1  1 Kor 2:3A ramano taro det watungi lena, ra a kis torom mot, ka ser wasiso dekdek, ikut ra a kis gisen anung a wasiso i dekdek sakit. Iau, o Pol, a saring mot sur mot in longoro iau, uni o Karisito i unatino pasi, ma i papam nama wowowon na magirano torom a taro. 2  1 Kor 4:21Ra an nanpat torom mot, i topasi kut sur an ukodos mot nama kum dekdek na wasiso. Ikut ka nemi. Ara taro tagun mot det watungi lena, met muri kut a petutna tagun a rakrakon bual. Ra a saring det, sur det in mana gusun a ngas na wasiso ra, sur gong a wanpat nama kum dekdek na wasiso torom det. 3 A lingmulus, met laun una rakrakon bual, ikut ka met waim elar nama ngas na inaim tagun a rakrakon bual. 4  Ep 6:13-17Uni a kum utna na inaim ra met waim nami, awu sur anun a rakrakon bual, awu. A kum dekdek na utna na inaim anun o God, ma det dekdek sakit sur met in rege a kum dekdek na woro nami anun a ebar. 5 Met kamar ru a kum torotoro na wasiso ra a taro det uman labino nami, sur det in turbat a taro sur gong det tasman o God. Ra met dat pukus a nuknukin a taro, sur det in mur a wasiso anun o Karisito. 6 Met langlang mot sur mot in mur rop a wasiso anun o Karisito, ra numur met in waninar sur met in warkurai det ra det pitarngat.

7 Mot in tama wakak a kum utna! Ra taio i nuki lena, i anun o Karisito, i wakak sur in nuknuk wakak ma in tama lele i lena, met kai anun o Karisito. 8  2 Kor 13:10Ra met ser warango pas met una numet a kinkinis na mugumugu ra a Labino i sa pitar tari tamet, ka met maimai. Uni i sa pitar tari, sur met in udekdek mot nami, ma awu sur sur met in ban laulau mot. 9 Ka nemi sur an ungara mot nam anung a kum pas. 10 Uni a ramano taro det watungi lena, “Una nun a kum pas anun a wasiso i maut ma i dekdek, ikut ra i ut i kis tomo nam met, anun a wasiso i utna oros kut, ma ke maut.” 11 I wakak sur det in tasmani lena, anumet a kum dekdek na wasiso ra det ser luki una numet a kum pas, ra ka met kis nisandet, met in pam sot pasi ut, ra met in nanpat tiro.

12 Ka met ser elaro met nam det ra det watungi lena, det labo sakit. Det elaro etetalai det melet ut. Ka det mananos! 13  Rom 12:3Ikut met, ka met in warango pas met una kum utna gisen, met in warango pas met kut una pinapam ra o God i pitar tari tamet. A pinapam na warawai ra i wan tuk una numot a tamon. 14 Ka met warango pas met un tu pinapam ra ka met pam tari, uni met wanpat ut torom mot nama Wakak na Wasiso un o Karisito. 15 Ma ka met warango pas met kai, un tu pinapam, ra a taro gisen det sa pam tari. Ikut met nurnur lena, ra anumot a nurnur in lubung, anumet a pinapam kai epotor tamot in lubung, 16 sur met in warawai kai nama Wakak na Wasiso torom a kum tamon kusa numugu tamot, ra kataio utmakai i warawai iai. Uni ka met nemi sur met in warango pas met, una pinapam ra ara gisen ut, i sa pam tari. 17  1 Kor 1:31A Buk Tabu i watungi lena, “Osi ra i nemi sur in warango pas taio, i wakak sur in warango pas a Labino.” Jer 9:24