4
A wasiso elelar un aru tamano
1 An inanos mot nam ara wasiso elelar melet. A nat in tur keles o tamano una kum ululeng rop, ikut ra i natlik utmakai, i elar kut nama tene ititula. 2 A kum tene tamtamabat det in tamtamabat a nat ra, ma a kum ululeng anunu. Ma in ser kis utuntudu indet, tuk ra in sot a kilalo ra o tamano i kubus tari, sur in los a kum ululeng anun o tamano. 3 Kol 2:20Lenkutkai ra torom dat, numugu dat elar nama nat, dat elar nama kum tene ititula anun a kum laulau na nion taginin una rakrakon bual. 4 Jn 1:14; Rom 1:3Ra a kilalo i sot, o God i tulu ru o Nutunulik urin. A ino i usus pasi, ma i kis utuntudu ina Warkurai. 5 I wanpat sur in kul langolango pas det ra det kis utuntudu ina Warkurai, sur dat in nanpat a kum nutnutun o God.
6 Rom 8:15-17Mot a kum nutnutun o God ut. I ra a kibino ra i pitar ru a Tokodos na Nion, a Nion o Nutunulik, sur in kis ubalamot, ma i kakabo torom o God lena, “Aba! Tita!” 7 Uniri ka mot kis na tene ititula melet mo, awu. Mot a kum nutnutun o God, ma mot in rakon pas a kum utna anun o God.
O Pol i ngara sur a taro Galesia
8 Numugu, ra ka mot tasman o God, mot tene ititula torom a kum god ra awu sur a kum god mulus. 9 Ikut uniri mot sa tasman a lingmulus na God. A lingmulus, o God i tasman mot. Sur asau ra mot milet melet sur a kum laulau na nion ra ka det gas un tu utna? Pepetlai, mot nemi sur mot in tene ititula melet torom det? 10 Rom 14:5; Kol 2:16Mot dekdek doko sur mot in mur a kum warkurai anun a taro Juda una kum lamlabino bung, ma a kum kalang, ma a kum kilalo, ra mot nuki lena mot in tokodos uni. 11 A ngara doko sur mot, sako anung a pinapam torom mot in utna oros kut.
12 A kum tistising, a saring dekdek mot sur mot in kis langolango gusun a Warkurai elar nam iau, uni a elar kut nam mot ra awu sur a te Juda. Numugu ra a kis nisamot, ka mot pam tu laulau ino un iau. 13 Mot tasmani ut, a mugano dino ra a wanpat, ra a warawai nama Wakak na Wasiso torom mot, kibino kut uni a misait. 14 Anung a misait i pitar a maut torom mot, ikut ka mot nget iau, ma ka mot rosumur gusun iau, awu. Mot gas pas iau kut elar nam ara ensel anun o God, o elar nam o Karisito Iesu ut. 15 A nuki lena, kanapi ra mot in pet lari, mot in gas sur mot in liok ru a kum kiok na matmata mot urin tang. Ikut uniri, awai mi anumot a gasgas ra? 16 Pepetlai, uniri mot nuki mukut lena iau anumot a ebar, uni a inanos mot nama lingmulus?
17 A kum torotoro na tene ususer ra, det dekdek doko sur mot in mur det, ikut awu sur det pami sur det in uwakak mot. Det nemi kut sur mot in nan gusun met, sur mot in dekdek sur mot in longoro det. 18 A tuntunur dekdek i wakak, ikut mot in dekdek sur a utna ra i wakak. Mot in dekdek uni, ra dat kis tomo, o a kis gisen kai gusun mot.
19 A kum nutnutung liklik, a taramo melet a ngunungut sur mot, elar nama ino ra i usus. An taramo a ngunungut ri, tuk mot in elar nam o Karisito. 20 A nemi sur an kis torom mot, ma an wasiso na marmaris namin nalngang ut torom mot, uni ka tasmani lena, asau melet mo an pami torom mot.
A wasiso elelar un o Agar der nam o Sara
21 Mot ra mot nem na mur a Warkurai, mot in inanos iau: Pepetlai, mot tasmani ut a kukurai ina Warkurai? 22 Stat 16:15; 21:2A Buk Tabu i watungi lena, o Abaram aru nutnutunu, o Ismael a nutun a tene ititula na ino, a risano o Agar. Ara kai, a risano o Aisak, a nutun o Sara, a ino ra awu sur a tene ititula. 23 Rom 9:7-9A Nutun o Abaram ra a tene ititula i ususi, i ususi una ngas na nolin tagun a rakrakon bual. Ikut a nutun o Abaram, ra o Sara i ususi, i ususi kibino una liliman anun o God.
24 A wasiso ri a wasiso elelar. Aru ino ri, der elar nama ru kunubus. Ara kunubus ra o God i pami sapat netes una tangai Sainai ra i pitar a kum Warkurai tan o Moses. O Agar i tur ukinalong a kunubus ra, ra a taro ra det kis utuntudu ina kunubus ra, det elar nama kum tene ititula. 25 O Agar i tur ukinalong a tangai Sainai kurong o Arebia, ma i elar nama malalarin o Jerusalem anun a taro Juda, uni a taro Juda det kis na tene ititula una Warkurai.
26 Ibr 12:22; Tam 21:2, 10Ikut o Jerusalem kusapat una langit, i langolango elar nam o Sara, a ino ra awu sur a tene ititula, ma i a nandat, a kum tene nurnur. 27 Di sa tumus tari una Buk Tabu lena,
“Ui a pobo na ino ra ko usus, un gas,
un kelekele ma un kukukuk nama gasgas,
ui ra ko taramo tar a ngunungut na usus.
Uni a kum nutnutun a ino ra anun a musano i wan pas gusuni, in susut doko,
taun a kum nutnutun a ino ra i kis nisan anun a musano.” Ais 54:1
28 Rom 9:7A kum tistising, di usus mot una liliman anun o God, elar nami ra di usus o Aisak una liliman anun o God. 29 Stat 21:9-10; Jn 8:35O naro ra di ususi una ngas na nolin tagun a rakrakon bual, i ukadik o naro ra di ususi una dekdekin a Tokodos na Nion. I lenkutkai ra torom dat uniri. 30 Asau ra a Buk Tabu i sa watung tari uni? I sa watung tari lena, “Un lu ru a tene ititula na ino tomo nam o nutunu, uni a nutun a tene ititula ken rakon a kum ututna anun o tamano. A ino ra ke tene ititula, o nutunu kut in rakoni.” Stat 21:10
31 I mo ra a kum tistising, awu sur dat a kum nutnutun a tene ititula na ino. Dat a kum nutnutun a ino ra ke tene ititula.