1 Yam onwongo ëcwö mörö tye ï Cecaria na nyïngë Korinelio, adit më dul acikari n'ecwodo nï më Itali. 2 Ën onwongo ödyërë ëka lworo Obanga kï jö më ödë kïbëc. Ën onwongo thon mïö jami na pol më könyö ëcan, ëka lëgö both Obanga jwijwi. 3 Ï nïnö mörö acël ï kin caa abungwën më kothyeno, ën önënö malaika k'Obanga ï anyuth n'obino bothe ëka okobo nï, “Korinelio!”

4 Korinelio öcïkö wangë bothe kï lworo, cë okobo both malaika nï, “Adwong, kob nïna ngö nï mïtö.”

Malaika ögamö nï, “Lëgani kï mïc më könyö ëcan othuno malö both Obanga, ömïö ën opo piri. 5 Kobedi dong or cwö mörö yo Jopa ëk öcïdh okel gïnï ëcwö na nyïngë Cimon n'ecwodo nï Petero. 6 Ën bedo ï pacö ka Cimon anyöng löö, na ödë tye ï dhö nam.”

7 Ï karë na malaika n'ötwak ködë öcïdhö ökö, Korinelio ocwodo etic mërë arïö ëka acikari acël n'ödyërë kï kin jö na gwökö ën. 8 Ën okobo nïgï köp kïbëc n'ötïmërë ëka oorogï yo Jopa.

9 Kodiko mërë na caa abicël dong cwök, n'ëkwëna ka Korinelio tye ï wothgï na dong cwök dönyö gïnï ï pacö, Petero öïdhö ï wi öt malö më cïdhö ï lëga. 10 Kec öcakö neko ën, nakun mïtö nï ëcam gin mörö, ëntö onwongo pod ëyübö cem ayüba cë öcakö nënö anyuth. 11 Önënö polo öyabërë ëka gin mörö na cal kï cüka na thwönë obino pïny nakun tye kï thwoke angwën. 12 Ï cüka nön onwongo tye ïë kwa leeni na tyën-gï angwën, leeni na wotho ï ngöm kï korgï, ëka kï wïny na ngwëcö kï malö. 13 Cë dwön mörö obino bothe nakun kobo nïnë nï, “Petero yaa malö, inek, ëka ïcam.”

14 Ëntö Petero ögamö nï, “Rwoth pathï nï kömanön, pïën an anaka yam bara acamö gin mörö n'obedo më kwer onyo na ba leng.”

15 Dwön dökï ötwak ködë wang më arïö, “Kür icwod gin mörö nï ba leng n'Obanga ömïö ödökö na leng.”

16 Man ötïmërë wang adek, cë cücüth gin nön ëdwökö ökö ï wi polo.

17 Ï karë na Petero onwongo pod tye ka uro tyën köp më anyuth na ën önënö, cwö na Korinelio oorogï onwongo gïnï öt na Petero tye ïë, cë ocung gïnï ï dhö wangkac. 18 Gïn öcakö cwodo, nakun penyo gïnï ka Cimon n'ecwodo nï Petero bedo kany nön.

19 Ï karë na Petero pod tye ka thamö ï kom anyuth na ën önënö, Tipo Naleng okobo nïnë nï, “Petero, cwö adek tye ka rangöni. 20 Yaa malö, ïcïdh pïny iwoth ködgï. Kür ïkwër më woth ködgï, pïën an aorogï.”

21 Petero öcakö cïdhö pïny ëka okobo both cwö nön nï, “An ënë ngat na un itye ka rangö. Tyën köp ngö n'ömïö un ibino?”

22 Gïn ögamö nï, “Wan ëya kï both Korinelio n'obedo adit acikari më Roma. Ën obedo dhanö na kite atïr ëka lworo Obanga, na jö kïbëc n'obedo Eyuda wörö. Malaika na leng okobo nïnë nï ëk ocwodi ïcïdh ï ödë, ëk ën owiny ngö na in ïrömö kobo.” 23 Cë Petero ocwodogï ëka oterogï ï öt më bedo wele mërë.

Kodiko mërë Petero öcakö woth ködgï, ëka utmego mökö kï ï Jopa owotho ködgï. 24 Ï nïnö na lübö manön gïn othuno ï Cecaria. Korinelio onwongo tye ka kürögï ëka onwongo ocwodo wede ëka nyikonei mërë kïbëc na cwök ködë. 25 Ï karë na Petero tye ka dönyö ï öt, Korinelio oromo ködë ëka opodho oryebere pïny ï tyënë më wörö ën. 26 Ëntö Petero otingo ën malö nakun kobo nï, “Yaa malö icung, an thon abedo dhanö adhana kamë in.”

27 Petero obedo ka twak kï Korinelio ëka ödönyö ï öt cë onwongo jö na pol n'öcökërë gïnï. 28 Ën öcakö kobo nïgï nï, “Un kïbëc ingeo nï cïk ba yeo nï ëk Ayuda mörö örïbërë k'Arok mörö, kadï thon thuno bothe, ëntö Obanga dong otyeko nyutho nïna nï kür acwod dhanö mörö nï ba opore onyo nï ba leng. 29 Ï karë n'ecwoda, an abino na ba akwërö. An apenyi, kob nïna pïngö icwoda?”

30 Ëka Korinelio ögamö nï, “Nïnö angwën n'opoth angec, an onwongo atye ï lëga ï öda ï koth caa ni, caa abungwën më kothyeno. Athura ëcwö mörö n'oruko böng na ryëny ocung ï nyima 31 ëka okobo nï, ‘Korinelio, Obanga otyeko winyo lëgani ëka opo pï mïcni na in ïmïö both ëcan. 32 Kobedi dong or jö mörö yo Jopa both Cimon n'ecwodo nï Petero. Ën obedo welo ï pacö ka Cimon n'obedo anyöng löö na bedo ï dhö nam.’ 33 Cë aoro jïï ökö cücüth, ëka in thon ïtïmö bër më bino. Kobedini wan kïbëc etye kany ï nyim Obanga më winyo köp kïbëc na Rwoth öcïkö bothi më kobo nïwa.”

34 Cë Petero öcakö twak na kobo nï, “An dong anïang adyer nï Obanga kara ba poko kin dhanö 35 ëntö yeo jö kïbëc më rok na papath na lworo ën ëka tio gin na tye atïr. 36 Un ingeo köp na yam Obanga ooro both jö më Icarael, nakun tïtö nïgï Emuth na Bër më kuc na bino pï Yecu Kiricito na ën Rwoth ka jö kïbëc. 37 Un ingeo ngö n'ötïmërë ï Yudea kïbëc, cakërë kï ï Galilaya kinge batica na Jon ötïtö 38 kite n'Obanga owiro Yecu më Najaret kï Tipo Naleng ëka tëkö. Cë Yecu owotho ï kabedo kïbëc na tio tic na bëcö ëka cangö jö kïbëc n'onwongo Catan yelogï, pïën Obanga onwongo tye ködë.

39 “Ëka wan ëkwëna ebedo ecaden më jami kïbëc na ën ötïmö ï lobo k'Eyuda ëka ï Jerucalem. Gïn oneko ën n'eguro agura ï kor yath arïa, 40 ëntö Obanga ocero ën kï kin jö n'öthöö ï nïnö më adek ëka ömïö ën onen, 41 jö kïbëc ba önënö ën, ëntö onen bothwa wan jö n'Obanga onwongo öyërö cön më bedo ecaden mërë. Wan ënë jö n'ocemo ëka emedho ködë ï karë na ën ocer kï kin jö n'öthöö. 42 Ëka öcïköwa më cïdhö tïtö köp ï kabedo kïbëc ëka më mïö caden nï Yecu ënë ngat n'Obanga öyërö më bedo angöl-köp ka jïï kïbëc, jö na kwö kï jö n'öthöö. 43 Edwarpïny kïbëc mïö caden ï kome nï ngat acëlacël na yee ï kome ebino tïmö kïca ï balgï kï nyïng Yecu.”

44 Na Petero pod tye ka twakö köp ni, Tipo Naleng opye ï kom jö kïbëc n'onwongo tye ka winyo köp mërë. 45 Eyuda n'oye n'ëlïrögï n'owotho gïnï kï Petero obedo kï ur nï mïc më Tipo Naleng ëmïö thon both Erok. 46 Pïën gïn owinyogï ka twakö lëb na papath ëka pakö gïnï Obanga.

Cë Petero okobo nï, 47 “Ngat mörö tye na römö jükö nï kür ebatica jö ni kï pii? Gïn dong otyeko nwongo Tipo Naleng kite na onu thon enwongo ködë.” 48 Cë ën ömïö twërö nï gïn myero ebaticagï kï nyïng Yecu Kiricito. Cë gïn ökwaö Petero më bedo bothgï pï nïnö mörö na nönök.