ᤁᤴ ᤛᤠᤵᤐᤴᤏᤡᤴ ᤗᤢᤁᤠ ᤔᤧᤵᤔᤏᤠᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤕᤠᤱᤛᤡᤒᤠ ᤁᤢᤜᤢ᤹ᤛᤠᤶᤒᤠᤸᤗᤧ ᤛᤠᤵᤋᤢᤒᤠᤖᤥ॥ ᤁᤴ ᤛᤠᤵᤐᤴᤏᤡᤱᤃ ᤋᤃᤡ ᤛᤠᤵᤋᤢᤒᤠ “ᤗᤢᤁᤠᤖᤧ ᤁᤢᤛᤢᤏᤠᤀᤡᤱᤅᤡᤸᤗᤧ” ᤁᤢᤈᤰᤗᤥ॥ ᤁᤴ ᤛᤠᤵᤐᤴ ᤛᤠᤵᤔᤠᤸᤗᤧᤴ ᤁᤢᤈᤧᤰ ᤏᤡᤱᤘᤠ᤹ᤛᤥ᤺ᤰᤁᤡᤱᤃ ᤀᤠᤰᤂᤣᤗ᤹ᤖᤡᤰ ᤜᤢ᤹ᤛᤠᤶᤒᤠᤜᤠ᤹ᤖᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶ ᤏᤢ ᤁᤢᤗᤠᤶᤗᤥ᤺ᤔᤠᤴ ᤔᤧᤄᤥ᤺ᤛᤢ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ “ᤕᤖᤢᤛᤗᤧᤶᤔᤥ. ᤕᤜᤢᤍᤡᤕᤠ ᤏᤢ ᤛᤠᤔᤖᤡᤕᤠ ᤌᤢᤶᤔᤥ. ᤜᤧᤰᤁᤩᤠᤱ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ” ᤛᤢᤏᤠᤀᤡᤱ ᤀᤡᤱᤔᤧᤓᤥ᤺ᤛᤢ ᤁᤧᤗ᤹ᤒᤠᤴ ᤐᤥᤎᤰ ᤆᤥ᤺ᤰᤔᤠᤖᤥ (᥇.᥎)॥ ᤁᤴ ᤜᤡᤴᤍᤥ᤺ᤰᤜᤠ᤹ᤃ ᤀᤠᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤠᤏᤡ ᤛᤠᤶᤕᤥ᤺ᤴ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤗᤠᤃᤡ ᤛᤠᤶᤕᤥ ᤐᤥ᤺ᤰᤂᤧ ᤁᤧᤗ᤹ᤒᤠ ᤔᤢᤴᤎᤢᤶᤗᤥ॥ ᤂᤪᤡᤛ᤻ᤋᤠᤏᤡ ᤛᤠᤶᤕᤥ ᤁᤧᤏᤠ᤺ᤵᤐᤠᤜᤠ᤹ ᤖᤥᤔᤡ ᤜᤠᤱᤈᤢᤶᤔᤥ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤔᤧ᤺ᤴᤇᤡ. ᤁᤖ ᤂᤪᤡᤛ᤻ᤋᤠᤏᤡ ᤏᤛᤠ᤺ᤴᤏᤡᤱᤃ ᤕᤜᤢᤍᤡ ᤛᤠᤶᤕᤥ᤺ᤴ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤛᤠᤶᤕᤥ ᤑᤠ᤹ᤀᤠᤱ ᤜᤧᤴᤏᤡ᤺ᤵᤐᤠᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤁᤴ ᤛᤠᤵᤐᤴᤏᤡᤴ ᤛᤠᤵᤋᤢᤒᤠᤖᤥ॥

ᤁᤴ ᤛᤠᤵᤐᤴᤏᤡᤴ ᤛᤢᤶᤛᤡ ᤗᤰᤁᤥ ᤜᤠ᤺ᤔᤠ ᤛᤢᤰᤋᤧᤳᤗᤥ–

ᤁᤴ ᤛᤠᤵᤐᤴᤏᤥᤒᤠ ᤁᤧᤕᤧᤰᤐᤠ ᤐᤠ᤺ᤴᤏᤡᤱᤃ ᤛᤣᤛᤣᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤗᤥ॥ ᤂᤢᤏᤧ᤹ᤃ ᤐᤧᤴᤋᤡᤁᤥᤛ᤻ᤋ ᤕᤧᤴᤏᤥ ᤔᤢᤰᤛᤠᤶᤏᤢ ᤕᤖᤢᤛᤗᤧᤶᤔᤥ ᤁᤧᤘᤠ᤹ᤒᤠ ᤏᤛᤠᤏᤡᤒᤠᤜᤠ᤹ᤀᤥ ᤌᤩᤧ ᤜᤧᤰᤁᤩᤠᤱ ᤛᤣᤛᤣᤜᤢᤵᤗᤰ ᤏᤢ ᤗᤠᤶᤗᤥ᤺ᤒᤠᤜᤠ᤹ ᤁᤴ ᤛᤠᤵᤐᤴᤏᤥ ᤐᤥᤎᤰ ᤐᤥ᤺ᤰᤂᤧᤒᤠ ᤜᤡᤴᤍᤥ᤺ᤰᤜᤠ᤹ᤀᤥ ᤗᤠᤶᤗᤥᤛᤢᤛᤡᤖ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤁᤧᤎᤢᤶᤒᤠ ᤆᤥᤃᤢ ᤜᤧᤰᤁᤩᤠᤱ ᤜᤠᤱᤜᤠᤱ ᤔᤧᤳᤋᤢᤛᤡ᤹ᤖᤥ॥ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤒᤠ ᤐᤠ᤺ᤴᤜᤠ᤹ᤖᤧ ᤏᤛᤠᤏᤡᤒᤠᤜᤠ᤹ᤖᤧ ᤜᤡᤱᤔᤴ ᤏᤢ ᤂᤢᤏᤡ᤹ ᤛᤣᤛᤣ ᤆᤢᤶᤗᤢᤱᤅᤥ ᤛᤢᤏᤠᤀᤡᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤥᤎᤰ ᤆᤥᤃᤢ᤹ᤖᤥ॥