1 ᤂᤡᤏᤡ᤹ᤀᤥ ᤌᤡᤰᤐᤠᤖᤧ ᤘᤣ᤹ ᤏᤛᤠᤏᤡᤒᤠᤴᤏᤢ ᤂᤧᤔᤠ᤹ ᤑᤥ᤺ᤰᤂᤢᤀᤠᤱ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤂᤠᤛᤧᤴ ᤗᤥ᤺ᤴᤇᤧ ᤂᤪᤡᤛ᤻ᤋᤖᤧ ᤛᤣᤛᤣ ᤁᤢᤕᤠᤵᤔᤡᤜᤠ᤹ᤖᤥ ᤐᤣ᤺ᤰᤔᤠᤸᤗᤧ ᤁᤢᤗᤧᤰᤘᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤂᤠᤛᤧᤴᤗᤥ᤺ᤶᤒᤠᤸᤗᤥ ᤀᤠᤰᤂᤣᤀᤠᤱ ᤐᤣ᤺ᤰᤔᤠ ᤁᤧᤀᤠ᤺ᤴᤏᤠᤛᤡᤒᤠᤒᤣ᥅ 2 ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤛᤣᤛᤣ ᤕᤠᤵᤔᤡᤜᤠ᤹ᤖᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤂᤠᤛᤧᤴ ᤔᤧᤗᤥ᤺ᤴᤍᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤂᤠᤛᤧᤴᤏᤡᤴ ᤂᤡᤏᤡ᤹ᤀᤣ ᤗᤥ᤺ᤶᤔᤠ ᤐᤥ᤺ᤱᤏᤧ ᤑᤠ᤹ᤃᤪ ᤀᤰᤋᤱᤒᤠ ᤆᤢᤈᤢᤰᤛᤠ ᤐᤠ᤺ᤴᤜᤠ᤹ᤖᤧᤴ ᤂᤠᤛᤧᤴ ᤗᤥ᤺ᤶᤔᤠ ᤁᤧᤴᤇᤢᤰᤋᤢᤶᤔᤡᤶᤒᤡ᥅ 3 ᤔᤠᤱᤗᤠᤀᤡᤱᤒᤠᤜᤠ᤹ ᤀᤠᤏᤡ᤹ ᤂᤠᤛᤧᤴ ᤀᤠᤗᤥ᤺ᤴᤍᤢᤶᤛᤡᤶ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡ᤹ᤒᤡ᥅ ᤜᤧᤰᤁᤣ᤺ᤸᤗᤧ ᤁᤴ ᤜᤡᤱᤔᤴᤏᤥ ᤌᤡᤰᤕᤠ᤺ᤴᤎᤰᤐᤠ ᤐᤠ᤺ᤴᤜᤠ᤹ᤃ ᤕᤶᤒᤠ ᤔᤧ᤺ᤴᤗᤥ᥄ 4 ᤜᤧᤰᤋᤱᤒᤠ ᤐᤠ᤺ᤴᤜᤠ᤹ ᤂᤠᤛᤧᤴ ᤗᤥ᤺ᤴᤇᤧ ᤛᤣᤛᤣᤜᤢᤵᤗᤰᤁᤡᤸᤗᤧ ᤀᤡᤱᤎᤠ᤺ᤱ ᤔᤧᤒᤡᤖᤢᤴᤇᤡᤶᤒᤠ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤥ ᤀᤠᤰᤂᤣᤀᤠᤱ ᤁᤧᤒᤡᤃᤡᤒᤠᤒᤣ᥅ 5 ᤁᤱᤃ ᤂᤡᤏᤡ᤹ ᤛᤡᤖᤡᤱᤔ᤺ᤔᤥ ᤁᤧᤎᤩᤧ᤹ᤀᤡᤖ ᤑᤠ᤹ᤀᤠᤱ ᤐᤠ᤺ᤳᤋᤢᤱᤒᤠᤖᤥ॥ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤀᤥ ᤂᤧᤔᤠ᤹ ᤐᤥ᤺ᤰᤁᤡᤸᤗᤧ ᤂᤡᤏᤡ᤹ ᤗᤢᤶᤔᤥ ᤗᤳᤌᤡᤰᤁᤠᤱ ᤏᤠᤍᤱ ᤆᤥ᤺ᤰᤔᤠ ᤁᤧᤛᤢᤰᤐᤠ ᤛᤡᤰᤁᤢᤶᤛᤠᤒᤠ ᤔᤏᤠ ᤜᤥ᤺ᤵᤐᤡ᥅ 6 ᤁᤖ ᤗᤳᤇᤠ ᤏᤛᤠᤏᤡᤒᤠ ᤏᤢᤛᤠ᤹ᤀᤡᤴ ᤘᤣ᤹ᤛ᤻ᤔᤠ ᤏᤛᤠᤏᤡᤒᤠ ᤏᤢᤛᤠ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤰᤂᤣᤗ᤹ᤖᤡᤰ ᤋᤢ᤺ᤴᤍᤣ᤹ ᤏᤠ᤺ᤳᤇᤧ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤧᤴ ᤜᤡᤶᤔᤥ ᤐᤣ᤺ᤰᤐᤠᤒᤣ᥅

7 ᤂᤡᤏᤡ᤹ ᤗᤢᤶᤔᤥ ᤋᤢ᤺ᤴᤍᤣ᤹ᤜᤠ᤹ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤛᤠᤏᤡᤒᤠ ᤜᤡᤱᤔᤴᤏᤥ ᤜᤠᤖᤡ ᤁᤧᤍᤩᤧ᤹ᤀᤡᤒᤠ ᤐᤠ᤺ᤴᤏᤡᤴ ᤌᤠ᤺ᤵᤗᤥ॥ ᤐᤖᤢᤔᤠᤸᤗᤧ ᤌᤣᤀᤠᤱ ᤏᤡᤱᤄᤢᤶᤔᤥ ᤔᤧᤴᤎᤠᤔᤠᤒᤣ᥅ ᤌᤣᤀᤠᤱ ᤀᤡᤱᤗᤧᤰᤁᤥ ᤔᤧᤴᤎᤠᤔᤠᤒᤣ᥅ 8 ᤁᤖ ᤂᤡᤏᤡ᤹ ᤀᤠᤒᤠᤅᤣ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤏᤡᤱᤄᤢᤶ ᤏᤢ ᤀᤡᤱᤗᤧᤰ ᤁᤧᤔᤧᤳᤋᤢᤶᤛᤡᤶᤗᤥ॥

9 ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤗᤠᤄᤥ ᤔᤧᤱᤄᤥ᤺ᤛᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡ᤹ᤒᤡ᥅ ᤀᤡᤱᤗᤧᤰᤁᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹. ᤏᤠᤘᤠᤀᤡᤳᤗᤠ ᤔᤠᤱᤃᤧᤄ᤺ᤒᤠᤜᤠ᤹. ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤈᤥ᤺ᤰᤔᤠᤜᤠ᤹. ᤁᤧᤳᤏᤡᤒᤠ ᤁᤧᤳᤏᤡᤔᤠᤜᤠ᤹. ᤔᤧᤴᤇᤢᤔᤠ᤹ ᤔᤧᤴᤇᤢᤔᤠ᤹ᤀᤡᤴᤏᤢ ᤜᤧᤰᤁᤩᤠᤱ ᤕᤧᤶᤒᤡᤳᤇᤠ᤹ ᤕᤧᤶᤒᤡᤳᤇᤠ᤹ᤀᤡᤴᤏᤢ ᤆᤠᤃᤧᤖᤠᤶᤒᤠᤜᤠ᤹. 10 ᤁᤧᤄᤢ᤺ᤵᤐᤠᤜᤠ᤹. ᤂᤡ᤺ᤶᤕᤰᤐᤠᤜᤠ᤹. ᤌᤡ᤺ᤔᤛᤠᤱᤜᤠ᤹. ᤆᤠ᤺ᤳᤌᤡ ᤁᤧᤍᤣ᤺ᤒᤠ ᤏᤢ ᤑᤥᤋᤩᤠᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤗᤠᤄᤥ ᤔᤧᤱᤄᤥ᤺ᤛᤢᤴᤗᤥ॥ 11 ᤂᤡᤏᤡ᤹ᤀᤠᤱ ᤁᤢᤓᤠᤃ ᤒᤠ ᤀᤰᤋᤱᤒᤠ ᤁᤧᤘᤕᤡ. ᤁᤖ ᤘᤠᤃᤧᤶᤜᤵᤋᤡ. ᤛᤣᤛᤣ ᤁᤧᤒᤥ᤺ᤰᤂᤡ ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤗᤠᤶᤒᤠ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤁᤧᤒᤥ᤺ᤰᤂᤡᤖᤥ॥

12 ᤁᤢᤓᤠᤖᤧ ᤔᤧᤒᤠ᤺ᤳᤋᤢ᤹. “ᤀᤡᤱᤃᤠ᤹ ᤁᤠᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤂᤥ᤺ᤛᤢᤱ.” ᤁᤖ ᤁᤠᤰ ᤐᤠ᤺ᤴᤜᤠ᤹ ᤀᤠᤏᤡ᤹ ᤗᤠᤃᤡ ᤀᤡᤱᤎᤠ᤺ᤱᤒᤠ ᤔᤧᤈᤥ᤺ᤰᤏᤧᤴᤗᤥ॥ “ᤁᤠᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤂᤥ᤺ᤛᤢᤱ.” ᤁᤖ ᤀᤡᤱᤃᤠ᤹ ᤀᤠᤳᤋᤡᤴ ᤐᤠ᤺ᤴᤏᤡᤸᤗᤧᤴᤏᤠᤱ ᤕᤥ᤺ᤰᤐᤠ ᤔᤧᤒᤥ᤺ᤱᤅᤠᤴᤗᤥ॥ 13 ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤢᤈᤠ᤺ᤱᤃ ᤛᤠᤵᤐᤥ᤺ᤰᤐᤠᤸᤗᤧ ᤁᤢᤗᤠᤃᤡᤖᤥ. ᤜᤧᤰᤁᤩᤠᤱ ᤛᤠᤐᤥ᤺ᤰᤐᤧᤴ ᤁᤢᤈᤠ᤺ᤸᤗᤧ ᤗᤠᤃᤡᤖᤥ॥” ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤏᤧᤵᤔᤠᤱ ᤔᤧᤰᤂᤢᤛᤡ᤹ᤖᤥ॥ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤔᤧ᤺ᤴᤗᤥ. ᤁᤖ ᤍᤠᤱᤒᤠᤸᤗᤧ ᤁᤢᤗᤠᤃᤡᤖᤥ॥ ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤡᤸᤗᤧ ᤁᤢᤗᤠᤃᤡ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ ᤍᤠᤱᤒᤠᤸᤗᤧ ᤜᤡᤛᤢ ᤋᤱᤄᤢᤖᤥ॥ 14 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤍᤠᤱᤒᤠᤴ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴᤏᤠᤱ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢ᤹ᤖᤥ॥

15 ᤂᤡᤏᤡ᤹ ᤌᤰᤁᤡᤱᤃ ᤂᤪᤡᤛ᤻ᤋᤖᤧ ᤁᤢᤕᤠᤶᤗᤰ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡ᤹ᤒᤡ᥅ ᤜᤧᤰᤁᤣ᤺ᤸᤗᤧ ᤂᤪᤡᤛ᤻ᤋᤖᤧ ᤁᤢᤕᤠᤶᤗᤰᤁᤡᤴ ᤋᤣ᤹ᤖᤢᤱᤅᤠᤱ ᤁᤧᤳᤏᤡᤔᤠᤴᤏᤢ ᤁᤠᤶᤛᤢᤱᤒᤠᤒᤡ᥅ ᤀᤠᤵᤑᤠᤸᤗᤧᤀᤠᤱ ᤔᤧᤏᤢ᤹ᤏᤧᤴᤗᤥ᥄ 16 ᤀᤠᤳᤋᤡᤴ ᤔᤏᤠ᤺ᤴ ᤁᤧᤳᤏᤡᤔᤠᤴᤏᤢ ᤋᤱ. ᤂᤧᤴᤏᤢᤀᤣ ᤗᤳᤇᤠ ᤌᤰ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡᤒᤡ᥅ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤗᤳᤇᤠ ᤌᤰ ᤐᤥ᤺ᤱᤛᤡ᤹* ᤋᤥᤗᤡᤱᤛᤥᤔᤢ ᥈.᥈᥊ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳᤗᤥ॥ 17 ᤁᤖ ᤀᤠᤳᤋᤡᤴ ᤍᤠᤱᤒᤠᤴᤏᤢ ᤁᤠᤶ. ᤂᤧᤴ ᤂᤢᤏᤧ᤹ᤏᤢᤀᤣ ᤕᤠᤶᤛᤠᤶᤔᤥᤀᤠᤱ ᤗᤳᤇᤠ ᤐᤥ᤺ᤱᤗᤥ॥

18 ᤆᤠᤖᤠᤶᤔᤥᤗᤠᤶ ᤔᤠ᤺ᤱᤄᤠ ᤘᤕᤧᤶᤔᤧ᤹ᤀᤥ॥ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤠᤰ ᤘᤣ᤹ ᤗᤠᤕᤥᤜᤠ᤹ ᤏᤠᤛᤡᤱᤃᤧᤴ ᤁᤢᤎᤰᤗᤠᤶᤒᤠ ᤗᤠ᤺ᤰᤁᤠᤳ ᤆᤥᤃᤢ᤹. ᤁᤖ ᤆᤠᤖᤠᤶᤔᤠ ᤗᤠᤕᤥ᤺ᤱᤃ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤁᤢᤎᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤆᤥᤃᤢ᤹ᤖᤥ॥ 19 ᤂᤡᤏᤡ᤹ ᤌᤰᤁᤡᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤜᤡᤶ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡ᤹ᤒᤡ᥅ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ ᤛᤡᤃᤠᤱ ᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤌᤰᤁᤡᤴ ᤀᤠᤒᤠᤅᤣ ᤂᤡᤏᤡ᤹ᤀᤡᤴ ᤔᤧ᤺ᤴᤗᤥ॥ 20 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤖᤡᤰ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤂᤡᤏᤡ᤹ ᤁᤧᤎᤧ᤹ᤖᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤔᤧ᤹ᤀᤥ॥