Susulak neme
Yudas mai
1
Soda-molek
1 Soda-molek neme au, Yudas mai. Au ia, ita Lamatuan Yesus Karistus atan. Au boe oo, Yakobis fadin.
Au sulak susulak ia, fee basa hataholi la, fo Amak Manetualain hele nala sala so, fo Ana sue sala ma Yesus Karistus nanea nakandoon, losa Ana fali main.✡Mateos 13:55; Markus 6:3 2 Au oke fo Manetualain natudu Ndia nameda kasian, ma Ana fee susuen makadotok neu ei, fo ela bisa masoda mia mole-dame.
Yudas fee nasanenedak neu hataholi kamahelek laꞌeneu mana manoli kasalak
3 Tolanoo susue nggalei! Makahulun au ahiik sulak fee ei, basa dedeꞌa kala fo Manetualain nasalaꞌe ita. Tehuu hatematak ia hambu dedeꞌak dadi, de nakaseti au sulak susulak feꞌek. Manetualain fee ita dala sodak ndoos so. Ana fee dalak sodak ndia kada laꞌiesak, ma Ana ta tao nakabebeun. Ana fee dala sodak ndia, neu Ndia hataholi kamahele nala. De, hatematak ia au oke fo ei masusua ma pasa eik, fo hataholi la boso soba-soba tao feꞌek dala sodak maneme Manetualain mai.
4 Na te, hambu hataholi hida so, fo ala maso lafufunik lai ei lalada mala. Sila ndia, ta nau tungga Manetualain dala sodan fo ndoos, tehuu ala tungga kada sila aombaa kasuu heheli nala. Ala lae leoiak, Manetualain dale malolen de Ana soi dalak, fo ita sodak tadabak tungga ita hihii-nanaun. Ndia, kokola loulatak ndia so! Sila ndia, hataholi fo kokolak feꞌek, tehuu tataon feꞌek! Ala nau fo ita boso tamanene ita Manen ma ita Lamatuan Yesus Karistus bali. Tehuu ei masanenedak, huu nana sulak nai Susula Malalaok, nae, Manetualain mesa kana heti memak sila huhuku nala neme makahulun mai so.
Lamatuak huku hataholi mana manoli pepeko kala, sama leo makahulun Ana huku ata nusa-sodak ma hataholi manggalau kala
5 Ei malelak dedeꞌak noꞌuk so, tehuu au tao nasanenedak seluk neu ei, fo ei musi mata neuk.
Masaneda tutui lele uluk, neu faik fo Israel asa kalua leme Masir mai. Mae Lamatuak tao nasoda hataholi nusak katemak esa, tehuu fai makabuin Ndia boe tao nakalulutu sila basa sala fo ta nau lamahele Ndia.✡Kalua neme Masir mai 12:51; Lelekek 14:29-30
6 Natutudu feꞌek, laꞌeneu Manetualain atan nai nusa-sodak. Manetualain fee sala koasa, tehuu manoo too-lanek boe. Tehuu sila luma lameda ta dai nai ndia, de ala lalaik lena sila hak. Tehuu Lamatuak mbaꞌa sala nenik tali besi, fo ta bisa lakamboꞌik, ma kena sala lai mamana makiuk, fo lahani Faik fo Lamatuak sangga naketu basa hataholi la dedeꞌa nala.
7 Ma boso mafalende heni kota Sodom, kota Gomora, ma nggolo feꞌe kala mana dekak lai ndia. Ndia hataholi nala lahiik tao dedeꞌa manggalauk mata-mata kala, no hataholi ta saon. Sila boe, lahiik tao sasaok ta leo basa faik, sama leo touk sao touk ma inak sao inak. Tehuu Manetualain tao nakalulutu basa sala nenik haꞌi so. Tutuik ia, tao nasanenedak neu ita, nae, Manetualain sangga pake haꞌi naraka fo ta mana matek, suek huku basa hata manggalau kala.✡Tutuik laꞌeneu Sososan 19:1-24
8 Mae leo ndiak boe, tehuu hataholi fo mana maso nai ei lalada mala, lasoda lo pepekok lakandoo. Na te, ala pake sila meꞌin, dadik neu toꞌok, fo ala tao langgenggeo sila ao-ina nala, ma ala laban ladabak hataholi fo mana toꞌu hak koasa, ma lakadadaek malanggan malaikat fo malole manai nusa-sodak. 9 Tehuu Mikael ta tao leo sila. Ndia ndia, Lamatuak ata nala malai nusa-sodak malanggan. Faik fo Musa bei fo maten, Mikael nasisimbo bafak no nitu la malangga inahuun laꞌeneu Musa mbombolan. Tehuu Mikael ta soli salak ma nakadadaek ndia. Kada ana nafada, nae, “Dei fo Manetualain heti o, bei fo o mamedan!”✡Daniel 10:13, 21; 12:1; Dae-bafok Mata Beuk 12:7; Tui Seluk laꞌeneu Dala Sodak 34:6; Sakarias 3:2
10 Tehuu hataholi ia ta leo ndiak. Ala lakadadaek ma haumemee basa dedeꞌa kala, fo ala ta lalelak. Kada tungga sila hihii-nanau kadaban ndia, fo sama leo banda la. Huu ndia de, tao lakalulutu sila ao-ina heheli nala.
11 Mata neuk! Dei fo ala hambu sila babaꞌen. Te ala tao tungga leo Kaen, fo tao nisa ndia fadi hehelin. Ala tao tungga leo Balaam, fo ana nau sudi tao hata, sadi hambu doik. Sila boe tao tungga leo Kora, fo lakalulutuk huu ana laban Manetualain. Huu sila manggalaun ndia, dei fo hataholi la ia boe, laelak leme Manetualain mai.✡Tutuik laꞌeneu Sososan 4:3-8; Lelekek 22:1-35; 16:1-35
12 Mete ma hataholi la ia lakabubua lo ei, fo lasaneda Lamatuak susuen, neu faik fo ei miꞌa-minu noꞌu, na ta mae lalelak lo sila balenaꞌo nala. De, ei musi mata neuk, bou! Huu sila ndia, sama leo batu inahuuk nai tasi dale fo bisa tao nakalulutu ofak.*Dedeꞌa Yunani nai ia bisa ndandaan dua. Esak, Yudas nakasasaman hataholi manggalau kala no “batu mbiak”. Esak bali, ana nakasasama sala lo “nggeoanak fo tao manggenggeok”. Ala sama leo koꞌa nggeok nai lalai, fo ta natuda sudik uda titik esa boe. Kada ala kokolak loulatak, tehuu ta tao hata malole esa boe. Sila nonook leo ai fo sosoan ta. Mete ma ndia fai naboan, na ala ta kalua boak esa boe; naa te sila nana feꞌa henik losa oka nala. 13 Sila tatao nala kada lakamamaek ita. Huu sila sama leo lii inahuuk, fo ana laꞌo ela fufude manggenggeon nai tasi bifi kala. Sila boe oo sama leo ndu kala leu-mai lai lalai, fo nana hukuk. Lamatuak tao sala nai mamanak esa, fo makiu mumuuk, de mopo heni sala lai ele.
14 Henok ndia, numbu saduk kahitun fo hinggan mulai neme Adam mai. Ana nafada memak laꞌeneu hataholi mata leo iak. Huu ana nae,
“Ei mita sudik.
Ita Lamatuan mai no Ndia ata nusa-sodan, fo malalao kala.
Sila ndia, makadotok losa ta bisa hingga nala sala bali.✡Tutuik laꞌeneu Sososan 5:18, 21-24
15 Ana mai fo sangga naketu basa hataholi la dedeꞌan.
Neu ko natudu basa hataholi esa-esako sala-singgon,
ma lufa nakaholak dedeꞌa ta tetebe sala.
Ana natuda huhukuk neu hataholi manggalau kala,
huu sila kokola ta malolen neu Ndia.”
16 Hataholi la ia, kada lalelak lakanunumbuk hataholi lakandondoo henin. Ala ta mbali Manetualain hihii-nanaun, ma tungga kada sila aombaa nasuu hehelin. Sila kokola nala kada lalelak sosoꞌuk aok. Ala lateme sangga matak ma sangga dalek, fo ela ala hambu babalan tungga kada sila hihii-nanaun.
Mambadedei ei sodam nai ei namahehele malalaom fanderen lain
17-18 Tolanoo susue nggalei! Boso mafalende heni heheluk fo Lamatuak Yesus Karistus hataholi nadedenu nala lafada memak ei so, lae, mete ma daebafok sangga basan, na, mana haumemee kala kalua mai. Ala lahiik tao lakadadaek Lamatuak hihii-nanaun, fo tungga sila hihii-nanau heheli nala, fo mana peko-paki nala.✡2 Petrus 3:3 19 Hatematak ia, hataholi sila, lai ia so. Sila ndia, fo mana mbauedo nai ele ma nai ia, fo tao nasidak ei. Sila lalelak kada lasoda tungga hataholi hihii-nanaun, huu Lamatuak Dula Dale Malalaon ta nai sila dale nala.
20 Tehuu tolanoo susue nggalei! Musi mambadedei ei sodam nai ei namahehele malalaom fanderen lain. Ma mete ma ei hule-haladoi, na tungga hata fo Dula Dale Malalaok natudu ei. 21 Masanenedak, huu Manetualain sue nala ei seli. De, manea ei ao mala, ma masaneda Ndia susuen neu ei. Ma ei musi mahani ta-taa fo ita Lamatuan Yesus Karistus natudu Ndia nameda kasian neu ei, ma fee ei sodak nakandondoo henin no Manetualain.
22 Ei musi matudu ei mamemeda kasian neu hataholi, fo dale kabaꞌek. 23 Ei musi tulu-fali basa hataholi fo ana paluu hambu sodak, sama leo ei hela kalua heni hataholi neme haꞌi dale mai. Hambu hataholi feꞌek bali, fo ei musi matudu ei dale malolem neu sala. Tehuu mata neuk, bou! Te mae ei mameda kasian neu sala, tehuu ei boe musi nunute sila manggenggeo nala, sama leo hataholi nunute badu manggenggeok.†Dedeꞌa Yunani nae, “Boso mafaloe sila badu manggenggeo nala.” Ia, dedeꞌa lena-lenak fo ndandaan, nae, “Sila soda manggalaun, ma sila nanonoli nala, fo leꞌa-nole nala ei.”
Yudas fee hataholi kamahele kala fo Lamatuak nanea sala
24 Naa, hatematak ia ita soꞌuk koa-kiok neu Manetualain!
Te Ndia fo bisa nanea ei,
suek boso ei tuda.
Ma Ndia fo bisa nakalaꞌok ei,
suek ei mambadeik nai Lamatuak matan,
huu Ndia fo tao nala ei dadi malalaok,
ma ta manggenggeok so bali.
Ei mai mia dale namahokok,
huu Ndia ana seli!
25 Kada Manetualain mesa kana,
fo Ana dadik Lamatuak tetebes,
Kada Ndia fo bisa fee sodak neu ita!
Boe ma Ana pake ita Lamatuan Yesus Karistus,
fo tao nasoda ita leo ndiak.
De, basa hada-holomata fee neu Ndia.
Basa mana selik, Ndia enan.
Ndia koasan inahuun ana seli.
Ma Ndia naena hak palenda,
neme makahulun mai,
ma hatematak ia,
losa ta mana basak.
Tetebes ndia, hetu!
Neme au mai,
Yudas
✡1:5 Kalua neme Masir mai 12:51; Lelekek 14:29-30
✡1:7 Tutuik laꞌeneu Sososan 19:1-24
✡1:9 Daniel 10:13, 21; 12:1; Dae-bafok Mata Beuk 12:7; Tui Seluk laꞌeneu Dala Sodak 34:6; Sakarias 3:2
✡1:11 Tutuik laꞌeneu Sososan 4:3-8; Lelekek 22:1-35; 16:1-35
*1:12 Dedeꞌa Yunani nai ia bisa ndandaan dua. Esak, Yudas nakasasaman hataholi manggalau kala no “batu mbiak”. Esak bali, ana nakasasama sala lo “nggeoanak fo tao manggenggeok”.
✡1:14 Tutuik laꞌeneu Sososan 5:18, 21-24
†1:23 Dedeꞌa Yunani nae, “Boso mafaloe sila badu manggenggeo nala.” Ia, dedeꞌa lena-lenak fo ndandaan, nae, “Sila soda manggalaun, ma sila nanonoli nala, fo leꞌa-nole nala ei.”