1  1 Kor 12:31; 14:39Mot in dekdek una marmaris. Mot in nemnem sur a kum etabor anun a Tokodos na Nion. Ma a etabor ra i wakak doko sur mot in nemi, mot in wasiso na poropet. 2 Uni taio ra in wasiso nama wur ngas na wasiso, ke wasiso torom a taro, awu, i wasiso torom o God. A taro ka det tasman a kukuraino. I watung a kum utna na pidik nama dekdekin a Tokodos na Nion. 3 Ikut, taio ra i wasiso na poropet, i wasiso torom a taro sur in udekdek det, in uragot det ma in umarom det. 4 Taio ra i wasiso nama wur ngas na wasiso i udekdek pasi ut. Ikut, taio ra i wasiso na poropet i udekdek a taro na lotu rop. 5 A nemi sur mot rop mot in wasiso nama wur ngas na wasiso, ikut a nem doko i sur mot in wasiso na poropet. O naro ra i wasiso na poropet i wakak doko taun o naro ra i wasiso nama wur ngas na wasiso. Ikut ra taio in palos a kukurai ina wur ngas na wasiso sur in udekdek a taro na lotu, in wakak ut.

6 A kum tistising, ra an nanpat torom mot ma an wasiso nama wur ngas na wasiso, an warut petlan mot? Ikut, ra a nemi sur an warut mot, an wasiso torom mot nama wasiso ra o God i sa upuaso tari tang, o an wasiso nama mananos, o a wasiso na poropet, o a etowo torom mot. 7 Lenkutkai ra a kum utna ra ka det laun, elar namin tulal ma a gita. Det ser tangis ut, ikut ra a tinangisin det i wan senene kut, dat in tasman petlan a kelekele ra? 8 Ra in tuwuru ken tangis talapor, asi na tene inaim in waninar sur a inaim? 9 Lenkutkai ra torom mot. Ra ka mot watung talapor a kum wasiso, din tasman petlan a wasiso ra mot watungi? Anumot a wasiso in nan kut una maino. 10 A lingmulus ut, a wur ngas na wasiso kuri una rakrakon bual, ikut katu wasiso ra katu kukuraino. 11 Ra ka tasman a kukurai ina wasiso ra taio i wasiso nami torom iau, a elar kut nama usiro toromi, ma o naro kai ra i wasiso, i elar kut nama usiro torom iau. 12 Lenkutkai ra torom mot. Mot ser dekdek sur a kum etabor anun a Tokodos na Nion. I wakak sur mot in dekdek sur a kum etabor ra in udekdek a taro na lotu rop.

13 Ra in lenra, i wakak sur osi ra i wasiso nama wur ngas na wasiso, in wararing sur in pet lar pasi sur in palos a kukurai ina nun a wasiso. 14 Ra a wararing nama wur ngas na wasiso, a niong i wararing, ikut a nuknuking ke nuk tu utna. 15 Asau an pami? An wararing nama niong, ma an wararing kai nama nuknuking. An kelekele nama niong, ma an kelekele kai nama nuknuking. 16 Ra u watung wakak torom o God una niom nama wur ngas na wasiso, taio ra ke talapor una kukurai ina num a wasiso, in watung “Amen” pepetlai? Uni ke tasman asau ra u watungi. 17 I lingmulus, anum a niaring na watung wakak torom o God i wakak, ikut ke udekdek a taro.

18 A watung wakak torom o God, uni a lason doko una wasiso nama wur ngas na wasiso taun mot rop. 19 Ikut ra a kis tomo nama taro una lotu ma an watungi kut lako limo na du wasiso ra a kukuraino in talapor torom det sur an ususer det nami, i ra i wakak doko taun a noino arip na du wasiso una wasiso gisen, ra ka det in longoro lele i.

20  Ep 4:14A kum tistising, gong a nuknuki mot i elar nama kum nat liklik. Una sakino petutna i wakak sur mot in elar nama kum nat miso. Ikut, una nuknuki mot, mot in elar nama kum lamlabino. 21 A Labino i sa watung tari una Buk Tabu lenri,

22 A wur ngas na wasiso, i a ukinalong torom det ra ka det nurnur, awu sur torom det ra a kum tene nurnur. Ikut a wasiso na poropet, i a wasiso sur a kum tene nurnur, awu sur a wasiso sur det ra ka det nurnur. 23  Ap 2:13Ra mot a taro na lotu rop mot in kis tomo, ma mot rop mot wasiso nama wur ngas na wasiso, ma lako taro oros kut, o lako taro ra ka det nurnur det in ruk, det in watungi lena mot longlong. 24  Jn 16:8Ikut ra mot rop mot wasiso na poropet, ma taio ra awu sur a tene nurnur, o tu musano oros kut in ruk torom mot, anumot a kum wasiso rop ra i longoro i in so in balano ma in takuni lena i a tene sakino. 25 Ma a kum utna ra i kis eno unin balano, in nanpat pupuaso. Ra in puku, in masarino unago upiso, ra in lotu torom o God, ma in wasiso talapor lena, “A lingmulus ut, o God i kis epotor tamot.”

26  1 Kor 12:8-10A kum tistising, asau an watungi? Ra mot kis tomo una lotu, ara taro det in kelekele, ara taro det in ususer a taro, ara taro det in wasiso puaso un tu utna ra o God i sa ese tari tandet, ara taro det in wasiso nama wur ngas na wasiso, ma ara taro kai det in palos a kukuraino. A kum utna rop ri din pami sur in udekdek a taro na lotu. 27 Ra lako taro det in wasiso nama wur ngas na wasiso, lako ru o lako tul kut ma gong det susut. Ara munung in wasiso, ma taio in palos a kukuraino. Detul rop detul in pami lenra. 28 Ra katutaio kura sur in palos a kukuraino, i wakak ra o naro ra i wasiso nama wur ngas na wasiso, gong i wasiso una lotu. In wasiso kut toromi ut ma o God.

29  1 Tes 5:21Lako ru o lako tul, detul in wasiso na poropet, ra a taro det in nuknuk wakak una nundetul a wasiso ra i lingmulus o awu. 30 Ra taio kura i kis una lotu, in rakon tu wasiso tan o God, o naro ra kura i wasiso in mana. 31 Ra mot rop mot nem na wasiso na poropet, i wakak sur ara munung in wasiso, ra numur ara bulung, tuk mot rop mot in wasiso. Mot in pami lenra, sur a taro rop det in los a etowo, ma in uragot det. 32 A wasiso na poropet i kis utuntudu ina warkurai anun a poropet ut. 33-34  1 Kor 11:3; 1 Tim 2:12Uni o God, a God na malmal, ma ke nem a utna ra i lokolokor.

I wakak ra a wardain det in kis wowowon kut una lotu, elar nama taro anun o God det ser pami una kum tamon rop. Ka di mulaot tar det sur det in wasiso. Det in unatino pas det, elar nama Warkurai anun a taro Juda i watungi. 35 Ra det nem na iting un tu utna, i wakak sur det in ting anundet a kum musano uni tiro una nundet a kum rumu. Uni a utna na maimai ra a ino in wasiso una lotu.

36 Pepetlai, mot a kibin a wasiso anun o God? Awu. Pepetlai, i wanpat kut torom mot? Awu. 37  1 Jon 4:6Ra taio i nuki lena i ut a poropet, o a Tokodos na Nion kura uni, i wakak sur in tasmani lena asau ra a tumusi torom mot, a warkurai ut anun a Labino. 38 Ra taio ke mur a wasiso ri, o God kai ken longoro anun a wasiso.

39 I mo ra a kum tistising, mot in kalkal sur mot in wasiso na poropet, ma gong mot turbat taio ra i wasiso nama wur ngas na wasiso. 40 Ikut mot in mur a kum tokodos na inawan ina lotu, ma gong i lokolokor.