A Munaur a Pas
ane Pol tetek a tarai
Korin
A warwara talapor nigo
Te na pas ne e Pol i tumtumus ulak tetek a tarai Korin, ning i kes tumo na papar Masedonia. Ting na nuna ningnigo na pas i warwara rakrakai tetek la ana nunla na toltol. Lamur i sune sen e Taitus uting ia. Ning e Taitus i ulak tetek e Pol, i atai i mang a tarai Korin la ka lingir a nuknukinla. Ika dingla na tarai la nuki mang e Pol bel a aposel momol.
Te na pas ne e Pol i warwara ana diat a utna: A ningnigona, e Pol i gas anasa la lingir a nuknukinla. A munaurna, i warwara ulak ana Wakak a Warwara. Pa munatolna, i atai la mang lar sang anunla na artabar tetek a kapan a taraila. A mundiatna i warwara talapor tetek la mang ai a aposel momol ane Iesu.
A tinan ana Munaur a Buk Korin:
A kamkama buk ne (1:1-11)
A titol ane Pol tetek a tarai (1:12—7:16)
A artabar tetek a tarai a tortorot saot e Jerusalem (8:1—9:15)
E Pol a aposel momol (10:1—13:10)
A ararop a warwara ane Pol tetek a tarai Korin (13:11-13)
1
1 Iau e Pol, a aposel anun e Karisito Iesu ana nuknuk e God, miau ma e Timoti a tasindala, mia tumus a pas ne tetek mulo a tarai a lotu ane God tingia e Korin, pa tarai rop ane God ting na papar Akaia.
2 A marmaris pa balmolmol ta e God a Tamandala pa Leklek e Iesu Karisito ir kes taum omulo.
E God a tena armoro
3 1:3 Rom 15:5Dalar atong aleklek pas e God a Taman a Leklek anundala e Iesu Karisito, pa Tamandala otleng, ning a tena marmaris, pa kamkama ngas a armoro rop. 4 I sira amoro mila ana mamahatla rop ning mila kilangi, sur mila otleng milar amoro a tarai ning la kilang a mamahatla, ana armoro ning e God i saran tari tetek mila. 5 1:5 Buk Song 34:19A tnan kankan ning e Karisito ka kilang tari, i pulpulas omila pa mila otleng mila kilangi. Larka otleng ning, oe Karisito, a amoro ane God i pulpulas omila. 6 Mila kilang a mamahatla, sur mulor los a arnangai ono, pa sur e God ir alaun mulo. Pa ning e God ir amoro mila, mulo otleng mulor kilangi, pa ir arakrakai mulo sur mulor tur rakrakai ana ngas a kankanla ne mila kilangi. 7 Mila tortorot momol omulo mang mulor tur rakrakai ot, anasa mila tasmani mang, mulo kilang a kankan taum omila, larka otleng ning, mulor kilang a armoro ane God taum omila.
8 1:8 Aposel 19:23; 1 Korin 15:32Na tastasimila, mila mang sur mulor tasman a kankanla ning mila kilangi ting na hananuala tumo na papar Esia. Mila kilang a tnan mamahat kol. Bel ma mila rakrakai pa bel ma mila nuki mang milar laun. 9 A momolna, mila nuki mang mila kar mat. A utna ne i hanot sur gong mila tortorot ana rakrakaimila ot, milar tortorot ka oe God, esaning i sira akamtur a minatla. 10 1:10 2 Timoti 4:18E God i alaun pas mila ning milau milar mat, pa ir alaun ulak mila. Pa mila tortorot mang ir alaun pas mila ana pukakiarla rop kaning lanigo, 11 ning mulor nangan mila ana niaring. I maining a galis a tarai lar atong wakak tetek e God omila, anasa i maris mila pa i longor anunla na niaringla.
E Pol i lingir a nuknukna ana nuna tinan
12 Ine a utna ning mila iaunan mila ono, a nuknukimila bel i sira tiu mila ana ta utna, anasa mila tasmani mang, mila mur ot a tostos pa totoh a toltol ta e God, ning mila laun na arpotor a tarai mite lapiu, pa mila rakrakai sur milar mur a toltol ne, ning mila kes taum omulo. Bel ma mila mur a tastasmai anuna tarai, mila titol murmur ot a marmaris ane God. 13-14 1:13-14 2 Korin 5:12; Pilipai 2:16Mila tumtumus ka tetek mulo ana ututnala ning mulor was lar pasi, pa mulor talapor ono. Mulo ka talapor siklik omila, ika a tortorot mang lamur mulor talapor wakak omila. I maining ana pukakiar ning a Leklek ir hanot ulak, mulor iaunan mila, arlar omila, milar iaunan mulo.
15 1:15 1 Korin 16:5-6A tortorot mang mulor gas omila, pa ine a kamkamna ning lanigo a atai tar mulo mang ar hanot tetek mulo ana ningnigo na tinan, pa lamur ar hanot ulak ana munaur a tinan, sur ar saran munaur a arnangai tetek mulo. 16 A nuki mang ar geren tar mulo, ning ar han utumo na papar Masedonia. Lamur, ning ar ulak mitumo, ar kes ulak pas napirimulo, sur mulor nangan iau ana nuk a tinan usaot na papar Judia. 17 Ika bel a hanot. Mangasa, ning bel a hanot, mulo nuki mang, a nuknuk oros ka ana nuk a tinan ot tetek mulo? Mangasa, ngandek anuk na warwara i arlar ana tarai te na rakrakan hanua ning la malmaling on ta utna, ika bel la toli? Iau, bel a manglarning.
18 E God i momol, larotleng ning anumila a warwara i momol. Ning mila malmaling, a kamkamna mang milar tolsot pasi. 19 1:19 Aposel 18:5Iau, e Sailas pa e Timoti, mitol warawai tetek mulo oe Iesu Karisito, a Nat e God. E Karisito bel i sira malmaling pas pa lamur ir puai. Ir tolsot pas ot anuna warwara. 20 1:20 Tatatai 3:14Anasa e Karisito i tolsot pas a lelela rop ane God. Pa oe Karisito ka, dala tolsot pasi sur dalar atongi mang, “Amen,” pa dalar atong aleklek pas e God onoi. 21 E God ka, i atur rakrakai mila, pa mulo otleng oe Karisito. I aslang pas dala sur dala anuna tarai ot, 22 1:22 Epeses 1:13-14; 2 Korin 5:5i suah tar anuna akinalang ondala sur ir talapor mang dala anunai ot. Pa i akes a Inguna te na balandala arlar ana akinalang ning i asangani mang lamur dalar kibas a ututnala ning e God ka sang tari sur dala.
23 A nunung e God sur ir apuasa i mang a atong a momolna. Bel a han ulak tetek mulo to e Korin, anasa bel a mang sur a nuknukimulo ir mamahat onal rakrakai a warwara ning kar atongi tetek mulo. 24 1:24 1 Pita 5:3Bel mila mang sur milar warkurai sur anumulo a tortorot. Mila mang ka sur milar titol taum omulo, sur mulor gas, anasa mulo ka tur rakrakai ana tortorot.
1:5: 1:5 Buk Song 34:19
1:8: 1:8 Aposel 19:23; 1 Korin 15:32
1:10: 1:10 2 Timoti 4:18
1:13-14: 1:13-14 2 Korin 5:12; Pilipai 2:16
1:15: 1:15 1 Korin 16:5-6
1:19: 1:19 Aposel 18:5
1:20: 1:20 Tatatai 3:14
1:22: 1:22 Epeses 1:13-14; 2 Korin 5:5
1:24: 1:24 1 Pita 5:3