6
Ëyërö ëköny tic abïrö
1 Ï karë nön na wel ëlübkör Yecu onwongo tye ka mëdërë, Eyuda n'oyeo Yecu na twakö gïnï lëb Girik öcakö gïnï ngüngüta ï kom Eyuda na twakö lëb Iburu, pïën nïnö kïbëc ka epoko cem mon thöö na mëgï ba ëparö pïrgï. 2 Cë ëkwëna apar arïö ocwodo gïnï ëlübkör Yecu kïbëc ëka okobo gïnï nï, “Wan ëkwëna myero ebed ï tic më tïtö köp k'Obanga ëk kür ebed ï tic më poko cem. 3 Pï manön utmegona, yër unu jö abïrö kï kinwu n'ëwörögï, n'opong gïnï kï Tipo Naleng ëka tye gïnï kï ryëkö. Wan ebino mïögï tic ni. 4 Ëntö wan ebino mïrë më lëga ëka tïtö köp k'Obanga.”
5 Ngö na gïn okobo oyomo cwiny jïï kïbëc, ëka gïn öyërö Citipwano, dhanö n'opong kï yee ëka kï Tipo Naleng, ëyërö thon Pilipo, Porokuro, Nikanori, Timon, Paramena, ëka Nikolac n'obedo dhanö më Antiokia n'ölökërë ï dini k'Eyuda. 6 Ekelo jö abïrö ni ï nyim ëkwëna, n'ölëgö nakun ketho gïnï cïng-gï ï wigï.
7 Cë köp k'Obanga ömëdërë më nya. Wel ëlübkör Yecu ömëdërë rwök ï Jerucalem, ëka ëlamdhök k'Eyuda na pol oyee gïnï thon.
Ëmakö Citipwano
8 Citipwano, n'Obanga ömïö gum ëka kï tëkö, obedo ka tio gin më aura ëka anyuth më tango ï kin jïï. 9 Ëntö ï nïnö mörö acël, jö mörö më cinagoga ka jö n'ëgönyögï kï ï opii, kanya acël kï jö mökö më Cirene ëka më Alegijandaria ëka jö n'öya kï ï lobo më Cilicia ëka Acia, jö ni obedo ka pyem kï Citipwano, 10 ëntö gïn onwongo ba twërö pyem kï ryëkö ka Citipwano ëka kï Tipo Naleng n'onwongo ën twak ködë.
11 Cë gïn öcakö cüpö jïï ï müng ëk okob gïnï nï, “Wan ewinyo Citipwano twak nakun kobo köp më ayeny ï kom Muca ëka Obanga.” 12 Cë gïn othuro jïï, edong ëka epwony cïk më dini. Ëka ëmakö Citipwano cë ekelo ën ï nyim athuko më öd okiko k'edong.
13 Gïn okelo ecaden n'obedo gïnï etwodo n'okobo nï, “Karë kïbëc ëcwö ni twakö köp na rac ï kom kabedo na leng ëka ï kom cïk ka Muca. 14 Wan ewinyo ën ka kobo nï Yecu ni më Najaret bino balö kabedo ni*Kabedo ni Obedo Öt k'Obanga na tye ï Jerucalem. ökö ëka bino lökö kit më kwö na yam Muca ömïöwa.”
15 Jö kïbëc n'onwongo obedo gïnï ï athuko më öd okiko k'edong öcïkö wang-gï ï kom Citipwano, ëka önënö gïnï terinyime na calö terinyim malaika.