1  Ep 6:9Mot a kum mugumugu, mot in pam a tokodos na petutna torom anumot a kum tene ititula, ma a magiramot in elar kut torom det rop, uni mot tasmani lena, mot kai, anumot a mugumugu i a Labino, ra i kis sapat una langit.

2  Ep 6:18; Pil 4:6Mot in dekdek nama niaring. Ra mot wararing, a nuknuki mot in talapor, ma mot in watung wakak torom o God. 3  Rom 15:30; Ep 6:19Mot in wararing kai un met, sur o God in papos saro a kisapi, sur met in upuaso a wasiso un o Karisito, ra numugu i kis eno. A kis una karabus, uni a wasiso nama kum wasiso ri. 4 Mot in wararing sur an wasiso talapor wakak nami, sur an pam sot pas anung a pinapam.

5  Ep 5:15-16Mot in papam nama mananos torom a taro ra ka det nurnur. Una kum du bung rop, ra i langolango sur mot in wasiso puaso torom det, mot in pami. 6  Ep 4:29; 1 Pit 3:15Ra mot in wasiso torom det, anumot a wasiso in wakak, ma in namnamin torom det, sur mot in balu anundet a kum iting nama tokodos na minabalu torom det rop taktakai.

7  Ep 6:21O Tikikus in inanos mot una kum utna rop un iau. I a wakak na tisindat, a lingmulus na tene pinapam ma a tultul tomo nam met una pinapam anun a Labino. 8  Ep 6:22A tulu ru i torom mot, sur mot in tasman anumet a nilaun nin i pepetlai, ma sur in uragot mot. 9  Plm 1:10-12In nan tomo nam o Onesimus, a wakak na tisindat ra i lingmulus una nun a pinapam, i ara ut tagun mot. Der in inanos mot una kum utna rop ra i wanpat nin.

10  Ap 12:12; 15:37-39; 13:13O Aristakus, ra i kis tomo nam iau una karabus, i pitar anun a marmaris torom mot, der nam o Mak a malin o Banabas. Ra o Mak in nanpat torom mot, mot in gas pasi, elar nama wasiso ra mot sa rakon mugu tari. 11 O Iesu, ara risano kai o Jastus, i kai i pitar anun a marmaris torom mot. Detul ri, detul a tulu te Juda ra detul nurnur, ma detul sot kut tagun a taro Juda, detul papam tomo nam iau sur a matanitu anun o God. Ma detul udekdek iau.

12  Kol 1:7; 2 Tim 4:10-11; Plm 1:23-24O Epapras, i ara ut tagun mot, ma a tultul anun o Karisito Iesu, i pitar anun a marmaris torom mot. I ser wararing dekdek sur mot, sur mot in tur dekdek una numot a kinkinis na nilaun un o Karisito, ma mot in tasman mulus a nemnem rop anun o God. 13 Uni iau ut a tama i ma a wasiso mulus uni torom mot lena, i papam dekdek sur mot, ma sur det kurong o Laodisia ma det kai tong o Ierapolis. 14 O Luk, ra a dokta ma a wakak na pasamet, ma o Demas, der pitar anunder a marmaris torom mot.

15 Mot in pitar anung a marmaris torom a kum tistisin dat kurong o Laodisia, ma torom a ino ri, o Nimpa, ma a taro na lotu kai, ra det ser lotu tomo una nun a rumu.

16 Ra di sa luk tar a pas ri torom mot, numur mot in pitari torom a taro na lotu tong o Laodisia, sur det bulung det in luki. Lenkaira, mot in luk a pas ra a sa tumus tari torom a kum Laodisia.

17  Plm 1:2Mot in inanos o Arkipus lena, in pam rop ru a pinapam ra o God i sa pitar tari tano.

18  1 Kor 16:21Iau o Pol, iau ut, a tumus a nat na wasiso na marmaris ri nama lamang torom mot. Gong mot dumano ru iau, ra a kis una karabus.

A marmaris anun o God in kis tomo nam mot.