1 A kum tistising, uniri an inanos mot nama kum etabor anun a Tokodos na Nion, uni a nemi sur mot in talapor uni. 2  Hab 2:18-19Mot tasmani lena, ra ka mot nurnur utmakai, di ben raro pas mot torom a kum torotoro na god ra ka det ser wasiso, ma mot lotu torom det. 3  1 Jon 4:2-3I mo ra an watungi tamot lenri, katutaio ra a Nion o God in mugu i, in watung lar pasi lena, “O Iesu in iru tukum.” Ma katutaio in watung lar pasi lena, “O Iesu a Labino,” ra a Tokodos na Nion ke mugu i.

4  Rom 12:6A wur ngas na etabor anun a Tokodos na Nion, ikut ara Nion o God kut, ra i ser tabor dat. 5 A wur ngas na pinapam na warut, ikut ara Labino kut, ra dat papam toromi. 6 A wur ngas na pinapam, ikut ara God kut, ra i pam a kum pinapam ra, una nilaun anun a taro rop.

7 A Tokodos na Nion i ese i ut una nilaun anun arara, sur in warut a taro rop. 8 A Tokodos na Nion i tabor ara nama mananos sur in wasiso nami, ma a Nion ut ra, i tabor ara kai nama wakak na nuknuk sur in wasiso nami. 9 Ma a Nion ut ra, i tabor ara kai nama nurnur, ma a Nion ut ra, i tabor ara kai nama etabor sur in ulangolango a kum misait. 10 Ma i tabor ara kai nama dekdek sur in pam a kum utna na ukisin, ma ara kai nama wasiso na poropet. Ma i tabor ara kai nama mananos sur in tasman lele a Tokodos na Nion ma a kum nion gisen kai, ma ara kai nama mananos sur in wasiso nama wur ngas na wasiso, ma ara kai nama mananos sur in palos a kukurai ina wur ngas na wasiso. 11  1 Kor 7:7Ara Nion sot kut ra i pam a kum pinapam rop ri. Ma una nun a nemnem ut, i tabor arara taktakai.

12  1 Kor 10:17A musano i ara kut, ikut a susut na du pinino. A kum du pinino det susut, ikut di tugus tomo pas det sur ara kudulano pinino. A pinin o Karisito i lenkutkai ra. 13  Gal 3:28Uni ara Nion kut i baptaiso dat rop, sur dat ara pinin o Karisito mukut, dat a taro Juda, ma dat ra awu sur a taro Juda, dat a kum tene ititula ma dat ra ka dat tene ititula. Ma o God i pitar ara Nion kut torom dat rop sur dat in inum taguni.

14 A kudulano pinino awu sur ara du pinino kut, awu, a susut na du pinino ut. 15 Ra a kikino in watungi lena, “Iau awu sur a du pinino, uni awu sur iau a lamano,” i lingmulus lena, i awu sur a lamano, ikut, a du pinino ut. 16 Ra in talngano in watungi lena, “Iau awu sur a du pinino, uni awu sur iau in matano,” i lingmulus lena, i awu sur in matano, ikut a du pinino ut. 17 Ra a kudulano pinino in matano rop kut, in longoro mo pepetlai? Ra a kudulano pinino in talngano rop kut, in sasangop mo pepetlai? 18 Ikut o God i sa tugus tomo tar a kum du pinindat rop taktakai, elar ut nama nun a nemnem. 19 Ra a kum du pinindat rop det elar kut, in kudulano mo pepetlai? 20 Ikut i lenutra, a susut na du pinindat, ikut ara pinindat.

21 In matano ken watung lar pasi tan a lamano lenri, “Ka sibo sur ui!” Ma in lorino kai, ken watung lar pasi tan aru kikino lena, “Ka sibo sur mur!” 22 Awu! A kum du pinindat ra dat nuki lena ka det dekdek, anundet a pinapam kura ut. 23 Ma a kum du pinindat ra dat nuki lena ka det wakak, dat mar wakak det. Ma a kum du pinindat ra dat maimai nam det, dat pipis bat det. 24 Ikut, a kum du pinindat ra det tamtama wakak, ka det sibo sur tu utna. O God i sa tugus tomo tar a kum du pinindat, ma a kum du pinindat ra dat nuki lena ka det wakak det wakak ut. 25 I pami lenra sur gong a pinindat i taptapagol. A kum du pinindat det in warut etetalai det, ma a warut ra, in elar torom det rop. 26 Ra tu du pinindat i ngungut, a kum du pinindat rop det in ngungut tomo nami. Ma ra di watung ulabo pas tu du pinindat, a kum du pinindat rop det in gas tomo nami.

27  Rom 12:5Mot ut a pinin o Karisito, ma mot rop taktakai a kum du pinino. 28  Ep 4:11-12O God i sa pilok pas a taro ri epotor tan a taro na lotu: a mugano ut a kum aposel, a manru a kum poropet, a mantul nami, a kum tene ususer, ma det kai ra det pam a kum utna na ukisin, ma det ra o God i pitar a etabor torom det sur det in ulangolango pas a kum misait, ma det ra det warut a taro, ma det ra det ser mugu a taro una kum pinapam, ma det ra det wasiso nama wur ngas na wasiso. 29 Pepetlai, det rop a kum aposel rop kut? Awu. Det rop a kum poropet rop kut? Awu. Det rop a kum tene ususer rop kut? Awu. Det rop det pam a kum utna na ukisin? Awu. 30 Det rop o God i pitar a etabor torom det sur det in ulangolango pas a kum misait? Awu. Det rop det wasiso nama wur ngas na wasiso? Awu. Det rop det ser palos a kukurai ina wur ngas na wasiso? Awu. 31  1 Kor 14:1Ikut, mot in kalkal doko sur a kum etabor ra det wakak doko.

Uniri an ese mot una kisapi ra i wakak doko taun det rop.