13
O God ut i pam pat a gapman
Tai 3:1; Snd 8:15Dat rop dat in unatino pas dat utuntudu ina taro ra det pam ukai a warkurai tagun a gapman. Uni o God ut i pam pat a kum gapman rop, ma katu gapman ra o God ke pam pat tari. I mo ra osi ra ke mur a warkurai anun a gapman, ke mur asau ra o God ut i ubek tari. Ma det ra det pami lenra, det ut det in dat pas a warkurai un det. 1 Pit 2:13-14Osi ra i pam a wakak na petutna ken ngara sur a gapman, ikut osi ra in pam a sakino in ngara ut. Pepetlai, u nemi sur un langolango gusun a nginara sur a mugumugu tagun a gapman? Un pam a wakakino ra in watung ulabo pas ui. Uni o God ut i ukis tari sur i a tultul anunu, sur in pam a wakakino torom ui. Ikut, ra u pam a sakino, un ngara, uni ke pam orosi kut in totok na inaim. A mugumugu tagun a gapman i a tultul anun o God, sur in pitar a warkurai na minabalu torom osi ra i pam a sakino. I mo ra i wakak sur dat in unatino pas dat utuntudu ina mugumugu tagun a gapman. Awu sur i kibino kut uni a mugumugu in pitar a warkurai na minabalu torom dat, i kibino utkai uni a wakak na nuknuk una balandat i inanos dat lena dat in pami lenra.
Mt 22:21I mo ra mot ser pitari kai a takis torom a gapman, uni a kum mugumugu tagun a gapman det a kum tultul anun o God, ma det ser pitar anundet a nilaun una pinapam na tamtamabat a taro. Mot in pitari torom a taro rop asau ra i tokodos sur mot in pitari torom det: Mot in pitar a takis torom det ra det ser los a takis, ma mot in pitar a totokom torom det ra det ser los totokom. Ma mot in urur torom det ra i tokodos sur mot in urur torom det, ma mot in ulabo pas det ra i tokodos sur mot in ulabo det.
Osi ra i nem a taro i sa pam sot pas a kum Warkurai
Mt 22:39-40; Jem 2:8Gong u madek tar anum tu dinau torom taio. Ikut anum ara dinau kut ra kon mana u balu i, i lenri: Un ser nem a taro. Uni osi ra i nem a taro, i sa pam sot pas a kum Warkurai anun o God. Kis 20:13-17; Lo 5:17-19, 21Iri a kum Warkurai anun o God: “Gong u pam a sakino nam tu ino anun taio o nam tu musano anun taio. Gong u um doko taio. Gong u wolong. Gong u nuknuk laulau sur a utna anun taio.” A kum warkurai ri ma a kum warkurai rop kai, ara warkurai kut i pulus bat det. I lenri,
“Un nem o pasam elar nami ra u nem ui ut.” Wkp 19:18
10  1 Kor 13:4-7Osi ra i nem a pasano, ken pam tu sakino toromi. I mo ra osi ra i pami lenra, i pam sot rop pas a kum Warkurai.
11  Ep 5:14; 1 Tes 5:6-7Mot in pami lenra, ma mot in tama lele a kum bung ri. A du bung i sa sot sur mot in tuangun gusun a ininep. Uni, ra dat turpas a nurnur un o Karisito, a bung ra o God in ulaun dat, kabaut i milau mulus, ikut uniri i sa milau. 12  1 Jon 2:8I sa labino mirum pas, ma milau mo in waspi. I mo ra dat in lakro ru i mo a kum pinapam tagun a dumirum, ma dat in emar pas nama kum utna na inaim tagun a talapor. 13  Lk 21:34; Ep 5:18Dat in muri mo a tokodos na petutna, elar nami ra dat laun una waspi. Gong dat sipak, ma dat longlong tuptupukus. Gong dat pam a kum petutna na pamuk, ma a kum utna na maimai. Gong dat taptapagol, ma gong dat nuknuk laulau. 14  Ep 5:11Ikut mot in emar nama nilaun anun a Labino o Iesu Karisito, ma gong mot nuknuk sur tu kisapi sur mot in ugasgas a sakino nemnem ina pinimot.

13:1: Tai 3:1; Snd 8:15

13:3: 1 Pit 2:13-14

13:6: Mt 22:21

13:8: Mt 22:39-40; Jem 2:8

13:9: Kis 20:13-17; Lo 5:17-19, 21

13:10: 1 Kor 13:4-7

13:11: Ep 5:14; 1 Tes 5:6-7

13:12: 1 Jon 2:8

13:13: Lk 21:34; Ep 5:18

13:14: Ep 5:11