1 O Karisito ut i sa ulangolango pas dat, sur dat in langolango mulus. Mot in tur dekdek, ma gong mot madek tar taio sur in ker ukai mot sur mot in elar nama kum tene ititula melet.

2 Mot longoro iau! Iau, o Pol, a inanos mot una utna ri: Ra mot in mulaot pas a warkurai na tinotok talilis, a pinapam anun o Karisito in utna oros mukut torom mot. 3 A wasiso melet torom mot taktakai: Ra mot in mulaot pas a warkurai na tinotok talilis, mot in mur rop a kum Warkurai anun o Moses. 4 Ra mot nemi sur o God in watung mot a kum tene tokodos uni mot mur a kum Warkurai, mot sa kis susuaro gusun o Karisito. Mot sa wan gisen gusun a marmaris anun o God. 5 Ikut dat, una dekdekin a Tokodos na Nion dat kis langlang nama nurnur sur o God in watung dat lena a kum tene tokodos uni dat nurnur. 6  1 Kor 7:19; Gal 6:15Ra kura dat un o Karisito Iesu, ra di tok talilis a pinin taio, o ka di tok talilisi, i a utna oros kut umatan o God. Ara utna kut ra i labo sakit umatan o God, a nurnur ra i pam pat a marmaris.

7 Numugu mot kalabor wakak. Ikut uniri, osi ra i ban lokolokor tar mot, ra ka mot muri mo a lingmulusino? 8 A etowo ri, ra i ban lokolokor tar mot, awu sur tagisapat tan o God, o naro ra i kabo pas mot sur anunu. 9  1 Kor 5:6Mot in nuk pas a wasiso elelar ri: “A lik nat na is kut in pet lar pasi sur in ulabo pas a beret rop.” 10  Gal 1:7; 2 Kor 11:15Ikut iau ut, a nurnur lena a Labino in udekdek mot sur mot in mulaot tomo nam iau. Ma osi ra i sa ban lokolokor tar mot, in taramo i ut a dekdek na warkurai anun o God toromi.

11 A kum tistising, ka ususer meleti mo a taro una tinotok talilis. Iri a kibino ra a taro Juda det ukadik iau. Gunuk ra an ususer utmakai uni, ka det in ukadik iau. Ikut det ukadik iau, uni a ususer a taro sur det in nurnur kut unin nanai kutus anun o Karisito. 12 A nemi sur a taro ra det ususer mot sur din tok talilis mot, det in sil melet pas det ut!

13  1 Pit 2:16A kum tistising, o God i sa kabo pas mot toromi sur mot in langolango mulus. Ikut gong mot nuki lena mot sa langolango sur mot in mur a kum sakino nemnem ina pinimot, awu. Mot in warut etetalai mot nama marmaris. 14  Rom 13:9A kum Warkurai rop anun o God di ubek tomo pas det sur ara warkurai mukut, i lenri: “Un nem o pasam elar nami ra u nem ui ut.” Wkp 19:18

16 Ra uniri, an watungi torom mot lena: Ra mot in mur a Tokodos na Nion, ka mot in mur a kum sakino nemnem ina pinimot. 17  Rom 7:15-23A sakino nemnem ina pinimot i turbat a Tokodos na Nion, ma a nemnem anun a Tokodos na Nion kai i turbat a sakino nemnem ina pinimot. Der waim etetalai, ra ka mot pam lar pas asau ra mot nemi. 18 Ikut, ra a Tokodos na Nion i mugu mot, ka mot kis utuntudu ina Warkurai.

19  1 Kor 6:9-10Dat sa tasman a kum sakino petutna ra a nemnem ina pinindat i ser pami. Iri a kum petutna: A kum pamuk na petutna, a dur na petutna, a nemnem sur a sakino petutna, 20 a lotu torom a kum torotoro na god, a sangsagor, a petutna ra di nget a taro, a engaras, a nuknuk laulau un taio, a kankan, a nemnem sur a kinkinis na labino, a kinkinis sarara ma a tapagol susuaro, 21 a nuknuk laulau sur a utna anun taio, a ininum, a kukuk tuptupukus nama kum longlong na petutna, ma lako kum sakino utna utkai lenra. A sa utumarong mugu tar mot munung, ma uniri a utumarong mot melet lena, a taro ra det ser pam a kum petutna ri, ka det in ruk una matanitu anun o God.

22 Ikut, a Tokodos na Nion i wu a kum petutna ri: A marmaris, a gasgas, a malmal, a kinkinis wowowon, a petutna na warut torom taio, a wakak na petutna, a pam a lingmulus na pinapam, 23 a petutna na urur, a petutna ra taio i tamtamabat wakak anun a nilaun. Katu warkurai in turbat a kum petutna ri.

24  Rom 6:6; Kol 3:5A taro anun o Karisito Iesu, det sak wat a sakino nemnem ina pinindet unin nanai kutus anun o Karisito.

25 Ra a Tokodos na Nion i sa pitar tar a nilaun torom dat, i wakak sur dat in nan tomo nami. 26  Pil 2:3Gong dat uman labino, gong dat ukatutur a balano sungun etetalai, ma gong dat nuknuk laulau etetalai sur tu utna anun taio.