1 A kum tistising, an wasiso torom mot ra mot tasmani ut a kum Warkurai. Pepetlai, ka mot tasmani lena, det kut ra det laun det kis utuntudu ina kum Warkurai? 2 Lenra an wasiso elelar una warkurai na nolin: Ra ara ino i nolin, a warkurai na nolin i ker tomo der nam anun a musano, ra a musano i laun utmakai. Ikut ra anun a musano i sa mat, a ino i sa langolango gusun a warkurai na nolin. 3 I mo ra a ino, ra in nolin melet nam tu musano, ma anun a musano i laun utmakai, a ino ra i pam a sakino. Ikut ra anun a musano i sa mat, a ino ra i langolango gusun a warkurai na nolin, ma ra in nolin melet nam tu musano, awu sur i pam a sakino.

4  Rom 6:2, 11Lenkutkai ra torom mot, a kum tistising, ra o Karisito i mat, mot kai mot mat tomo nami. I mo ra mot kai mot langolango gusun a kum Warkurai, sur mot tagun ara gisen, o Karisito, i ra i sa katutur melet gusun a minat. Dat tagun o Karisito, sur dat in wu a windat sur o God in gas nami.

5 Numugu anundat a nilaun i kis utuntudu ina dekdekin a sakino nemnem ina pinindat, ra a kum Warkurai i ukatutur pat a kum sakino nemnem sur dat in pam a sakino petutna. Ra a sakino petutna una nundat a nilaun i pitar a minat kut. 6  Rom 8:2; 6:4Ikut uniri, dat mat gusun a kum Warkurai ra i ker ukai dat numugu. Ma di sa ulangolango pas dat gusun a dekdekin a Warkurai, ma dat papam torom o God nama matok na kisapi, ra a Tokodos na Nion i pitari torom dat. Awu sur i elar nama mugano kisapi, ra dat muri kut a kum Warkurai ra di tumus tari.

7  Kis 20:17; Lo 5:21I mo ra asau mo dat in watungi? Pepetlai, a kum Warkurai a sakino petutna? Awu ut! Ra katu Warkurai, kan tasmani kai a sakino petutna. Lenri, ra o God ken watung tari una kum Warkurai lena, “Gong u nuknuk laulau sur a utna anun taio,” kan tasmani kai lena, a nuknuk laulau sur a utna anun taio i a sakino petutna. 8 Ikut a sakino petutna i sio pas a kisapi tiro korot una warkurai ra, sur in pam pat tar a kum wur ngas na nemnem sur a nuknuk laulau sur a utna anun taio. Ikut ra katu Warkurai, a sakino petutna katu dekdekino.

9 Ra ka tasmani utmakai a kum Warkurai anun o God, a laun. Ikut ra a sa tasman a kum Warkurai, a sakino petutna i laun pat unin balang, ra a mat. 10 A kum Warkurai ra o God i pitar tari sur in pitar a nilaun tang, i pitari kut a minat tang. 11  Stat 3:13Uni a sakino petutna i sio pas a kisapi tiro korot una Warkurai sur in toro pas iau, ra una dekdekin a Warkurai i um doko iau.

12  1 Tim 1:8I mo ra dat tasmani lena, a Warkurai katu dur uni, ma a kum du wasiso na Warkurai rop katu dur un det, det tokodos, ma det wakak. 13 Pepetlai, a utna ra i wakak i um doko iau? Awu ut! A sakino petutna i um doko iau. A sakino petutna i papam nama kum wakak na wasiso na Warkurai, ra i pitar a minat tang, sur in talapor lena a ngas na petutna ri i laulau. Una kum Warkurai dat tama lele pasi lena, a sakino petutna i laulau doko.

14 Dat tasmani lena, a kum Warkurai anun o God, a kum utna na nion. Ikut iau a musano kut taginin upiso, ma a sakino petutna i ker tar iau sur an tene ititula anunu. 15  Gal 5:17Ka talapor un asau ra a ser pami. Uni asau ra a nemi sur an pami, ka pami, ikut asau ra a ngeti, a ser pami. 16 Ra a ser pam asau ra ka nem na pami, i ese i lena a mulaot lena a kum Warkurai anun o God i wakak. 17 I mo ra awu sur iau mo a pam a kum utna ri, awu. A sakino petutna ut ra i laun un iau i pami. 18 A tasmani lena katu wakak na utna kuri i laun un iau. A wasiso lenra una sakino nemnem ina pining. Uni, a nemi ut sur an pam a wakakino, ikut ka pet lar pasi. 19 Uni, ka pam asau ra i wakak, ra a nemi sur an pami. Ikut a sakino petutna ra ka nemi sur an pami, i ra a ser pami. 20 Ra a ser pam asau ra ka nemi sur an pami, awu sur iau mo a pami, a sakino petutna ra i laun un iau, i ser pami.

21 A tama ara ngas na dekdek kuri una nung a nilaun, lenri: Ra a nem na pam a wakakino, a sakino kut i wanpat. 22 Una nuknuking a nem doko a kum Warkurai anun o God. 23  Gal 5:17; 1 Pit 2:11Ikut, una kum du pining a tama i kai ara se ngas na dekdek, ra ke mur a Warkurai anun o God. I waim tomo nama wakak na warkurai kuri una nuknuking, ma i ker ukai iau sur an kis una karabus anun a sakino petutna, ra i ser papam una kum du pining. 24 Iau a pot na marmaris na musano iau! Osi in ulangolango iau gusun a pining ri, ra i wan sur a minat? 25  1 Kor 15:57O God ut. A watung wakak toromi ra i tulu ru o Iesu Karisito anundat a Labino, ra i ulangolango pas iau.

I mo ra iau ut, una nuknuking, iau a tene ititula anun a kum Warkurai anun o God, ikut, ra a mur a sakino nemnem ina pining, iau a tene ititula utuntudu ina dekdekin a sakino petutna.