4
1 1 Tes 2:19-20I mo ra a kum tistising, mot in tur dekdek una Labino, lenutra a sa inanos tar mot nami. A nem doko mot, ma a nem doko i sur an tama mot, uni mot anung a gasgas ma mot elar nama ikul una nung a pinapam.
A kum wasiso ra in udekdek a taro na nurnur
2 A saring mur o Ewodia ma o Sintike sur in takai kut a nuknuki mur, uni mur anun a Labino. 3 Lk 10:20Ma ui kai ara lingmulus na tene pinapam tomo nam iau, a saring ui sur un warut aru ino ri, uni der papam dekdek tomo nam iau sur a Wakak na Wasiso in nan sarara. Met papam tomo nam o Klemen, ma ara taro kai ra a kum risandet i sa kis una buk na nilaun.
4 Mot in ser gas una kum bung rop, uni mot tagun a Labino. Ma an watung meleti lena, mot in gasgas. 5 Ibr 10:25; Jem 5:8-9Mot in ese puaso anumot a wowowon na petutna torom a taro rop. Milau mukut a Labino in nanpat. 6 Mt 6:25-34; Kol 4:2Gong mot nuknuk doko sur tu utna. Una kum utna rop, mot in wararing nama niaring na watung wakak torom o God. Ma mot in inanosi una numot a kum nemnem. 7 Ais 26:3; Jn 14:27; Kol 3:15Ra a malmal anun o God ra i labo sakit taun a mananos rop anun a taro, in tamtamabat a balamot ma a nuknuki mot, uni mot tagun o Karisito Iesu.
8 A kum tistising, a ururop na wasiso ri a tumusi torom mot: A nuknuki mot in kis una kum utna ri: asau ra i lingmulus, asau ra di urur uni, asau ra i tokodos, asau ra katu dur uni, asau ra i tamtama wakak ma asau ra a taro det watungi lena i wakak. Ra tu utna in wakak sakit, o ra tu utna di watung ulabo pasi, a nuknuki mot in kis uni. 9 Rom 16:20Asau ra mot sa ususer pasi tagun iau, o mot sa rakon pasi, o mot sa longoro tari tagun iau, o mot sa tama tari un iau, mot in muri. Ra o God a tene malmal in kis tomo nam mot.
O Pol i gas nama etabor anun a taro na lotu tiro o Pilipai
10 A gas doko una Labino, uni uniri, mot sa nuk melet iau. I sa suano i ra ka mot warut iau, ikut, a lingmulus, ka mot dumano iau, ikut katu kisapi sur mot in warut iau. 11 Ka watungi lenri, uni a sibo, awu. Uni a sa ulason pas iau, sur an gas una kum sau ra an etoromi. 12 A sa tasman a kinkinis na sibo, ma a sa tasmani utkai a kinkinis nama susut na utna. A sa lason sur an gasgas una a kum ngas na kinkinis ra an etoromi: ra an masur, o an murak, ra a utna in susut tang, o an sibo. 13 2 Kor 12:10A pet lar pas a kum utna rop kibino un o Karisito ra i udekdek iau.
14 Ikut i wakak ra mot tur tomo nam iau una kum mamaut ra a taramo i. 15 2 Kor 11:9Mot a taro Pilipai, mot tasmani lena, ra a turpas a warawai nama Wakak na Wasiso tiro una papor Masedonia, ra numur a wan tagitiro o Masedonia, kalako taro na lotu det tur tomo nam iau sur det in warut iau nam tu etabor, awu, mot sot kut. 16 Ra a kis tong o Tesalonaika, awu sur mot tabor iau ara dino kut, a susut na dino ut mot tabor iau ra a sibo. 17 Awu sur anumot a etabor ra a ling suri. A nemi kut sur mot in los a ikul kura numur una numot a wakak na pinapam ra. 18 A sa los pas a kum utna rop ra mot tula i. I labo sakit, ma i labo taun anung a sibo. Ka sibo mo sur tu utna, uni a kum utna ra mot tula i, a sa los pasi tan o Epaproditus. I elar nama etabor torom o God, ra i sangnain wakak, ra o God i gas nami, ma i tokodos toromi. 19 A God anungi in pam sot a kum utna rop ra mot sibo suri, tagun anun a kum wakak na ululeng ra anundati, kibino un o Karisito Iesu. 20 Dat in ulabo pas anundat a God a Tamandat, ken rop ma ken rop. Amen.
A kum wasiso na marmaris
21 Mot in pitar anung a marmaris torom a taro rop anun o Karisito Iesu. A kum tistising una nurnur ra det kis tomo nam iau, det pitar anundet a marmaris torom mot. 22 A taro anun o God, det rop, det pitar anundet a marmaris torom mot, ma a taro kai anun o God, ra det kis una rumu anun a Sisa, det pitar anundet a marmaris torom mot.
23 A marmaris anun a Labino o Iesu Karisito in kis una niomot. Amen.