27
Ala loo Yesus neni gubenol Pilatus neu
(Markus 15:1; Lukas 23:1-2; Yohanis 18:28-32)
1 Fafai anan, basa hataholi mana makaneni dedeꞌa anggama sila, lala-halak fo sangga tao lisa Yesus. 2 Huu ndia de, ala mbaꞌa leni Ndia neu nasale gubenol Pilatus. Huu ala nau fo gubenol huku nisa Ndia.*Faik ndia, hataholi Yahudi la hak taa, fo tao lisa hataholi. Huu ndia, de ala loo Lamatuak Yesus neni mana palenda Roma neu.
Yudas londa aon, de maten
(Hataholi Nadedenu nala Tutuin 1:18-19)
3 Ledoeik Yudas bubuluk, nae, Yesus hambu huku mate so, boe ma ana fale dalen, huu ana seꞌo heni Yesus. Boe ma ana fali neni malangga anggama Yahudi la malangga nala, lasi hada kala, fo ana fee falik doi lilo fula katelu huluk ndia. 4 Ana nafada nae, “Au asala ia so, huu au fee heni Hataholi sala taak ia.”
Tehuu lataa lae, “Weih! Ai taa nau mbali o so bali! O mesa nggo ndia tanggon salak ndia.” 5 Boe ma Yudas mbia heni doi kala sila leni Uma Ina Huhule-haladoik dale neu. De ana kalua neu londa aon losa mate henin.
6 Boe ma malangga anggama Yahudi la malangga nala leu hele lakabubua lala doi kala fo Yudas mbia heni kala. Ala kokolak lae, “Ita taa bole tanggodi falik doi kala ia leni peti doik dale leu, huu doi kala ia manggenggeok. 7 De, malolenak ita teu hasan neu dae bibiak esa neme hataholi mana tao ule dae. Mete ma hataholi nusa dea maten, ma taa hambu hataholi nalela kana, na, ita bisa tatoin neu ndia leo.” 8 Basa boe ma ala pake doik ndia, de leu hasa lala dae ndia. Huu ndia de losa hatematak ia, ala foi dae ndia nade, ‘Dae daak’.✡Hataholi Nadedenu nala Tutuin 1:18-19
9 No leondiak, ala tungga hata fo Lamatuak mana kokolan Yeremia kokolak memak so, nae,
“Ala pake doi lilo fula katelu huluk sila, fo hasa neu dae.
Ala pake doik sila, huu doi kala sila hataholi belin,
tungga hataholi Israel asa laketu mema kana.
10 Dae ndia ala hasan neme hataholi mana tao ule dae,
tungga Manetualain palenda neu au.”✡Sakarias 11:12-13; Yermia 18:2-4; 19:1-11; 32:6-15
Lamatuak Yesus nasale gubenol Pilatus
(Markus 15:2-5; Lukas 23:3-5; Yohanis 18:33-38)
11 Faik hataholi la loo Yesus losa gubenol, boe ma natane Yesus, nae, “Leobee? O ia tebe-tebe hataholi Yahudi la Manen do?”
Ana nataa, nae, “Tetebes. Ama kokolan tetebes ndia so.”
12 Tehuu faik fo malangga anggama Yahudi la malangga nala, ma lasi hada kala kalaak dedeꞌak noꞌuk laꞌeneu Yesus, tehuu Ana taa nataa fa boe.
13 Boe ma gubenol natane Ndia nae, “O taa mamanene hataholi noꞌu kala kokola nalan sila do? Ala soli salak makadotok neu O. Tehuu hatina de O taa bala sala boe?!”
14 Tehuu Ana taa nataa fa boe, losa gubenol heran nalan seli.
Gubenol Pilatus naketu huku nisa Lamatuak Yesus
(Markus 15:6-15; Lukas 23:13-25; Yohanis 18:39—19:16)
15 Tungga-tungga teuk, mete ma hataholi la tao feta Paska, na, hataholi noꞌu kala lateme hele hataholi bui esa, fo gubenol mboꞌi henin. 16 Faik ndia, hataholi bui esa, nade Barabas.†Susula dedeꞌa Yunani luma sulak, lae, ‘Yesus Barabas’, ma luma bali sulak, lae, kada ‘Barabas’. Basa hataholi la bubuluk see ndia, huu manggalaun ana seli. 17 Faik ndia boe oo, hataholi noꞌuk leni gubenol Pilatus leu loke, fo ana mboꞌi heni hataholi bui esa leo natetemek. Boe ma Pilatus natane sala nae, “Malole! Tehuu au mboꞌi heni see? Nai ia hambu Barabas, ma Yesus boe, fo hataholi la lae, Karistus. De Au mboꞌi heni see? Kada ei hele leo.” 18 (Gubenol kokolak leondiak, huu ana bubuluk so, malangga anggama Yahudi la malangga nala loo Yesus neni ndia neu, huu ala dale hedi Ndia lalan seli.)
19 Faik fo gubenol bei palisak dedeꞌak ndia, tehuu ndia saon haitua heheluk neu ndia, nae, “Ama aa! Besa-besa bou, huu Yesus ia Hataholi fo salan taa fa boe. Huu-huu Ndia, de, leꞌodaek au alameꞌi taa malole. Losa hatematak ia au bei ameda taa malole alan seli.” 20 Tehuu malangga anggama Yahudi la malangga nala, ma lasi hada kala mbauedo hataholi noꞌu kala sila, fo loke gubenol mboꞌi heni Barabas, ma huku nisa Yesus. 21 Boe ma natane sala seluk bali nae, “Neme kadua kala ia, au mboꞌi heni see?”
Boe ma lataa noꞌu lae, “Barabas! Kada mboꞌi heni Barabas leo!”
22 Basa de natane sala nae, “Mete ma leondiak, na, au tao leobeek neu Yesus ia, fo hataholi lae, Karistus?”
Boe ma basa sala eki noꞌu lae, “Mbaku misan nai ai ngganggek leo!”
23 Basa de, gubenol natane bali nae, “Tehuu Ndia salan hata? Au palisak Ndia so, tehuu au taa hambu salan fa boe!”
Tehuu basa sala boe eki latingga lae, “Tao misa Ndia! Mbaku Ndia neu ai ngganggek leo!”
24 Taa dook boe ma, ana bubuluk, nae, ndia taa bisa tao hata-hata bali, huu hataholi noꞌu kala sangga manggalau so. Huu ndia de, ana haꞌi oe de ana safe liman neu sila mata nala, ma nafada nae, “Au taa tanggon Hataholi ia mamaten! Ela ei ndia musi tanggon!”✡Tui Seluk laꞌeneu Dala Sodak 21:6-9
25 Boe ma hataholi noꞌu kala sila lataa lae, “Hei, neme naa! Ela ai umbu ana nala tanggon Ndia daan ndia!”
26 Namanene leondiak, boe ma ana nae, “Neu.” Boe ma ana mboꞌi Barabas, tungga sila hihiin. Basa de, ana palenda hataholi mana manea kala fo ala filo Yesus lenik fifilok.‡Soldadu Roma la pake fifilok nana taok neme uak louk hida. Basa boe ma ala mbaꞌa dui matande do tima matande nai tali sila mbedan. Mete ma filo taa-taa nenik fifilok ndia, louk lofa heni. Filo lateꞌe, boe ma soldadu la loo Yesus, fo sangga mbaku nisan nai ai ngganggek.
Soldadu la haumemee lakamiminak Lamatuak Yesus
(Markus 15:16-20; Yohanis 19:2-3)
27 Basa ndia, boe ma soldadu la hela loo Yesus leni sila kota-musu nala pasa ina-huun neu. Nai ndia, ala loke lala sila nonoo nala batalion esa.§Soldadu la mamanan, ndia na, nai dedeꞌa latin lae, praetorium. Soldadu la mamana heheli nala nai babaꞌek uma dinas. Susula Malalaok dedeꞌa Yunani loke sila nonoo nala spreira esa. Spreira esa, na, sama leo soldadu natun nee. 28 Boe ma ala papaken badu nalu mbila-manggaledok esa, sama leo mane kala lateme paken.*Matius sulak nae, badu manaluk ia ‘mbila-manggaledok’. Markus sulak nae, ‘mbila-balanggeok’. 29 Boe ma, ala haꞌi lala ai kanggouk ndanan de ala nanen leo solangga. Boe ma ala neneꞌe solangga kanggouk ndia neu Yesus langgan, fo lakamiminak sama leo ala soꞌu mane beuk fo pake solangga manek. Boe ma ala latotoꞌun ai esa neu lima konan, sama leo teteꞌe-ai palenda. Boe ma ala sendek lunggulanggak lasale Ndia, ma ala haumemee Ndia, lae, “Hada-holomata neu hataholi Yahudi la Manen.” 30 Boe ma ala mbula ambe neu Ndia, ma haꞌi lala teteꞌe-aik neme Ndia liman mai, de ala lambue denggu Ndia langgan. 31 Ala lambue haumemee basa Ndia, boe ma ala odu heni badu nalun. Boe ma ala papake seluk Ndia baloꞌan. Basa boe ma, ala loon neni kota Yerusalem deak neu, fo sangga leu mbaku Ndia neu ai ngganggek losa maten.
Ala mbaku Lamatuak Yesus nai ai ngganggek
(Markus 15:21-32; Lukas 23:26-43; Yohanis 19:17-27)
32 Ledoeik ala hela loo Yesus, ala latonggo lo hataholi esa neme dala laladak, fo bei fo neme kota Kirene mai. Ndia naden Simon. Ala lakasetin luꞌa ai ngganggek nggati Yesus. 33 Boe ma ala losa mamanak esa, nade Golgota. (Nai dedeꞌa Aram, ndandaan nae, “Mamana langga duik.”) 34 Ala sangga feen ninu anggol nana seseok no akidoo makaheduk, fo suek Ana bisa nakatataka nala hedis. Yesus ninu kada faak, de, Ana timba henin.✡Sosoda Koa-kio kala 69:22
35 Basa boe ma, ala mbaku Ndia neu ai ngganggek. Boe ma soldadu la hela lot, fo sangga bubuluk see ndia hambu Ndia baloꞌa papaken.✡Sosoda Koa-kio kala 22:19 36 Boe ma ala langgatuuk lanea Ndia. 37 Ala sulak neu papak esa nae,
“YESUS IA, HATAHOLI YAHUDI LA MANEN”
Boe ma ala mbaku papak ndia neu langgan lain, suek lafada tuten hata de ala huku lisa Ndia.
38 Ala mbaku lisa hataholi manggalauk dua lai ndia boe. Esa nai Ndia boboa konan; ma esa nai Ndia boboa kiin.
39 Basa hataholi mana laꞌok lesik ndia, mete Ndia. Boe ma ala muꞌek de haumemeen.†Hataholi Yahudi la lateme kakalek langga nala fo dadik tanda ala haumemee hataholi. ✡Sosoda Koa-kio kala 22:8; 109:25 40 Ala eki Ndia lae, “Wei! O mae O bisa tao matuꞌu heni Manetualain Uma Ina Huhule-haladoin, fo basa na, mambadedei fali kana nai faik telu dalen hetu? Mete ma O tebe-tebe Manetualain Anan, na, soba mboꞌi heni sudik O aom, fo konda muma ai ndia mai leo.”✡Mateos 26:61; Yohanis 2:19
41 Leondiak boe, malangga anggama Yahudi la malangga nala, mese anggama, ma lasi hada kala tungga haumemee Ndia lae, 42 “Ana tao nasoda hataholi feꞌek so, tehuu Ana taa bisa tao nasoda Ndia ao-ina hehelin bae maa. Ana nae, Ndia ndia hataholi Israel asa Manen! Mete ma leondiak, na, malolenak Ana konda memak neme ai ndia mai. Mete ma ita tita leondiak, bei fo ita tamahele teu Ndia. 43 Mete ma Ndia tebe-tebe Manetualain Anan, na, ela,
‘Ana namahena neu Manetualain.
De, mete ma Lamatuak sue Ndia,
na, ela Lamatuak tao nasoda Ndia.’ ”✡Sosoda Koa-kio kala 22:9
44 Hataholi mana mamoa kadua kala sila boe oo, tungga haumemee Ndia leondiak.
Lamatuak Yesus mamaten
(Markus 15:33-41; Lukas 23:44-49; Yohanis 19:28-30)
45 Basa ndia, boe ma makiu-mumuuk mboti nala mamanak ndia neme ledo kamatetun losa liꞌu telu ledo bobon. 46 Nandaa liꞌu telu ledo bobon, boe ma Yesus nanggou nenik dedeꞌa Aram, nae, “Eli! Eli! Lema sabatani?” (Ndia ndandaan nae, ‘Au Lamatuang! Au Manetualain aa! Hatina de Ama heok masadea ela Au leoiak?”)✡Sosoda Koa-kio kala 22:2
47 Hataholi hida deka-deka lai ndia lamanene Ndia halan. Boe ma ala lae, “Wei! Ei mamanene dei. Ana noke Elia, fo Lamatuak mana kokola makahulun ele ndia!” 48 Basa de hataholi esa nalai neu haꞌi lombu, de ana bolon neu anggol makeis. Boe ma ana taon neu ai esa mbedan, de nambomboon neu Yesus bifidoon, fo suek Ana musi.✡Sosoda Koa-kio kala 69:22
49 Tehuu hambu hataholi feꞌek bali kokolak nae, “Mahani dei, fo ita mete sudik, Elia sangga mai tao nasoda Ndia, do taa?”
50 Basa de, Yesus nanggou natingga seluk bali, boe ma Ana mate.
51 Nai Uma Ina Huhule-haladoik, hambu tema babaa ina-huu maloa esa nana londak fo babaa Manetualain Kama Malalaon Ana Seli. Nandaa no Yesus ketu ani hahaen, boe ma tema nana londak ndia sii baꞌen neu dua, neme lain mai losa dae. Boe ma dae nanggeꞌo, losa batu ina-huuk ndala baꞌen.✡Kalua neme Masir mai 26:31-33 52 Late sala boe oo latangga. Ma Manetualain hataholi mana mate nala, luma lasoda fali. 53 Ledoeik Yesus nasoda fali so, boe ma ala kalua leme late sala mai, de leni Yerusalem leu. Hataholi noꞌu kala lita sala lai ndia.
54 Nai Golgota, malangga soldadu esa ma ana palenda nala, lanea Yesus ai ngganggen. Ledoeik lita daebafok nanggeꞌo, ma basa dedeꞌa mana dadi kala sila so, de ala bii lalan seli. Ala lakokola lae, “Awii! Hataholi ia, memak tebe-tebe Manetualain Anan!”
55 Nai ndia boe, hambu inak hida, lita Ndia mamaten neme dook mai. Ala tungga Ndia neme Galelea mai, huu ala ono-lau Ndia neme makahulun mai. 56 Neme ina kala sila, hambu Maria neme Magdala mai, Maria esa bali, (fo ndia Yakobis no Yusuf inan), ma Sabadeus saon (fo ndia Yakobis no Yohanis inan).✡Lukas 8:2-3
Ala latoi Lamatuak Yesus
(Markus 15:42-47; Lukas 23:50-56; Yohanis 19:38-42)
57 Hataholi kama suꞌik esa nai ndia, neme nggolo Arimatea mai, nade Yusuf. Ana tungga Yesus nanonolin dook ia so. Yesus mamaten ndia, laꞌeneu fai Lima. Neu foꞌa mai laꞌeneu hataholi Yahudi la fai huhule-haladoin. Huu ndia de, ledo sangga tesa, boe ma Yusuf sangga dalak fo sangga nakonda Yesus mbombolan neme ai ngganggek mai. 58 Boe ma ana neni gubenol Pilatus neu, fo noke Yesus mbombolan. Basa de gubenol palenda fo ala fee mbombolak ndia neun. 59 Boe ma Yusuf neni Golgota neu. Fo ana nakonda Yesus mbombolan neme ai ngganggek ndia mai. De, ana mbomboti neulalau mbombolak ndia, nenik tema beuk mabeli. 60 Faik ndia, hataholi bei fo mbaꞌa basa lua anak esa nai lete batu, fo sadia memak Yusuf no bobonggi nala late nala, mete ma mate sala. De, Yusuf asa koꞌo Yesus mbombolan fo leu taon neu lua anak ndia. Boe ma ala loli lala batu ina-huuk esa, fo ala kena neulalau lua anak ndia. Basa ndia, boe ma Yusuf asa fali.
61 Faik ndia, Maria maneme Magdala mai, ma Maria feꞌek ndia, ala tungga lai ndia boe. Ala langgatuuk lasale leni bolok ndia leu.
Gubenol fee hataholi la lanea mamanak fo ala mbeda Lamatuak Yesus mbombolan
62 Neu foꞌa main, laꞌeneu hataholi Yahudi la fai hahae tao ues. Boe ma malangga anggama Yahudi la malangga nala, ma hataholi Farisi la leu lasale gubenol. 63 Ala lafada lae, “Ama gub, ai masaneda faik fo masapepekok ndia bei nasoda, ana nafada nitak nae leoia: ‘Memak Au mate, tehuu seli faik telu, boe ma Au asoda fali.’✡Mateos 16:21; 17:23; 20:19; Markus 8:31; 9:31; 10:33-34; Lukas 9:22; 18:31-33 64 Huu ndia de, ama tulun fee soldadu la lanea latalolole lates ndia, losa fai katelun. No leondiak, Ndia ana mana tungga nala taa bisa lamanaꞌo lala Ndia mbombolan, fo pepeko hataholi lae, Ana nasoda fali so. Huu mete ma ala pepeko leondiak, na, ndia manggalaun lena sila pepeko makahulun ndia, fo ledoeik lae Ndia ndia, Karistus.”
65 Namanene leondiak, boe ma gubenol nataa, nae, “Malole boe! Tehuu hambu ei hataholi mala lanea aom. Malolenak kada pake sila, fo leu lanea latalolole mamanak ndia.”
66 Basa de leni mamanak ndia leu, ma loo sila hataholi mana manea nala. Losa ndia de ala segel lisa batu manai lates lelesun.‡Malela kala lae, ala segel lenik abas neu batu ma bolok lindin, ma ala tao lak ndule neu batu ndia. Boe ma ala ladenu hataholi lanea lakandoo mamanak ndia, fo hataholi feꞌek boso mai haꞌi lala mbombolak ndia.
*27:2 Faik ndia, hataholi Yahudi la hak taa, fo tao lisa hataholi. Huu ndia, de ala loo Lamatuak Yesus neni mana palenda Roma neu.
✡27:8 Hataholi Nadedenu nala Tutuin 1:18-19
✡27:10 Sakarias 11:12-13; Yermia 18:2-4; 19:1-11; 32:6-15
†27:16 Susula dedeꞌa Yunani luma sulak, lae, ‘Yesus Barabas’, ma luma bali sulak, lae, kada ‘Barabas’.
✡27:24 Tui Seluk laꞌeneu Dala Sodak 21:6-9
‡27:26 Soldadu Roma la pake fifilok nana taok neme uak louk hida. Basa boe ma ala mbaꞌa dui matande do tima matande nai tali sila mbedan. Mete ma filo taa-taa nenik fifilok ndia, louk lofa heni.
§27:27 Soldadu la mamanan, ndia na, nai dedeꞌa latin lae, praetorium. Soldadu la mamana heheli nala nai babaꞌek uma dinas. Susula Malalaok dedeꞌa Yunani loke sila nonoo nala spreira esa. Spreira esa, na, sama leo soldadu natun nee.
*27:28 Matius sulak nae, badu manaluk ia ‘mbila-manggaledok’. Markus sulak nae, ‘mbila-balanggeok’.
✡27:34 Sosoda Koa-kio kala 69:22
✡27:35 Sosoda Koa-kio kala 22:19
†27:39 Hataholi Yahudi la lateme kakalek langga nala fo dadik tanda ala haumemee hataholi.
✡27:39 Sosoda Koa-kio kala 22:8; 109:25
✡27:40 Mateos 26:61; Yohanis 2:19
✡27:43 Sosoda Koa-kio kala 22:9
✡27:46 Sosoda Koa-kio kala 22:2
✡27:48 Sosoda Koa-kio kala 69:22
✡27:51 Kalua neme Masir mai 26:31-33
✡27:63 Mateos 16:21; 17:23; 20:19; Markus 8:31; 9:31; 10:33-34; Lukas 9:22; 18:31-33
‡27:66 Malela kala lae, ala segel lenik abas neu batu ma bolok lindin, ma ala tao lak ndule neu batu ndia.