1  Mt 5:48Mot in laun elar nama nilaun anun o God, uni mot a kum nutnutun o God, ma i maris doko mot. 2  Ibr 10:10; Kis 29:18Mot in laun nama marmaris, elar nam o Karisito i maris dat, ra i pitar tar anun a nilaun sur dat, elar nama etabor ra i sangnain wakak torom o God.

3 Gong tu pamuk na petutna i kis epotor tamot, gong tu dur na petutna, ma gong kai mot nemnem sur a susut na ululeng. Uni a kum petutna ri ke tokodos sur a tokodos na taro anun o God det in pami. 4 Gong mot watung tu laulau na wasiso, o tu longlong na wasiso, ma gong mot urongon laulau nama kum sakino urongon. A kum wasiso ri ke wakak sur mot in watungi, ikut mot in watung wakak torom o God. 5  1 Kor 6:9-10; Kol 3:5Mot in tasman a utna ri: Det ra det pam a pamuk na petutna, o a kum dur na petutna, o det nem doko a susut na ululeng, ka det in rakon a matanitu anun o Karisito ma anun o God. Uni det ra det nem doko a susut na ululeng, det a kum tene lotu torom a kum torotoro na god, uni a kum ululeng anundet a god. 6  Kol 2:4, 8; Rom 1:18Gong mot madek tar taio sur in toro pas mot nam tu wasiso oros kut. Uni a kum petutna ra, in dat pas a kankan anun o God torom det ra det pitarngat. 7 Lenra, gong mot tur tomo nam det una nundet a kum sakino petutna.

8  Ep 2:13; Kol 1:13; 1 Pit 2:9; Jn 12:36Numugu mot kis una dumirum, ikut uniri, mot kis una talapor uni mot tagun a Labino. Mot in laun elar nama kum nutnutun a talapor. 9 Uni a nilaun anun o naro ra i kis una talapor i wu a wino lenri: a kum wakak na petutna, a kum tokodos na petutna, ma a lingmulusino. 10 Mot in sisio sur a petutna ra a Labino i gas nami, sur mot in pami. 11 Gong mot pam a kum petutna ra a taro tagun a dumirum det ser pami, ra kalako windet. Ikut, mot in upuaso i lena anundet a kum petutna ke wakak. 12 Uni a utna na maimai sakit, ra dat in wasiso una kum petutna ra a kum tene pitarngat det ser pam eno i. 13  Jn 3:20-21Ikut a talapor i upuaso a kum petutna rop sur in nanpat puaso. 14  Ais 26:19; Rom 13:11Uni a talapor in utalapor a kum utna, ra din tama lele det. I mo ra di watungi lenri,

15  Kol 4:5Mot in tamtamabat wakak anumot a ngas na nilaun ra mot laun nami, ma gong mot laun elar nama kum longlong, mot in laun elar nama taro na mananos. 16 Una kum du bung rop, ra i langolango sur mot in pam a wakakino, mot in pami, uni a kum bung ri, a kum laulau na bung. 17 Lenra, gong mot laun elar nama kum longlong, mot in tasman a nemnem anun a Labino.

18  Lk 21:34Gong mot sipak nama wain, uni in ban laulau anumot a nilaun. Ikut, mot in bukus nama Tokodos na Nion. 19  Kol 3:16Ma mot in wasiso etetalai nama kum kelekele tagun a Kum Kelekele anun o Dewid, a kum kelekele na lotu, ma a kum kelekele ra a Tokodos na Nion i tabor mot nami. Mot in kelekele ma mot in rakon lekeleke a Labino nama balamot. 20  Kol 3:17Ma una kum bung rop, mot in watung wakak una kum utna rop torom o God a Tamandat, nama risan anundat a Labino o Iesu Karisito.

21  1 Pit 5:5Mot in unatino pas mot torom mot etetalai, uni mot urur torom o Karisito.

22  Kol 3:18; 1 Pit 3:1Mot a kum nolin na ino, i wakak sur mot in ser unatino pas mot torom anumot a kum musano elar nami ra mot ser unatino pas mot torom a Labino. 23  1 Kor 11:3; Ep 1:22Uni a musano in lorin a kinkinis na nolin, elar nam o Karisito in lorin a taro na lotu, ma det a pinino, ma i anundet a Tene Ulaun. 24 A kum nolin na ino det in ser unatino pas det torom anundet a kum musano una kum utna rop, elar nama taro na lotu det ser unatino pas det torom o Karisito.

25  Kol 3:19; 1 Pit 3:7Mot kai, a kum nolin na musano, mot in ser nem anumot a kum ino, elar nam o Karisito i maris a taro na lotu, ra i pitar tar anun a nilaun sur det, 26  Tai 3:5sur det anun a taro mulus. Ma i rus talapor det nama danim ma anun a wasiso. 27  2 Kor 11:2; Kol 1:22I pami lenri sur in ben pas anun a taro toromi, elar nam anun a wakak na ino ra katu dur uni, ma kalako karkar uni, ma katu sakino utna uni. In tokodos ma katu etakun in losi. 28 Lenkutkai ra, a kum musano det in nem anundet a kum ino elar nami ra det nem a pinindet ut. A musano ra i nem anun a ino, i nemi ut. 29 Katutaio in nget a pinino ut, awu. I ser tamtamabati, ma i ser tabori, elar nami ra o Karisito i pami una nun a taro na lotu. 30 Uni dat a kum du pinin o Karisito. 31  Mt 19:5A Buk Tabu i watungi lena, “Iri a kibino ra a musano in nan gusun o tamano ma o nano, ma in kis tomo nam anun a ino, sur der in takai mukut.” Stat 2:24