1 Ï karë nön rwoth Erode öcakö makö jö mökö kï kin jö n'oye Kiricito. 2 Ën oneko Yakobo ömïn Jon kï pala abadë. 3 Ï karë na ën dong önënö nï oyomo cwiny Eyuda, ën ömëdërë kï makö Petero thon. Man ötïmërë ï karë më Kwer më Ogati na Thöbï ope ïë. 4 Kinge makö Petero, oketho ën ï buc, ëka ëmïö ën ï cïng ëkürpïny na tye gïnï jö angwënangwën ï dul angwën. Erode öthëna më kelo Petero ï nyim lwak ëk ëtëm pido köp ï kome kinge nïnö më Poth.

5 Ëntö ï karë na Petero tye ï buc, jö n'oye Kiricito obedo ka mëdërë gïnï kï lëga both Obanga pïrë.

6 Ï kiwor mërë na dong myero Erode okel ën ï nyim okiko më atëma, Petero onwongo obuto pïny n'önïnö ï kin acikari arïö, nakun etweo ën kï jëgëlë arïö, ëka jö na kürö pïny thon onwongo tye ka kürö dholokek më buc. 7 Athura, malaika ka Rwoth onen ëka tar öryëny öcarö ï buc. Ën odhongo lak nget Petero ëka ocoo ën ökö, nakun kobo nïnë nï, “Yaa malö pïöpïö!” Cë jëgëlë opodho ökö kï ngut cïngë.

8 Cë malaika okobo nïnë nï, “Ruk böngüni ëka wori.” Ëka Petero ötïmö nï kömanön. Malaika dök okobo nïnë nï, “Kac cükani ï komi ëka ïlüb köra.” 9 Ëka Petero öcakö lübö körë yo yökö kï ï buc, ëntö ën onwongo ope kï thama mörö këkën nï gin na malaika tye ka tïmö onwongo tye ka tïmërë adyer, ën onwongo thamö nï etye ka nënö gin anyutha ï wang lek. 10 Gïn ökadhö ëkürpïny më acël ëka më arïö cë obino gïnï naka ï dholokek nywenyo na wok cïdhö yo pacö. Dholokek öcakö yabërë kënë nïgï, ëka owok gïnï kï ï ïë. Ï karë na gïn dong owotho othuno ï gudo, malaika öcakö wëkö Petero ökö athura.

11 Ëka Petero öcakö nïang kënë nakun kobo nï, “Kobedi dong anïang atïr nï Rwoth ooro malaika mërë më laröna kï ï cïng Erode, ëka kï kom gin na kïbëc n'Eyuda önënö gïnï nï bino tïmërë ï koma.”

12 Ï karë na ën dong önïang na bër, öcakö cïdhö ï öt ka Maria aya ka Jon n'ecwodo thon nï Marako, kanya jö na pol onwongo öcökërë gïnï ïë, ëka tye gïnï ï lëga. 13 Petero ödwöngö dholokek më wangkac na dönyö ï pacö, ëka atic më pacö nön na nyïngë Roda obino yo bothe më yabö dholokek. 14 Ï karë na ën önïang ï dwön Petero, cwinye obedo na yom rwök, öcakö ngwëc ödök cen na ba öyabö dholokek ëka okobo nïgï nï, “Petero tye ocung ï dholokek yökö!”

15 Gïn okobo nïnë nï, “In wii ba tio.” Ëntö ï karë na ën ökwërö nï tye atïr, gïn öcakö gamö nïnë nï, “Manön twërö bedo malaika mërë.”

16 Ëntö Petero ömëdërë kï dwöngö dholokek, ëka na gïn öyabö dholokek önënö gïnï ën, cë gïn obedo kï ur rwök. 17 Ëka Petero öcakö jükögï kï cïngë nï ëk ölïng gïnï ökö, cë öcakö kobo nïgï kite na Rwoth ökwanyö ën ködë yökö kï ï buc, ëka dök okobo nïgï nï, “Kob unu nï Yakobo ëka utmego nökënë ngö n'ötïmërë.” Cë öcakö yaa öcïdhö yo kany ökënë.

18 Kodiko na pïny oru, arubaruba obedo tye ï kin acikari na rac, pï gin n'ötïmërë ï kom Petero. 19 Kinge n'Erode ömïö twërö më rangö Petero kï tëk cë ba onwongo, öcakö penyo ëkürpïny ëka ömïö twërö nï ëk enekgï ökö.

Cë Erode öya kï ï Yudea öcïdhö ï Cecaria ëka obedo kunön pï karë mörö na nönök.

20 Erode obedo ka dhaa kï jö më Turo ëka Cidon cë öcökërë gïnï kanya acël më bino twak ködë. Ka gïn onwongo twërö kï both Blacito, atic ka rwoth n'egeno, gïn openyo Erode nï ëmïtö gïnï kuc, pïën lobogï jengere ï kom lobo ka rwothgï pï cem n'ekelo nïgï.

21 Ï nïnö n'emoko, Erode onwongo oruko ruk më ker mërë, cë öcïdhö obedo ï wi then ker mërë ëka öcakö twak kï lwak. 22 Lwak öcakö redo kï wöö rwök nï, “Man ënë dwön obanga, pathï më dhanö.” 23 Cücüth, malaika ka Rwoth ömïö ën otwore pïën ba ömïö dheo both Obanga ëka kudi öcakö camö kome cë öthöö ökö.

24 Ëntö köp k'Obanga ömëdërë amëda më nya.

25 Ï karë na Baranaba gïn kï Caulo otyeko gïnï tic n'eorogï ïë, cë ödök gïnï ï Jerucalem, nakun wotho gïnï kanya acël kï Jon n'ecwodo nï Marako.