1  Mk 12:36; 16:19; Ep 1:20O God i sa ukatutur tomo pas mot nam o Karisito gusun a minat, i mo ra, i wakak sur mot in ubek a kudulano nuknuki mot una kum utna sapat una langit, ra o Karisito i kis iai, una papor sot na laman o God. 2  Mt 6:33I wakak ra a nuknuki mot in kis una kum utna sapat una langit, ma gong i kis una kum utna taginin upiso. 3 Uni mot sa mat gusun a ngas na nilaun tagun a rakrakon bual, ma uniri anumot a nilaun i kis eno tomo nam o Karisito, un o God. 4 O Karisito i ra anumot a nilaun. Ra in nanpat, mot kai mot in nanpat puaso tomo nami una nun a minamar.

5  Rom 6:6, 11; Ep 4:19; 5:3-6I mo ra, mot in doko ru a kum sakino petutna taginin upiso, ra kura una numot a nilaun. Iri a kum petutna ra: a kum petutna na pamuk, a kum dur na petutna, a laulau na nemnem, a nemnem sur a kum sakino petutna ma a nemnem sur a susut na ululeng. A nemnem sur a susut na ululeng, i ra, a lotu torom a torotoro na god. 6 Ra a kankan anun o God in nanpat torom a taro uni det pam a kum petutna ri.

7 Una numot a nilaun numugu, mot kai mot ser mur a kum petutna ri. 8  Ep 4:25-29; 5:4Ikut uniri, mot in lakro ru a kum petutna rop lenri: a wasiso na engaras, a kankan, a kum sakino petutna, a emang, ma a wasiso laulau kai. 9  Ep 4:22-25Gong mot toro etetalai mot, uni mot sa rakon ru a kum sakino petutna ra numugu mot ser pami, 10 ma mot sa emar pas nama matok na nilaun. A matok na nilaun ri, o God i ser umatoki, sur mot in elar nama malalarino, ma sur mot in tasman mulusi. 11  Gal 3:28Ra lenra, dat rop dat elar mukut: a taro Juda, a taro Grik, det ra di sa tok talilis tar det ma det ra ka di tok talilis det, ma a taro tagun osi na ngas na kabotaro, a kum tene ititula ma det kai ra ka det tene ititula. O Karisito ut i labo sakit, ma i kis un dat rop.

12  1 Pit 2:9Mot a talapor na taro anun o God, ra i maris doko mot, ma i pilok pas mot. I mo ra, i wakak sur mot in emar nama kum petutna ri: mot in warut a taro, mot in pam a wakakino torom det, mot in unatino pas mot, mot in kis na malmal ma mot in ese a wowowon na magiramot. 13  Ep 4:2, 32Ma gong mot balano sungun ra taio tagun mot i raro un lako kum utna, mot in dumano ru anun a sakino petutna, elar nama Labino i sa unus ru anumot a kum sakino petutna. 14  Rom 13:8-10Netes una kum petutna rop ri, i wakak sur mot in emar nama marmaris torom mot etetalai. A marmaris i dat tomo dat rop, sur dat in takai kut.

15  Pil 4:7; 1 Kor 12:27; Ep 4:4I wakak sur a malmal ra o Karisito i tabor mot nami in mugu mot una numot a nilaun. Uni mot ara pinin o Karisito kut, ma o God i kabo pas mot sur mot in kis tomo nama malmal. Ra i wakak sur mot in ser watung wakak torom o God. 16  Ep 5:19I wakak ra a wasiso anun o Karisito in kis sikot ubalamot ma in bukus. Mot in ususer etetalai mot nami, ma mot in udekdek etetalai mot kai nami tomo nama mananos rop. Ma mot in kelekele nama wasiso anun o Karisito ra mot kele a Kum Kelekele anun o Dewid, ma a kum kelekele na lotu, ma a kum kelekele ra a Tokodos na Nion i tabor mot nami. Ra mot in kelekele nama watung wakak torom o God ubalamot. 17  1 Kor 10:31; Ep 5:20Una kum utna rop ra mot pami ma mot watungi, mot in pami ut nama risan a Labino o Iesu, ma mot in watung wakak torom o God a Tamandat, kibino una pinapam ra o Karisito i pami un mot.

18  Ep 5:22Mot a kum nolin na ino, i wakak sur mot in ser unatino pas mot torom anumot a kum musano, uni i tokodos sur mot, a taro anun a Labino mot in pami lenra.

19  Ep 5:25Mot kai, a kum nolin na musano, mot in ser nem anumot a kum ino, ma gong mot pam det lar a kum karabus anumot.

20  Ep 6:1A kum nat liklik, mot in ser mur a wasiso anun a kum tamtama mot ma a kum nanamot una kum utna rop, uni a Labino i gas ra mot ser pami lenra.

21  Ep 6:4Mot a kum tamtaman a kum nat, gong mot ungangos a kum nutnutu mot, sako det in tusako.

22  Ep 6:5-8Mot a kum tene ititula, mot in mur a wasiso anun anumot a kum mugumugu taginin upiso una kum pinapam rop. Gong mot papam wakak kut ra det tama mot, sur mot in ugasgas tar det kut. Mot in papam wakak torom det nama lingmulusino tiro ubalamot, ma a urur torom a Labino. 23 Una kum pinapam rop ra mot pami, mot in pitar rop tar anumot a nilaun uni. Ra mot papam, mot in papam elar nami ra mot papam ut torom a Labino, ma awu sur torom a taro. 24 Uni mot tasmani lena, numur a Labino in pitar a ikul torom mot, i a wakak na kinkinis ra numur mot in rakoni. Mot a kum tene ititula anun a Labino o Karisito, ma i ut anumot a mugumugu mulus. 25  Rom 2:11Osi ra i pam a sakino in los a warkurai na minabalu una sakino ra i pam tari. A warkurai anun a Labino i elar kut torom a taro rop.