1 Ego totonai sa beto vaivagigalainiria i Jisu sira na sakasava pira, sa sa taloa pa Qalili sisa ko sa sae pa ia pikata gugusu Jiudia pa kai karovona na pie Jodani. 2 Ko na vaikamu tinoni lavata sa qai tutia isa, beto ketakoi tugu sa salana betoria isa.

3 Ego ira kaki Parese sa qai lame tana ko qai nyogua podekia sisa. Ko qai gonania na nanasa ira sisa, pira qarigu, <<Ai vei, na tavamalumuna pa Vavanau sa mina boka loa pale kai tinoni sa na maqotana pa ai ginugua vei gu sa nyoguania isa?>> qarigu.

4 Poni sa oeria i Jisu, pira sauniria, <<Beko qu tei tiroamiu tu ba qu oqoro tu vakaberia agou sa na Kukuti Tabuna? Pira sau sa na Kukuti Tabuna, <Pa popodalaina sa sa tei vapodaka vamarenia beto varerekoa tu na Tamasa sa na tinoni,>Popodalaina 1.27. sau. 5 Beto pira mutu sau, <Ko pa ginuana isa sa mina boka taloa tana tinana beto na tamana sa na marene ko mina kole kame tana maqotana, ko mai kame gu sira karu,>Popodalaina 2.24. sau. 6 Ko maike pikatarua sira karu, ba kame gu. Ko isa vei sa tei vaipuku tariniria tu na Tamasa sa kepore kai tinoni mi vaivisuniria,>> sau si Jisu.

7 Poni qai nanasa bei sira na Parese, <<Ba ai sa vei ko i Mosese sa vaivagarununia tu sa mina boka kutia na marene sa kai pepa vailoa, beto sa mina iju variu palea sa na maqotana?>> qarigu sira.

8 Poni sa oeria i Jisu sira, <<Na ginuana sa vamalumunigou i Mosese sisa sa ura koko vei sa tapata na tavavanaumiu sagou. Goto pa podalaina sa sake vei inara sa. 9 Ko ara sa pira ma poja veinigou: bike vavaiputa taviti goboro sa na maqotana kai marene, ba bi lao na marene ko bi loa pale sa na maqotana isa ko bi alava beia mule kai goto rereko, sa sa babarata tugu sa na marene isa,>> sau si Jisu.

10 Poni qai parangia sira na ona sepele, <<Vei mina isa sa na ginuana vei na marene mina boka loai na maqotana, poni sa jongana jola sa mike pavu vaialava sa na tinoni,>> qarigu sira.

11 Poni sa oeria i Jisu sira, <<Nake ira doru tinoni mai boka tekua sa na vaivagigalai api, ba ira gu sa tei vaniria tu na Tamasa. 12 Ura koledia sa kubo okokoto ginugua vei beto qaike boka vaialava ira na tinoni: kaki na podo veidi tu, kaki na tinoni gu qai lida vaegoro veini paleria, goto kaki qaike vaialava ura qai nyogua nabulu vania na binangara pa noka. Na tinoni mina boka tekua na vavanau api sa mi tekua tugu,>> sau si Jisu.

13 Ego ira kaki sa qai toni laoniria ti Jisu sira na koburu ko mi vaoponiria na limana beto mi mananiria isa qarigu, ba qai tokeria ira na sepele sira na tinoni qai vaitoni lame.

14 Ba pira sau i Jisu, <<Mu vamalumuria sira na koburu ko mai lame taqu, muke suquturia. Ura tadira tugu vevei aipira sa na binangara pa noka,>> sau sisa. 15 Beto sa vaoponiria na limana isa sira na koburu ikikete ko sa mananiria, beto sa sa taloa riu.

16 Ego koleona sa kai tinoni sa kamu tai Jisu ko pira sau, <<Tinoni vaivagigalai, ai roiti jongana sa mana roitinia ara beto mana tekua ara sa na toa jola?>> sau sisa.

17 Poni sa oea i Jisu, pira sau, <<Ai sa vei ko qu nanasania ao taqu sa na veveina na jongana? Kame gu mekana sa isa sa jongana. Vei muna nyogua tekua na toa ao, sa mu kopuniria na garunu,>> sau sisa.

18 <<Na garunu ai veveidi?>> sau sa na tinoni api.

Poni sa paranga si Jisu, <<Na garunu sa pira: munake varivai, munake babarata, munake ikiko, munake jutu seseke, 19 mu valavataria na tinamu na tamamu,Votu 20.12-16; Vavanau 5.16-20. muna roroqua na tavitimu kai muqisi podeke vei qu roroqu mule veinigo mekamu,Iama 19.18.>> sau sisa.

20 Poni sa paranga sa na tinoni api, <<Doru garunu pira sa qa tei tuti betoria tu ara sira, goto na sa mule sa mana roitiniria ara?>> sau sisa.

21 Poni sa pira saunia i Jisu sisa, <<Vei muna nyogua nabu pa mua tuti sao, sa mu lao ko mu vavainiria na mua sakasava qu isongoria, ko na poatadi mu vaniria ira na tinoni vaivasevidi. Beto sa muna tekuria ao sira na isisongo pa noka, beto sa mu lame tutisiu,>> sau sisa.

22 Totonai sa nongoria na tinoni koregana api sa na paranga isa sa sa takulanga ko sa riuona, ura sa soku nona isisongo sisa.

23 Beto sa pira sauniria i Jisu sira nona sepele, <<Ma poja sosotonigou ara sagou: sa tapata vivitigi tana tinoni isisongo sa mina tome pa binangara pa noka sisa. 24 Ma kai poja vatalenigou mule ara sagou: sa tapata jola tana tinoni isisongo sa mina tome pa binangara tana Tamasa sisa, sa tapata jolania na kameli bi sulingi tomea sa na talupuru nila,>> sau sisa.

25 Totonai qai nongoria ira na sepele sapi sa qai gabara vivitigi ko pira qarigu, <<Ko i sei gu sa mina boka taalo sa vei?>> qarigu sira.

26 Poni sa do tariria i Jisu sira beto pira sauniria, <<Tana tinoni sa tapata vivitigi sapi, goto tana Tamasa sa doru sakasava qaike tapata,>> sau sisa.

27 Poni sa oe si Pita, pira saunia, <<Doro! Agei qe tei loa paleria tu sira doru mei sakasava ko qe tei tutigomei tu ao. Ko na sa sa mene isongia agei?>> sau sisa.

28 Poni sa pira sauniria i Jisu sira, <<Ma poja sosotonigou ara sagou: totonai mina toqo pa nona totoqona bangara sa na Tuna na Tinoni pa totoso tana ona binangara, sa muna somana toqo pa manogarua totoqona bangara sagou ka manogarua sepele, ko muna bangaraniria sira ka manogarua bubutu Izireli. 29 Beto ko ira doru qai loaria na dia ruma na tasidi marene na luludi rereko babi na tamadi na tinadi beto ira na tudia na peso na vei pa dia tutiqu ara, sa mina ia beiniria na Tamasa kai gogoto totoso mota jolaniria vei ira qai loaria ira beto mai teku isongia vei na toa jola. 30 Ba ira soku qai momoe sa mai liligu, beto ira soku qai liligu sa mai momoe,>> sau si Jisu.