1 Iau o Pol, a aposel anun o Karisito Iesu una nemnem anun o God. Mir nam o Timoti a tisindat una nurnur, mir tumtumus 2 torom mot, a taro anun o God ra mot kis tiro o Kolosi, ra mot a kum tistisi mir una numot a nurnur un o Karisito, ma mot lingmulus una numot a nurnur. A marmaris ma a malmal tan o God a Tamandat in kis tomo nam mot.

3  Ep 1:15, 16Ra mir ser wararing sur mot, mir ser watung wakak torom o God, a Taman anundat a Labino o Iesu Karisito, 4 uni mir sa longoro i lena, mot sa nurnur un o Karisito Iesu, ma mot nem a taro rop anun o God. 5 Anumot a nurnur ma a marmaris ri, i kibino una numot a kinkinis langlang tomo nama nurnur sur a utna, ra o God i tamtamabati sur mot sapat una langit. A utna ra, mot sa longoro tar a wasiso uni, una lingmulus na wasiso, i a Wakak na Wasiso, 6 ra i wanpat torom mot. A Wakak na Wasiso, ra i lubung, ma i wu a wino una rakrakon bual rop, elar nami ra i wu epotor tamot, turpasi una bung ra mot longoro i, ma mot tasman mulus a marmaris anun o God. 7  Kol 4:12; Plm 1:23O Epapras i sa ususer tar mot uni. I a wakak na tultul, ra i papam tomo nam met, ra met nem doko i, ma i a lingmulus na tene pinapam anun o Karisito, ra i tur ukinalong met. 8 I sa inanos tar mir una numot a marmaris, ra a Tokodos na Nion i tabor mot nami.

9  Ep 1:16, 17Iri a kibino ra, ka mir mana nama niaring sur mot, turpasi una bung ra mir longoro a wasiso un mot. Mir ser saring o God, sur in ubukus mot nama mananos sur mot in talapor una nun a nemnem, ma in ubukus mot nama mananos ma a wakak na nuknuk rop, ra a Niono i tabor mot nami. 10  Ep 1:11, 18Mir wararing lenri, sur anumot a nilaun in elar nama petutna anun a Labino, ra mot in ser pam a kum utna ra in gas uni. Ra in lenra, anumot a nilaun in wu a wimot una kum wakak na pinapam rop ra mot in pami, ma mot in lubung una numot a tastasman un o God.

11 Ra o God in udekdek mot nama dekdek rop, tagun a wakak na labino dekdekino, sur mot in kis wowowon ma mot in tur dekdek una kum maut rop ra mot taramo i. Ma mot in gas, 12 ra mot in watung wakak torom a Tamandat, ra i warut mot sur mot in pet lari sur mot in rakon a kum utna tomo nam anun a taro. A kum utna ra i sa uliliman tari torom det, ra det kis una talapor. 13  Lk 22:53; Ep 2:2I sa ulaun pas dat gusun a dekdekin a dumirum, ma i sa ben ruk pas dat una matanitu anun o Nutunu ra i nem doko i, 14  Ep 1:7i ra i sa kul langolango pas dat, ma i sa unus ru anundat a kum sakino petutna.

15  2 Kor 4:4; Jn 1:18O Karisito a malalarin o God, i ra ka dat tama tari. O Karisito a mugano Nutun o God, ma i labo sakit taun a kum ukukis rop. 16 Uni o God i ukis tar a kum utna rop una dekdekin o Karisito: a kum utna sapat una langit ma a kum utna nin upiso, a kum utna ra di ser tama det ma a kum utna ra ka di ser tama det, lenri, a kum nion ra det kiskis na labino, a kum nion ra det utur ukai a dekdek, a kum nion ra det mugumugu, ma a kum nion ra det utur ukai a warkurai. Un o Karisito, o God i ukis a kum utna rop, ma i ukis det sur det anun o Karisito. 17  Jn 1:1; 8:58Ra o God ke ukisi utmakai a kum utna rop, o Karisito i sa laun, ma i pam ukai a kum utna rop sur det in papam tomo wakak. 18  Ep 1:22-23; Ap 26:23; Tam 1:5I ut in lorin a taro na lotu, ma det a pinino. I a turturkibin anundet a nilaun, ma a mugano ra i katutur melet gusun a minat, sur i ut in labo sakit taun a kum utna rop. 19  Kol 2:9Uni o God i gas sur anun a kudulano nilaun rop in bukus un o Nutunu. 20  Ep 1:10; 2:16Ra una minatin o Nutunu, a kum utna rop det milet melet toromi, sur det in kis na emarom tomo nami, a kum utna nin upiso ma a kum utna sapat netes una langit. I pam a malmal nama gapin o Nutunu ra i mat unin nanai kutus.

21  Rom 5:10; Ep 2:12Numugu mot kis bakbak gusun o God, ma una nuknuki mot, mot anun a kum ebar, kibino una kum sakino petutna ra mot ser pami. 22  Ep 2:14-16; 5:27Ikut uniri, o God i sa dat pas mot toromi, sur mot pasano melet. I pam a pinapam ri, nama pinin o Karisito ra i mat, sur in ben pas mot umatan o God, ma mot anun a taro, ra katu niraro kura un mot, ma katu etakun in los mot. 23 Ra mot in dekdek nama nurnur, ma mot in tur dekdek uni, o God in pam a utna ri. Ma gong mot wan gisen gusun a kinkinis langlang nama nurnur sur a kum utna ra o God in pami, ra mot sa longoro tari una Wakak na Wasiso. A Wakak na Wasiso ra, di sa inanos taru nami torom a taro rop una rakrakon bual. Iau, o Pol, a wanpat a tultul tagun a Wakak na Wasiso.

24 Uniri a gas una kum mamaut ra a taramo i un mot. Una kum mamaut ra a taramo i una pining, a pam sot pas a kum mamaut anun o Karisito, sur an warut a taro na lotu, det ra a pinin o Karisito. 25  Ep 3:2, 7-8O God i ubek tar iau, sur iau a tultul anun a taro na lotu. I pitar tar a pinapam ri tang, sur an warawai nam anun a kum wasiso rop torom mot. 26  Rom 16:25-26; Ep 3:5, 9A wasiso ri, i a utna ra i kis eno, tagun numugu utmakai gusun a kum taun taro tagun numugu. Ikut uniri, i sa puaso torom a taro anun o God. 27 O God i upuaso i lena, a taro ra awu sur a taro Juda, det kai det in tasman a utna ra numugu i kis eno, ra i wakak doko ma in udan det. Iri a utna ra: o Karisito ut i kis una numot a nilaun, i mo ra, mot kis langlang nama nurnur sur a minamar anun o God, ra mot in rakoni.

28 Met warawai un o Karisito torom a taro rop. Met utumarong det, ma met ususer det nama mananos rop, sur met in ben pas det rop torom o God, ma det in tokodos sakit, uni det tagun o Karisito. 29  Ep 3:7, 20; Pil 4:13A papam dekdek sur a utna ri in nanpat mulus ut. A lingmulus, a papam dekdek nama labino dekdekin o Karisito, ra i papam dekdek una nung a nilaun.