1 A nemi sur mot in tasmani lena, a papam dekdek sur mot, ma sur a taro Laodisia, ma sur det rop kai, ra ka etorom det utmakai. 2 A pami lenra, sur in uragot anundet a nilaun, ma det in kis na marmaris tomo, sur det in bukus nama labino mananos, sur det in tasman a utna anun o God, ra numugu i kis eno, i ra o Karisito ut. 3  1 Kor 1:24, 30A mananos rop, ma a wakak na ninunuk rop, det elar nama kum wakak na ululeng, ra det kis eno un o Karisito.

4  Rom 16:18A watungi lenri torom mot, sur gong taio i toro pas mot nam tu namnamin na wasiso. 5  1 Kor 5:3A lingmulus, a kis gisen gusun mot una pining, ikut una niong a kis tomo ut nam mot, ma a gas ra a tama i lena, mot warkurai kodos anumot a nilaun, ma mot tur dekdek una numot a nurnur un o Karisito.

6 Mot sa los pas o Karisito Iesu sur i a Labino una numot a nilaun, i wakak sur mot in laun bolbolos ut uni. 7  Ep 3:17Anumot a nilaun in wakakor un o Iesu sur in lubung, ma mot in tur netes uni. Mot in tur dekdek una nurnur elar nami ra di sa ususer tar mot uni, ma mot in bukus nama watung wakak torom o God ma anumot a watung wakak in pulpulas.

8 Mot in tumarong mot, sur gong taio i ukarabus mot nama mananos anun a taro kut, ra i a etowo oros kut ma a torotoro. A mananos ra, i wanpat kut tagun a kum etowo anun a kum tumtubun det tagun numugu, ma tan a kum laulau na nion tagun a rakrakon bual, ma awu sur tan o Karisito.

9  Jn 1:14, 16Uni o Karisito i wanpat a mulusino, ma a nilaun rop anun o God i bukus uni. 10  Ep 1:21-22Ma mot tagun o Karisito, i mo ra anumot a nilaun i kudulano. Ma o Karisito ut, i labo taun a kum nion rop ra det utur ukai a dekdek, ma a kum nion rop ra det utur ukai a warkurai. 11  Rom 2:29Una numot a nilaun un o Karisito, i tok talilis mot, ikut awu sur a ngas na tinotok talilis ra a taro det pami nama lamandet, awu. A tinotok talilis ra o Karisito i pami i lenri, i rakon ru a laulau na nemnem ina pinimot. 12  Rom 6:4Ra di baptaiso mot, di por mot tomo nam o Karisito. Ma mot katutur melet tomo nami, uni mot nurnur una dekdekin o God, i ra i ukatutur melet pas o Karisito gusun a minat.

13  Ep 2:1-5Numugu a niomot i mat, uni mot pam a kum sakino petutna, ma ka di rakon ru a laulau na nemnem ina pinimot. Ikut uniri, o God i sa ulaun pas mot tomo nam o Karisito. I sa unus ru anundat a kum sakino petutna rop. 14  Ep 2:14-16; 1 Pit 2:24Dat ser rosumur gusun a kum Warkurai anun o Moses, ra a etakun i kis un dat. Ikut o God i unus ru a etakun, ra i sak wat tari sapat netes unin nanai kutus. 15 O God i sa rakon ru a dekdekin a kum nion ra det utur ukai a dekdek ma a kum nion ra det utur ukai a warkurai. Ma unin nanai kutus i ban umaimai det umatan a taro rop, uni i ese i lena, i sa winim rop pas det.

16  Rom 14:1-12I mo ra, gong mot madek tar taio sur in takun mot lena, ka mot pam sot pas a kum warkurai un asau ra mot in nani ma mot in inumi, ma una kum lamlabino bung na lotu, ma una kalang ra i wanpat kibin, ma una Bung na Sabat. 17  Ibr 8:5A kum warkurai ri, det elar kut nama malalar ina utna ra in nanpat numur. Ikut, a utna mulus, i o Karisito. 18 Ara taro det ser toro lena, det unatino pas det una nundet a ngas na lotu, ma det ser lotu torom a kum ensel, ma det ser wasiso una kum ririon ra det tama i. Gong mot madek tar det sur det in takun mot. Uni a ngas na musano ra, i uman labino kut nama nuknukino, ma a nuknukino i bukus nama kum laulau na nemnem ina pinino. 19  Ep 2:21; 4:16I sa tukutus gusun o Karisito, i ra in lorin a taro na lotu. O Karisito i in lorindat, ma dat a pinino. I udekdek a kum du pinino sur det in warut etetalai det ma det in kis tomo, elar nama kum mulmulukun ina pinindat ra det tugus tomo. Ra a kudulano pinino i lubung, elar nama nemnem anun o God.

20  Gal 4:3, 9; 1 Tim 4:3Mot sa mat tomo nam o Karisito, ma mot sa langolango gusun a kum etowo tan a kum laulau na nion tagun a rakrakon bual. Asau a kibino ra mot laun melet kut elar nam mot taginin una rakrakon bual ma mot mur a kum warkurai taginin? A kum warkurai lenri: 21 “Gong mot pami! Gong mot wani! Gong mot tulani!” 22  Mt 15:9A kum warkurai ri i wasiso una kum utna ra dat papam pas nami, ra numur ka det gas mo un tu utna, uni a kum warkurai ri det wanpat tagun a kum etowo kut anun a taro. 23 A lingmulus ut, a kum warkurai ri, det tamtama elar nami ra det tagun a wakak na mananos, uni a taro ra det ser mur det, det dekdek una lotu, ma det ser unatino pas det, ma det ser warkurai bat a pinindet. Ikut ka det pet lar pasi sur det in turbat a laulau na nemnem ina pinindet.