A Pas anun o Pol torom a taro
Galesia
A wasiso talapor mugu
O Pol i tumus a buk ri torom a taro ra det kis una kum tamon tong una papor Galesia. Numugu o Pol i wan tuptupukus una kum tamon tong o Galesia ma i warawai nama Wakak na Wasiso torom det. A taro na lotu tong o Galesia awu sur det a taro Juda, ra o Pol i inanos det lena, ra det in nurnur kut un o Iesu, o God in ulaun pas det. Ma katu kisapi melet mo sur o God in ulaun pas det uni.
Numur a taro Juda det wanpat ma det watungi lena a wasiso anun o Pol ke tokodos. Det watungi lena a taro na nurnur det in mur a kum Warkurai anun o Moses, sur det in tokodos umatan o God. Det watungi lena din tok talilis a taro na nurnur rop. A tinotok talilis, a ukinalong sur det in elar nama taro Juda ra det in mur rop a kum Warkurai anun o Moses ma anun a taro Juda. Ra o Pol i longoro i, i kankan doko. I watungi lena, ra gunuk dat tokodos uni dat mur a kum Warkurai anun o Moses, a minat anun o Iesu in utna oros kut, ma ken pet lar pasi sur in unus ru anundat a kum sakino petutna. O Pol i wasiso dekdek torom a taro Galesia una buk ri. I nemi sur det in nan gisen gusun a kum etowo anun a kum torotoro na tene ususer, ma det in nurnur kut un o Iesu.
A inawan ina Pas Galesia:
Ara Wakak na Wasiso kut (1:1-10)
O Pol i wanpat a aposel mulus (1:11-2:21)
O God in ulaun dat kibino una nundat a nurnur kut un o Iesu, awu sur i kibino ra dat mur a kum Warkurai (3:1-4:31)
Dat langolango gusun a dekdekin a sakino petutna ma dat in mur a nemnem ina Tokodos na Nion (5:1-6:10)
A ururop na wasiso anun o Pol torom det (6:11-18)
1
1 Iau o Pol, a aposel, a tumus a pas ri torom mot. Katutaio taginin upiso i pilok pas iau sur an aposel, ma awu sur a taro kai det tulu iau sur an pam a pinapam ri. O Iesu Karisito ut ma o God o Tamano der tulu iau, o God ra i ukatutur melet pas o Iesu gusun a minat. 2 A kum tistising rop ra met kis tomo nin, det mulaot tomo nam iau sur an tumus a pas ri torom mot, a kum tene nurnur rop tiro una papor Galesia.
3 A marmaris ma a malmal tan o God a Tamandat ma a Labino o Iesu Karisito in kis tomo nam mot. 4 Gal 2:20O Iesu i ubek ru anun a nilaun una anundat a kum sakino petutna, sur in ulaun dat gusun a kum sakino petutna ra a taro det pami una kum kilalo ri. I elar nama nemnem anun anundat a God a Tamandat. 5 Dat in ulabo pasi ma ken rop. Amen.
Ara Wakak na Wasiso kut
6 A kisin doko lena, ke suano i ra mot sa wan gisen pas gusun o God, i ra i kabo pas mot una marmaris anun o Karisito. Ra uniri, mot sa tupukus sur a se etowo. 7 Ap 15:1, 24A etowo ra, awu sur a Wakak na Wasiso. Ara taro det ulokolokor a nuknuki mot ma det lari sur det in pukus a Wakak na Wasiso anun o Karisito. 8 1 Kor 16:22Ikut ra met ut, o tu ensel kai tagisapat una langit in warawai nam tu se etowo, ra ke elar nama Wakak na Wasiso ra met sa warawai taru nami torom mot, i wakak ra in iru tukum una warkurai anun o God. 9 A sa inanos mugu tar mot, ma iri an watung meleti lena, ra taio in warawai torom mot nam tu etowo ra ke elar nama Wakak na Wasiso ra mot sa utur ukai pasi, i wakak ra in iru tukum una warkurai anun o God!
10 1 Tes 2:4Ka nemi sur a taro det in ulabo pas iau, a nemi sur o God ut in gas nam iau. Ka nem na ugasgas a taro kut. Ra an ugasgas a taro kut, awu sur iau a tultul anun o Karisito.
O God ut i kabo pas o Pol
11 Mt 16:17A kum tistising, a nemi sur mot in tasmani lena a Wakak na Wasiso ra a warawai nami, awu sur a etowo ra tan a taro taginin upiso. 12 Ka losi tan a taro, ma katu musano kai i ususer iau nami. O Iesu Karisito ut i upuaso tari tang.
13 Ap 8:3Mot sa longoro tar anung a ngas na nilaun tagitiro numugu, ra a tur dekdek una lotu Juda, ma a ser ban laulau a taro na nurnur anun o God, ma a lari sur an kamar ru det. 14 Ap 22:3A tur dekdek una lotu Juda, ma anung a mananos una lotu i labo taun det rop ra anumet a kilalo i elar. A dekdek doko sur an mur wakak a kum petutna anun a taro Juda tagun numugu. 15 Ais 49:1; Gal 2:7Ikut, o God i sa pilok tar iau, ra ka di usus iau utmakai, ma una nun a marmaris, i kabo pas iau. Ma i nemi 16 sur in upuaso o Iesu a Nutunu torom iau, sur an warawai nami torom a taro ra awu sur a taro Juda. Katu musano i ususer iau uni. 17 Ma ka wan usapat o Jerusalem sur det ra det sa aposel mugu tang det in ususer iau, awu. A wan mut utong o Arebia, ra numur a milet melet sur a tamon Damaskus.
18 Ap 9:26Ra a tulu kilalo i sa rop, a wan maragom usapat o Jerusalem sur an tama o Pita, ma a kis tomo nami a noino ma limo na bung. 19 Ka tama a ramano kum aposel kai, o Pita kut der nam o Jems a tisin a Labino. 20 Tama i! A liliman umatan o God lena a utna ri a tumusi torom mot i lingmulus ut, ka toro!
21 Ap 9:30Numur a wan utong una papor Siria, ma una papor Silisia. 22 Ikut a taro na lotu anun o Karisito tong una papor Judia ka det tasman iau. 23 Det longoro i kut a taro ra det wasiso puaso un iau lena, “A musano ra i nem na ban laulau dat, uniri i warawai mukut nama petutna na nurnur, ra numugu i nem na kamar tari.” 24 Ra det watung ulabo pas o God uni i papam una nung a nilaun.