9
O Pol i tupunuk una nun a taro
1 A watung a lingmulusino ri umatan o Karisito, ka toro. Ma a Tokodos na Nion i upuaso i una nuknuking lena, a wasiso ri i lingmulus ut. 2 A nuknuking i maut doko, ma ka mana nama tupunuk. 3 Kis 32:32Ra gunuk an pet lar pasi, a nemi sur an tur keles a kum tistising, anung a taro Juda, ma din ubek tari mukut anundet a warkurai na minabalu un iau, ma din rakon ru iau gusun o Karisito, sur din ulaun pas det. 4 Kis 9:4Det a taro Israel, ra o God i ras pas det sur det a kum nutnutunu. I ese anun a minamar tandet, i pam a kum kunubus tomo nam det, i pitar tar a kum Warkurai tandet, i ese tar det una kisapi na lotu mulus, ma i uliliman tar det. 5 Det a kabotaro anun o Abaram, o Aisak ma o Jekop. Ra o Karisito i wanpat a musano mulus, i wanpat tagun det, i a Karisito ra i warkurai sur a kum utna rop, ma i ut ra o God. Dat in watung ulabo pasi, ma ken rop. Amen.
A pinapam anun o God torom a taro Israel
6 Ra a watungi lenra, awu sur a watungi lena o God ke pam sot pas anun a liliman torom a taro Israel, awu. Uni awu sur a taro Israel rop, det a taro Israel mulus umatan o God. 7 Ma awu kai sur det rop ra det wanpat tagun o Abaram, det a kum nutnutun o Abaram mulus. Awu. O God i watungi tan o Abaram lenri, “A kum tumtubum det in nanpat tagun o Aisak.” Stat 21:12
8 Gal 4:23Awu sur det rop ra det wanpat tagun o Abaram, ra din watung det lena a kum nutnutun o God. Awu. Det kut ra di usus det una liliman anun o God, det ra, o God i watung det lena, a kum nutnutun o Abaram mulus. 9 Uni a liliman anun o God i lenri, “Ra a bung in sot, an milet melet, ma o Sara i sa usus pas a nat musano.” Stat 18:10, 14
10 Awu sur i kut ra, o Rebeka kai i usus pas a ru nutnutunu, ma ara tamander kut, o Aisak, a tubundat. 11-12 Ra ka di usus der utmakai, o God i watungi torom o Rebeka lena, “A mugano in papam torom a murmur.” Stat 25:23
I watung a wasiso ri, ra aru nat ka der pami utmakai tu wakakino o tu sakino. O God i pami lenra, sur anun a pipilok in elar ut nam anun a nemnem. O God, i ra i ser kabo pas a taro, i pilok pas det ra i nem det, awu sur un tu pinapam ra det sa pam tari. 13 Elar nami ra di sa tumus tari una Buk Tabu lena, “O Jekop a nemi, ikut o Iso a ngeti.” Mal 1:2-3
14 I mo ra, asau mo dat in watungi? Pepetlai, o God ke pam a tokodos na petutna? Awu! 15 Uni o God i watungi torom o Moses lena,
“An maris osi ra a nemi sur an marisi,
ma an pam a wakakino torom osi ra a nemi sur an pam a wakakino toromi.” Kis 33:19
16 Ep 2:8I mo ra a pipilok anun o God, awu sur i kibino una nemnem anun taio, o un tu pinapam ra taio i pami. Anun a pipilok i kibino ut una nun a marmaris. 17 Elar nama wasiso una Buk Tabu, ra o God i watungi torom o Pero tong o Ijip lena, “A ubek tar ui sur un king, sur an ese a dekdeking una sau ra an pami un ui, sur a risang in nan sarara una rakrakon bual rop.” Kis 9:16
18 I mo ra o God i maris osi ra i nemi sur in marisi, ma i udekdek in balan osi ra i nemi sur in udekdek in balano.
19 Kutiro taio in ting iau lena, “Ra o God i pami lenra, sur asau ra i takun dat? Katutaio in turbat lar pas o God sur in pam sot pas anun a nemnem.” 20 Ais 29:16; 45:9Osi ui ra u nuki lena un balu a wasiso anun o God? Ui a musano kut ui. Ra taio i pam tu utna, pepetlai, a utna ra i pami, i elar sur in watungi torom o naro ra i pami lenri, “Sur asau ra u pam iau lenri?” 21 Jer 18:6Ra a tene pam kuro i nemi sur in pam lako ru kuro gusun ara du piopap kut, i ut i warkurai suri. In pam ara wakak na kuro sur a kum lamlabino balon, ma ara kai sur a kum bung oros kut.
22 Lenutkai ra o God i pami una taro. O God i ling sur in ese anun a kankan ma a dekdekino. Ikut i kis langlang utmakai, ma ke pitar lakit a minabalu torom a taro ra det kis utuntudu ina nun a kankan, det ra det sa waninar sur a iniru. 23 I pami lenra sur in ese anun a labino minamar torom det ra det kis utuntudu ina nun a marmaris. Det ra i waninar tar det numugu utmakai sur det in kis tomo nami una nun a minamar. Ma uniri det kis langlang suri. 24 Osi det? Dat ut, ra i sa kabo pas dat. Awu sur a taro Juda kut, a taro gisen kai. 25 I elar nama wasiso anun o God una taro ra awu sur a taro Israel, ra a poropet Hosea i sa tumus tari lena,
“A taro ra awu sur anung, an watung det anung a taro,
ma det ra ka maris det, an maris det.” Os 2:23
26 Ma o Hosea i watungi kai lena,
“Una tamon ra numugu o God i watung tari tandet lena,
‘Mot awu sur anung a taro,’
din watung det ‘a kum nutnutun o God, ra i laun.’ ” Os 1:10
27 Ikut o Aisaia i wasiso dekdek una taro Israel lenri,
“A taro Israel det susut elar nama woio nago utasi,
ikut o God in ulaun pas a pak na taro kut.
28 A Labino in pam sot lakit pas anun a warkurai una rakrakon bual,
ma in pam sot rop pasi.” Ais 10:22-23
29 I elar nama wasiso ra o Aisaia i watung tari numugu lenri,
“A Labino i dekdek sakit.
Gunuk ra ken madek tar lako taro tagun anundat a kabotaro,
dat sa iru rop elar nama taro tagitiro o Sodom ma o Gomora.” Ais 1:9
A taro Israel ka det nurnur
30 I mo ra asau mo dat in watungi una kum utna ri? Det ra awu sur a taro Israel awu sur det dekdek sur det in tokodos umatan o God. Ikut o God i watung det lena det tokodos umatano, kibino una nundet a nurnur. 31 A taro Israel det dekdek sur det in mur a kum Warkurai, sur det in utokodos pas det, ikut ka det pet lari. 32 Ais 8:14Asau a kibino? Uni ka det nurnur, det nuki kut lena det sa tokodos umatan o God, kibino una nundet a kum pinapam. Det tutuka una wat na tutuka, ma det puku. 33 1 Pit 2:6Elar nami ra di sa tumus tari una Buk Tabu lenri,
“Tama i, a ubek tar a wat sapat o Saion, ra a taro det in tutuka uni, ma det in puku.
Ma osi ra in nurnur uni, ken maimai.” Ais 8:14; 28:16