A Pas ane Pol tetek a tarai
Epeses
A warwara talapor nigo
E Pol i kes ting na rumai a dodot tumo e Rom anasa i warawai ana Wakak a Warwara. Ning i kes tingia, i tumus diat a pas. Takai tetek a tarai Epeses, takai tetek a tarai Pilipai, takai tetek a tarai Kolosi pa takai otleng tetek e Pilimon.
I tumus a pas ne tetek a tarai a lotu tumo e Epeses sur lar wasi pa lamur lar sarani tetek a tarai masik.
E Epeses takai a tnan hanua ting na papar Esia. A tarai miting na hanua ning la mang kol sur a mani, pa la sira lotu tetek a asasong na god di atongi e Artemis. La tol takai a tnan rumai lotu ane Artemis (oroi Ap 19:17).
Ana munaur a tinan ane Pol i warawai tetek a tarai Juda ning la kes tumo e Epeses (oroi Ap 18:18-21). Pa lamur ana nuna munatol a tinan i han ulak utumo e Epeses pa i kes tumo natol a rau pa i asaer a taraila ning la lingir a nuknukinla pa la tortorot o e Iesu (oroi Ap 19). Dingla na tarai a tortorot la na te Judiala, pa dingla na tarai bel. E Pol i asaer la mang o e Iesu Karisito dala takai ka, a tarai Juda taum ana tarai masik otleng. I asaer la ana natola warwara larlar ana tarai tortorot mange:
Dala arlar ana palaona ning a barsan, pa e Iesu a pukulundala.
Dala arlar otleng ana rumai lotu ane God, pa e Iesu a hat kes ning a kidol a rumai ir tugus wakak onoi,
Dala arlar ana hane ning di sangi sur ir taulai.
A tinan ana buk Epeses:
A kamkama buk ne (1:1-2)
Dala takai ting o e Karisito (1:3-3:21)
A kes taum anuna tarai a tortorot (4:1-16)
A tona lalaun o e Karisito (4:17-5:20)
Dalar anatarna artalai tetek dala (5:21-6:10)
A mermer a harum kaning o e Karisito (6:11-20)
A ararop na warwara ane Pol tetek a tarai Epeses (6:21-24)
1
1 Iau e Pol, aposel ane Karisito Iesu ana nuknuk e God. A tumus a pas ne tetek mulo a tarai ane God, ning mulo kes tingia e Epeses, ning mulo na momol a tena tortorot o e Karisito Iesu.
2 A marmaris pa a molmol ta e God a Tamandala pa a Leklek e Iesu Karisito ir kes tetek mulo.
O e Karisito, e God i angis dala
3 Dalar atong leklek pas e God, a Tamana e Iesu Karisito anundala Leklek. I angisngis dala ana ututnala rop misaot na langit sur ir nangan a ingundala, ning dala kaning o e Karisito. 4 E God ka aslang pas dala, ning dala ane Karisito, nating ot ning belot i akes a rakrakan hanua, sur dala totoh, pa bel dir arup sot pas dala on ta rongo namatana.
5 Ana nuna marmaris, nating ot ka aslang dala sur ir ras pas dala sur dala natnatnala, ning dala kes o e Iesu Karisito. Ana nuknukna ot pa ana nuna gasgas i toli larne. 6 Pa dalar atong aleklek pas e God ana nuna wakak a marmaris, ning ka tabar oros dala onoi, o e Natnalik ning i katnan koli. 7 Pa ning dala kaning o e Karisito, a sulukna i lou alangolango pas dala, pa e God i kepsen anundala na toltol laulaula. A marmaris ane God i itna kol, 8 ning i sira tabar mokos dala onoi, taum ana tastasmai rop pa wakak a nuknuk.
9 E God i apuasa dala ana ututnala ning ir toli, ning nating i mumun, pa ir tolsoti o e Karisito. Ana ututnala ne i mur ot a nuknukna, pa i gas suir toli. 10 A nuknukna i mange: Ir dat taum a ututnala rop saot na langit pa te na rakrakan hanua, sur la rop lar kes nahai a warkurai ane Karisito. Tagun nating ot e God ka tasman a utna ne ir toli o e Karisito, pa ning a pukakiar ir sot ir tolsot pasi ot.
11 Nating ot i aslang pas mila na tarai Juda, sur mila anuna tarai o e Karisito. A ututnala rop ning e God i sira toli, i toli arlar ot ana nuknukna. 12 I aslang pas mila sur mila na ningnigo na tarai ning mila tortorot o e Karisito, sur milar atong leklek pas e God ana nuna matatar. 13 Pa mulo otleng, mulo laun o e Karisito, ning mulo longor a momol a warwara ne, a Wakak a Warwara mang e God ir alaun pas mulo. Ning mulo longori pa mulo tortorot o e Karisito, e God i suah tar anuna akinalang o mulo, a Talngan Tabu, ning ka lele nigo tar onoi. 14 A Talngan Tabu, a ningnigo na artabar, sur ir amomoli mang lamur ana pukakiar ning e God ir alangolango pas anuna taraila, dalar kibas a ututnala ning e God ka lele tar onoi. Pa dalar atong leklek pas e God ana nuna matatar.
E Pol i nunung sur a tarai a lotu
15 Larne, ning a longori mang mulo tortorot ana Leklek e Iesu, pa mulo mang sur a taraila rop ane God, 16 bel a manah ana atong wakak tetek e God o mulo. Pa ana nuka nunungla a sira nuk pas mulo. 17 A sira nunung mang e God anuna Leklek anundala e Iesu Karisito, a Tamandala ning i bukus ana matatar, ir tabar mulo ana tastasmai miting tana Talngan Tabu, pa ir atalapor a nuknukimulo, sur mulor tasman wakak e God. 18 A nunung mang ir atalapor a ingumulo, sur mulor tasman a ututnala ning dala harnanai ana tortorot suri, ning e God i kabah pas dala sur dalar kibas pasi. A ututnala ning dala na tarai ane God, dalar kibas pasi, i itna kol pa i bukus ana matatar. 19 Pa a nunung sur mulor tasmani mang a rakrakai e God ning i nangan dala onoi, ning dala tortorot, i itna kol. Bel dir arlar sot pasi ana ta utna. Ana tnan rakrakaina ning, 20 e God i akamtur pas e Karisito kusun a minat, pa i akes tari ting na ris a sot a kuna saot na langit. 21 Pa e Karisito i leklek tana urmatana ingun rop larne, a ningnigola anuna ingunla, a ingunla ning la tong akes a warkurai, pa a ingunla ning la tong akes a rakrakai, pa la ning la keskes na leklek. A risana e Karisito i leklek kol tana risingla rop ana lalaun ne, pa ana lalaun lamur. 22 E God i suah tar a ututnala rop nahai a rakrakai e Karisito, pa e God i akes tar e Karisito sur ir itna tana ututnala rop, pa i ot a ningnigo ana ututnala rop sur a harnangai tetek a tarai a lotu. 23 Pa a tarai a lotu la a palaona e Karisito. Pa e Karisito i bukus onla, pa i abukus a ututnala rop otleng ting na urmatana ngas.