso una nundet a kum petutna ra i ukis susuaro det (tama 1 Kor 1:10).
O Pol i tumusi kai, sur in balu anundet a pas ra det sa tumus tari toromi (tama 1 Kor 7:1 ma 8:1).
A inawan ina Mugano Pas Korin:
A turturkibin ina buk ri (1:1-9)
A kinkinis susuaro anun a taro na lotu (1:10-4:21)
A kum sakino petutna ra ara taro na nurnur det pami (5:1-6:20)
A kum etowo una kinkinis na nolin (7:1-40)
Gong dat lotu torom a Labino ma torom a kum laulau na nion kai (8:1-11:1)
A kum warkurai na lotu, ma a kum etabor anun a Tokodos na Nion (11:2-14:40)
A katkatutur melet anun o Iesu gusun a minat, ma a taro na nurnur kai (15:1-58)
A etabor torom a taro na lotu tong o Judia (16:1-4)
A ururop na wasiso anun o Pol torom det (16:5-24)
1
Iau o Pol, ra o God i kabo pas iau, elar ut nam anun a nemnem sur an aposel anun o Karisito Iesu. Mir nam o Sostenes a tisindat, mir tumtumus torom mot a taro na lotu anun o God ra mot kis tiro o Korin. Mot ra o Karisito Iesu i gos talapor pas anumot a nilaun, ma i kabo pas mot sur mot a taro anun o God. Mot a taro anun o God tomo nama taro rop una kum tamon rop ra det lotu una risan anundat a Labino o Iesu Karisito, i ra a Labino anundet ma anundat kai.
A marmaris ma a malmal tan o God a Tamandat ma a Labino o Iesu Karisito, in kis tomo nam mot.
O Pol i watung wakak torom o God una taro Korin
A ser watung wakak torom o God un mot, kibino una nun a marmaris ra i pitar tari torom mot un o Karisito Iesu. Uni una numot a kinkinis tomo nam o Karisito, o God i udan mot nama kum utna rop. I udan mot una numot a wasiso rop ma numot a mananos rop. I pami lenra uni anumet a wasiso talapor un o Karisito, i sa wanpat talapor una numot a nilaun. I mo ra ka mot in sibo sur tu etabor anun a Tokodos na Nion torom mot, ra mot ser kis langlang nama gasgas sur anundat a Labino o Iesu Karisito ra in nanpat puaso. 1 Tes 3:13; 5:23I ut in udekdek mot tuk una ururop na bung, sur katu utna ra din takun mot nami una bung anun anundat a Labino o Iesu Karisito. 1 Jon 1:3; 1 Tes 5:24Ma a utna ri ra o God i watungi in pami ut. Ra i kabo pas mot sur mot in lason tomo nam o Nutunu o Iesu Karisito anundat a Labino.
A taro na lotu det taptapagol
10  Pil 2:2A kum tistising, a saring mot nama risan anundat a Labino o Iesu Karisito, sur mot rop mot in tur tomo, ma gong mot taptapagol. Ma in takai kut a nuknuki mot, ma anumot a nemnem kai. 11 A kum tistising, ara taro ra det kis una rumu anun o Kloe, det inanos iau lena mot ser engaras etetalai. 12  1 Kor 3:4; Ap 18:24-28An palos a kukurai ina wasiso ri lena: Ara taro tagun mot det watungi lena, “A mur o Pol,” ara taro det watungi lena, “A mur o Apolos,” ara taro det watungi lena, “A mur o Pita,” ma ara taro kai det watungi lena, “A mur o Karisito.”
13 Pepetlai, o Karisito i sa taptapagol? Pepetlai, di sak wat o Pol unin nanai kutus un mot? Pepetlai, di baptaiso mot nama risan o Pol? 14  Ap 18:8; Rom 16:23A watung wakak torom o God uni ka baptaiso tar taio tagun mot. O Krispus kut ma o Gaius ra a baptaiso der. 15 I lenra, katutaio tagun mot in pet lari sur in watungi lena, di baptaiso i nama risang. 16  1 Kor 16:15A lingmulus, a baptaiso det kai ra det kis una rumu anun o Stepanas, ma ka tasmani, ra a sa baptaiso tar taio kai, o awu. 17 Uni o Karisito ke tulu iau sur an baptaiso, awu. I tulu iau sur an warawai nama Wakak na Wasiso. Ma awu sur an warawai nama wasiso na mananos anun a taro, surko in lakro ru a dekdekin in nanai kutus anun o Karisito ra in utna oros kut.
O Karisito i a dekdekin o God ma a mananos anun o God
18  Rom 1:16Uni a wasiso unin nanai kutus, a longlong na wasiso kut torom det ra det wan sur a iniru. Ikut, torom dat ra o God i ulaun dat, a wasiso unin nanai kutus, i a dekdekin o God. 19 Uni o God i sa watung tari una Buk Tabu lenri,
“An kamar ru a mananos anun a kum tene mananos,
ma an upuku ru a wakak na nuknuk anundet ra det tastasman.” Ais 29:14
20  Ais 19:12; 33:18; 44:25; Jop 12:17Asau dat in watungi un tu tene mananos? Asau dat in watungi un tu tene mananos una kum Warkurai anun o Moses? Asau dat in watungi un tu tene mananos ra in balu rop pas a kum iting? O God i ese i lena, a mananos tagun a rakrakon bual i a longlong na mananos kut. 21  Mt 11:25Uni, una mananos anun o God, i pami sur a taro una rakrakon bual ka det in pet lari sur det in tasman o God una mananos anundeti ut. A wasiso ra met warawai nami, a taro det nuki lena a longlong na wasiso, ikut, una wasiso ra, o God i gas sur in ulaun det ra det nurnur.
22 A lingmulus, a taro Juda det nem na tama lako kum ukinalong, ma a taro Grik det sisio sur tu mananos. 23  Rom 9:32; 1 Kor 2:14Ikut met, met warawai kut un o Karisito, i ra di sak wati unin nanai kutus. A warawai ri, a taro Juda det ngeti, ma torom det, i elar nama wat ra det puku taru uni, ma i elar kut nama longlong na wasiso torom a taro ra awu sur a taro Juda. 24  Kol 2:3Ikut, o Karisito a dekdekin o God, ma a mananos anun o God, torom a taro ra o God i kabo pas det. A taro ra, tagun a taro Juda ma tagun a taro Grik. 25  2 Kor 13:4A mananos anun o God ra a taro det nuki lena a longlong na mananos kut, i ra i labo taun a mananos anun a taro. A dekdekin o God ra a taro det nuki lena ke dekdek, i ra i dekdek sakit taun a dekdekin a taro.
26  Mt 11:25; Jem 2:5A kum tistising, mot in nuk pas mot lena mot asi na ngas na taro ra o God i kabo pas mot. Awu sur a susut tagun mot a kum tene mananos umatan a taro. Awu sur a susut tagun mot, mot utur ukai a dekdek sur mot in mugu a taro. Ma awu sur kai a susut tagun mot tagun a kum kabotaro ra det labo umatan a taro. 27 Ikut o God i pilok pas a utna ra a taro det nuki lena a longlong na utna sur in ban umaimai a kum tene mananos. Ma o God i pilok pasi kai a kum utna ra a taro det nuki lena ke dekdek sur in ban umaimai det ra det dekdek. 28 O God i pilok pas a kum utna ra a taro tagun a rakrakon bual det unatino pasi, ma a kum utna ra det ngeti, ma a kum utna ra det nuki lena a kum utna oros kut, sur a kum utna ra i labo torom det, in utna oros mukut. 29  Ep 2:9I pami lenra sur gong taio i warango pasi ut umatan o God.
30  Jer 23:5-6O God ut i sa pam tar a kisapi sur mot in laun tomo nam o Karisito Iesu, ma i pitar tari sur i a kimkibin anundat a mananos. Un o Karisito, o God i watung dat lena dat tokodos umatano, ma dat anun a taro. Ma una pinapam anun o Karisito, o God i kul langolango pas dat gusun anundat a kum sakino petutna. 31 I mo ra dat in pami elar nami ra di sa tumus tari una Buk Tabu lena, “Osi ra i nemi sur in warango pasi, i wakak sur in warango pas a Labino.” Jer 9:24

1:8: 1 Tes 3:13; 5:23

1:9: 1 Jon 1:3; 1 Tes 5:24

1:10: Pil 2:2

1:12: 1 Kor 3:4; Ap 18:24-28

1:14: Ap 18:8; Rom 16:23

1:16: 1 Kor 16:15

1:18: Rom 1:16

1:20: Ais 19:12; 33:18; 44:25; Jop 12:17

1:21: Mt 11:25

1:23: Rom 9:32; 1 Kor 2:14

1:24: Kol 2:3

1:25: 2 Kor 13:4

1:26: Mt 11:25; Jem 2:5

1:29: Ep 2:9

1:30: Jer 23:5-6