1  1 Kor 4:16Mot in mur a magirang, elar nami ra a mur a magiran o Karisito.

2 A watung ulabo pas mot, uni mot ser nuk pas iau una kum ututna rop, ma mot mur a kum etowo ra a sa ususer tar mot nami. 3  Stat 3:16; Ep 5:23Ikut, a nemi sur mot in tasmani lena, o Karisito in lorin a kum musano rop, ma a musano in lorin a ino, ma o God in lorin o Karisito. 4 Ra tu musano in wararing o in wasiso na poropet, ma i sa rakup bat pas in lorino, i ban umaimai in lorino. 5 Ra tu ino in wararing o in wasiso na poropet, ma ke rakup bat in lorino, i ban umaimai in lorino. I elar nami ra di sa kas rop ru a iwu na lorino. 6 Ra tu ino ke rakup bat in lorino, i wakak ra din kumur ru a iwu na lorino. Ikut, ra di kumur ru a iwu na lorino, i ra a utna na maimai. I wakak ra in rakup bat in lorino sur gong di kumur ru a iwu na lorino, ma gong di kas rop ru i. 7  Stat 1:26-27Ke tokodos ra tu musano in rakup bat in lorino, uni i a malalarin o God ma i ese a minamarin o God. Ikut a ino i ese a minamarin a musano. 8  Stat 2:18-23Uni o God ke pam a musano tagun a ino, awu, i pam a ino tagun a musano. 9 Ma o God ke pam a musano sur a ino, awu, i pam a ino sur a musano. 10 Iri a kibino ra a ino in rakup bat in lorino, sur in ese i torom a taro ma torom a kum ensel kai lena i pam ukai a nimulaot sur in wararing ma in wasiso na poropet.

11 Ikut, i lingmulus, ka di ukis gisen a ino gusun a musano, o a musano gusun a ino, awu. Der in warut etetalai der, una nunder a kinkinis na nilaun torom a Labino. 12 Uni a ino i wanpat tagun a musano, ma lenkutkai ra, a ino i usus a musano. Ikut o God ut a kibin a kum utna rop. 13 Mot ut mot in nuknuk una kum wasiso ri. Pepetlai, i tokodos sur a ino in wararing torom o God, ra ke rakup bat in lorino? Awu. 14 Anundat a nilaun ut i ese dat lena, tu musano ra a iwu na lorino i walos, i ra a utna na maimai toromi. 15 Ikut, tu ino ra a iwu na lorino i walos, i ra anun a minamar. Uni o God i pitar tar a walalos na iwu na lorino toromi, sur in rakup bat in lorino nami. 16 Ra taio in pukus a wasiso ri, anung a minabalu i lenri: Ka met mur tu ngasino gisen, ma a taro rop anun o God una kum tamon kai awu.

17 Uniri an inanos mot nama kum petutna ra mot in muri. Una kum petutna ra an inanos mot nami, kan watung ulabo pas mot. Uni, ra mot ser wan tomo, awu sur mot uwakak mot, awu, mot ban laulau mot kut. 18  1 Kor 1:10-12A mugano utna: A sa longoro tari lena, ra mot ser wan tomo sur a lotu, mot ser tapagol sarara kut, ma a nuki lena a ramano kum wasiso tagun a wasiso ra, i lingmulus. 19 Uni a taro na lotu det in taptapagol ut, sur din tama lele det ra det tokodos ma det kai ra det raro. 20 Ra mot wan tomo, ma mot wangon tomo, mot nuki lena mot wan a inangon anun a Labino, ikut, awu. 21 Uni, ra mot wangon, arara i ngara pas ut nami, sur in nangon mugu, ma ken kis pas ara taro kai. Iri a kibino ra ara taro det murak, ma ara taro det sipak. 22 Pepetlai, kalako kum rumu anumot sur mot in nangon ma mot in inum iai? Pepetlai, ka mot nuk labo pas a taro na lotu anun o God, ma mot ban umaimai det ra det sibo? Asau ra an watungi torom mot? Pepetlai, an watung ulabo pas mot una petutna ri? Awu!

23 Uni a etowo ri a los pasi tan a Labino ma a sa pitar tari torom mot i lenri: Una bung na mirum ra di usobor tar a Labino o Iesu, i los pas a beret. 24 Ra i sa watung wakak pas uni, i tibiki, ma i watungi lenri, “Iri a pining, a pitari sur mot. Mot in ser pami lenri, sur mot in ser nuk melet pas iau.” 25  Kis 24:6-8; Ibr 8:8-13Lenkutkai ra, ra i sa rop a inangon, i los pas a kap ma i watungi lena, “A kap ri, a matok na kunubus tagun a gaping, ra i dat tomo tar a taro nam o God. Mot in pami lenri una kum du bung ra mot inumi, sur mot in ser nuk melet pas iau.” 26 Uni, una kum bung ra mot wan a beret ri, ma mot inum tagun a kap ri, mot wasiso talapor ut una minat anun a Labino, tuk ra in milet.

27  Ibr 10:29I mo ra osi ra in nan a beret anun a Labino, ma in inum tagun anun a kap, ma ke pami nama urur, i pam a sakino una pinin a Labino ma a gapino, ma din warkurai i uni. 28 I wakak ra taio in tama mugu tar anun a nilaun, ra numur in nan a beret ma in inum tagun a kap. 29 Ra taio i wangon ma i inum, ma ke tama lele pas a pinin a Labino, i sa wangon pas ma i sa inum pas ana warkurai na minabalu. 30 Iri a kibino ra a susut epotor tamot det misait ma kalako dekdekin det, ma ara taro kai det sa mat. 31 Ra gunuk dat ut, dat in tama mugu tar anundat a nilaun ra numur dat in nangon ma dat in inum, o God ken pitar a warkurai na minabalu torom dat. 32  Ibr 12:5-6Ikut, ra a Labino i warkurai dat, i ukodos dat, sur gong dat iru una warkurai na minabalu tomo nama rakrakon bual.

33 I mo ra a kum tistising, ra mot wan tomo sur a inangon, mot in kis langlang sur ara taro kai tagun mot. 34 Ra lako taro tagun mot det murak, i wakak ra det in nangon mugu pas ut una nundet a kum rumu, sur gong a warkurai na minabalu anun o God in los mot, ra mot wan tomo.

Ra an nanpat, an pitar melet lako kum wasiso na warkurai torom mot.