1 Ra i sa rop a kum utna ri, o Pol i wan tagitong o Atens utong o Korin. 2  Rom 16:3Tiro iai der etorom pas nama ara te Juda, a risano o Akuila. I tagitong o Pontus, ma anun a ino, a risano o Prisila. Ke suano i kut ra der wanpat taru tagitong o Itali, uni a Sisa Klaudius i pitar tar a warkurai, sur a taro Juda rop det in nan gusun o Rom, i ra a labino tamon tong o Itali. Ra o Pol i wan torom der. 3  Ap 20:34I kis nisan der ma detul papam tomo, uni detul a tulu tene pam rumu na sel. 4 Una kum Bung na Sabat i wasiso tomo nam det una rumu na lotu anun a taro Juda, sur in ukatutur a nuknukin a taro Juda, ma det kai ra awu sur a taro Juda, sur det in nurnur un o Iesu.

5  Ap 17:14-15Ra o Sailas ma o Timoti der wanpat tagitong una papor Masedonia, o Pol ke mana nama warawai nama wasiso anun o God, ma i upuaso i torom a taro Juda lena, o Iesu i a Karisito ra o God i tulu ru i urin. 6  Ap 13:46, 51; 20:26Ikut a taro Juda det wasiso batbat o Pol ma det watung a kum sakino wasiso uni. Ra o Pol i tutupu anun in namalu, a ukinalong lena, in rosumur gusun det. Ma i watungi tandet lena, “Ra mot in iru una warkurai anun o God, i kibino un mot ut, ma iau, a langolango. Turpasi uniri, an nan mukut torom det ra awu sur a taro Juda.”

7 I pirso gusun a rumu na lotu, ra i ruk una rumu anun ara musano, a risano o Titius Jastus, i ara tene lotu torom o God. Anun a rumu i tur milau nisan a rumu na lotu. 8 O Krispus, ara mugumugu tagun a rumu na lotu, ma det rop kai, ra det kis una nun a rumu, det nurnur una Labino. Ma a susut na taro Korin, ra det longoro a warawai anun o Pol, det nurnur, ma di baptaiso det.

9  Jos 1:9; Ais 41:10Ara bung na mirum a Labino i wasiso torom o Pol una tamtama lenri, “Gong u ngara. Ma gong u mana nama wasiso. 10 Uni an kis tomo nam ui, ma kataio in ban laulau ui, uni anung a susut na taro kuri una tamon ri.” 11 Ra o Pol i kis tiro iai ara kilalo ma a wonom na kalang, ma i ususer det nama wasiso anun o God.

12 Una kilalo ra o Galio i mugumugu tagun a gapman tong una papor Akaia, a taro Juda det tur tomo sur det in um o Pol, ma det beni sur in tur una warkurai. 13 Ma det takuni lena, “A musano ri i lari sur in pukus a nuknukin a taro sur det in lotu torom o God nama ngasino ra ke elar nama kum warkurai anumet a taro Juda.” 14 Ra o Pol i ling sur in wasiso, o Galio i watungi torom a taro Juda lena, “Mot a taro Juda, ra a utna ri i pami i laulau, ma ke mur a warkurai anun a gapman, in tokodos sur an longoro mot uni. 15 Ikut, ra mot takuni kut una kum wasiso, ma una kum rising, ma una anumot a kum warkurai ut, i wakak sur mot ut mot in warkurai i. Iau kan warkurai i una kum ngas na utna ri.” 16 Ra i lakro ru det gusun a kinkinis na warkurai. 17 Ma det rop det pam ukai pas o Sostenes, a mugumugu tagun a rumu na lotu anun a taro Juda, ra det umi umatan a kinkinis na warkurai. Ikut o Galio ke nuk pas a utna ra.

18  Nam 6:18; Ap 21:24Ra o Pol i sa kis suano pasi tong o Korin, i wan gusun det ra det tar tistisino una nurnur, ma i wan utong o Senkria. Tiro iai, di kumur rop ru a iwu na lorino, sur in ese i lena, i sa pam sot pas anun a liliman torom o God. Ra detul nam o Prisila ma o Akuila detul kas una sip utong una papor Siria. 19 Ra detul sot tong o Epeses, o Pol i wan pas gusun der tiro iai, ra i ruk una rumu na lotu, ma det wasiso tomo nama taro Juda. 20 Det saringi sur in kis suano lilik pasi tomo nam det, ikut ke mulaot. 21 Ra det wan susuaro, i watungi tandet lena, “Ra a nemnem anun o God, an milet melet torom mot.” Ra i kas una sip ma i wan gusun a tamon Epeses.

22 Ra i sot tong o Sisaria, i wan usapat o Jerusalem sur in lumu tar a taro na lotu, ra numur i wan utong o Antiok. 23 Ra i sa kis pas a susut na bung tiro iai, i wan melet pas gusun det. Ra i wan tuptupukus una kum tamon una ru papor Galesia ma o Pirigia, ma i udekdek a nurnur anun a taro na ususer rop.

24 Ara te Juda tagitong o Aleksanderia, a risano o Apolos, i wanpat tong o Epeses. I ara wakak na tene wasiso, ma i mananos doko una Buk Tabu. 25 Di sa ususer tari una Kisapi anun a Labino, ma i gas doko sur in warawai. I ususer tokodos det un o Iesu, ikut i tasmani kut a baptais anun o Jon. 26 I ruk una rumu na lotu, ra i turpas a wasiso ma ke ngara. Ra o Prisila ma o Akuila der longoro i, der ben pasi, ma der palos wakak a Kisapi anun o God toromi. 27 Ra o Apolos i nem na wan mo utong una papor Akaia, det ra det tar tistisino una nurnur tong o Epeses, det uragot tari, ma det tumtumus torom a taro na ususer tong o Akaia, sur det in gas pasi. Ra i wanpat tong una papor Akaia, i ara wakak na tene warut torom a kum tene nurnur. Det ra det sa nurnur, kibino una marmaris anun o God. 28  Ap 9:22I balu dekdek a wasiso anun a taro Juda umatan a taro, ra i ulingmulusi nama wasiso na Buk Tabu lena, o Iesu ut a Karisito.