13
O Pol i utumarong det
1 Mt 18:16; 1 Tim 5:19Uniri a mantul na inawan ra an nan torom mot. Ma di sa tumus tari una Buk Tabu lena, “Ra lako ru o lako tul anundetul a wasiso i takai kut un tu utna, anundetul a wasiso i lingmulus.” Lo 19:15
2 Una nung a manru na inawan pat torom mot, a sa utumarong tar mot una numot a kum sakino petutna. Ma uniri ra a kis gisen, an inanos melet mot ut una utna ri: Numur, ra an nanpat tiro, an wasiso dekdek torom det ra kabaut det nukpukus gusun anundet a kum sakino tagun numugu, ma osi kai ra i pam a sakino. 3 An wasiso lenri, uni mot nemi sur an ese i lena, o Karisito i wasiso torom mot nama anung a wasiso. O Karisito a pinino ke ser ngoro, awu, i ser papam nisamot nama dekdek. 4 Pil 2:7-8I lingmulus, ra di sak wat o Karisito unin nanai kutus, katu dekdekino. Ikut una dekdekin o God, i laun melet. Lenkutkai ra kalako dekdeki met tomo nam o Karisito, ikut met laun tomo nami nama dekdekin o God, sur met in papam torom mot.
5 1 Kor 11:28Mot in tama wakak anumot a nilaun, ra anumot a nurnur i lingmulus o awu. Mot tasmani lena, o Karisito Iesu i kis un mot, niko? Ra awu, anumot a nurnur ke lingmulus. 6 A nurnur lena mot in tasmani kai lena, o Karisito i kis un met. 7 Uniri, met wararing torom o God sur gong mot pam tu sakino. Ka met wararing lenra, sur a taro det in tama i lena, anumet a pinapam i wanpat mulus, awu. Met nemi sur mot in pami kut a utna ra i tokodos. Ra a taro det in nuki lena anumet a pinapam ke wanpat mulus, i wakak kut. 8 Ka met in pam tu utna ra in turbat a lingmulusino, awu, met in muri kut. 9 Ra mot dekdek ma met kalako dekdeki met, met gas kut. Ma met wararing sur mot in tokodos una numot a nurnur. 10 2 Kor 10:8Iri a kibino ra a tumus a kum utna ri torom mot ra ka wanpat utmakai. Ra an nanpat, kan wasiso nama dekdek na wasiso torom mot, ma kan kuro mot nama warkurai ra a Labino i sa pitar tari tang. I pitar tari tang sur an udekdek mot nami, awu sur an ban laulau mot nami.
A ururop na wasiso
11 Anung a ururop na wasiso mo ri: A kum tistising, mot in gas! Mot in ukodos mot, mot in mur anung a wasiso, in takai kut a nuknuki mot, ma mot in kis na malmal etetalai. Ra a God na marmaris ma a malmal in kis tomo nam mot. 12 Ra mot etorom, mot in nem etetalai mot nama egom na marmaris, ma mot in pami nama tokodos na petutna.
13 A taro rop anun o God ra det kis tomo nam iau, det pitar anundet a marmaris torom mot.
14 A marmaris anun a Labino o Iesu Karisito, ma a marmaris anun o God, ma a kinkinis tomo anun a Tokodos na Nion in kis tomo nam mot rop.