1 Ï karë na dong emoko nï myero wan ëkwang më cïdhö yo Itali, Paulo ëka emabuc nökënë ëmïögï ï cïng adit acikari na nyïngë Juliac, na löö nget dul mia acël kï kin dul acikari n'ecwodo nï Augucito. 2 Wan ëdönyö ï mel n'öya kï Adramitio n'onwongo cwök kwang më cïdhö ï dhö nam më lobo Acia, ëka wan ëcïdhö ï dhö nam, wan k'Aricitako dhanö më lobo Macedonia na tye ï Tecalonika.

3 Kodiko mërë wan ethuno ï Cidon, ëka Juliac kï cwinye na bër ï kom Paulo, öwëkö ën më cïdhö both nyikonei mërë ëk ömïï gïnï ën gin na ën mïtö. 4 Kï kunön, wan dök ëya më kwang cë ewok ï nget cula nam më Caiprac pïën yamö onwongo yelowa. 5 Ï karë na dong ëkwang ëngölö dye nam na lac n'opimere kï dhö nam më Cilicia ëka Pampulia, wan ethuno ï Mira na tye ï Licia. 6 Kï kunön adit acikari onwongo mel n'öya kï ï Alegijandaria na tye ka cïdhö yo Itali, cë ömïöwa ëdönyö ïë. 7 Wan ëkwang momoth pï nïnö na pol, ëka ethuno kï tëk ï nget lobo Kuniduc. Ï karë na yamö öjüköwa ökö më mëdërë atïr, wan ëkwang eroko nget cula nam më Kurete n'opimere kï Calamone. 8 Wan eroko nget cula nam më Kurete kï tëk cë ethuno ï kabedo n'ecwodo nï Kabedo na Bër na mel cung ïë, na cwök kï pacö më Lacea.

9 Wan onwongo ëbalö caa na pol ëka kwang thon onwongo ödökö na rac, pïën nïnö na dit më Rio Kec*Ï koth karë ni, kwang ï nam onwongo bedo na tëk pïën yamö nwongo ger. onwongo opoth ökö. Cë Paulo ötwak k'edite më mel nï, 10 “An anënö nï wothwa ni bino bedo na rac, ëka bino rwenyo jami na pol kï ï mel, pathï yëc këkën ëntö kwö onu thon.” 11 Ëntö adit acikari nakaka winyo ngö na Paulo okobo, ën ölübö thama k'adwö mel ëka më ka won mel. 12 Kite na kanya mel cung ïë nön onwongo ba bër ï karë më ngïcö, jö na pol öthamö nï myero ëkwang ëcïdh gïnï anyim, kï gen më thuno ï Poinike ëk etyek karë më ngïcö kunön. Man onwongo obedo ka cungo ka mel na tye ï Kurete, na nyime okemo kukwap kuthö ëka kukuju kuthö.

13 Ï karë na yamö n'öya kï kukwap öcakö kudho momoth, gïn öthamö nï man dong örwatërë kï ngö n'onwongo gïn mïtö. Cë öcakö gïnï ywanö gin na jükö mel ökö kï ï pii, ëka öcakö gïnï kwang nakun roko gïnï nget cula nam më Kurete. 14 Na bara önyïkö na bor, yamö na ger n'ecwodo nï, “Yamö më kukuju kukïdë” öcakö kudho kï tëk n'öya kï ï cula nam. 15 Yamö ömakö mel ëka opango wie na ba dök twërö kemo kukur yamö cë ëwëkö mel më cïdhö kanya yamö mïtö terowa ïë. 16 Na dong wan eroko nget cula nam na tïdï n'ecwodo nï Kauda, wan ëtëmö kï tëk më larö yeya.†Yeya onwongo obedo më kwang ka pëkö tye ï mel. 17 Ï karë n'etic më mel öywaö yeya, otingo gïnï kï ï pii cë ekelo ï mel, gïn öcakö mïö thöl owok kï ï thë mel cë etweo ködë kanya acël. Gïn onwongo tye kï lworo nï onyo ërömö dönyö gïnï ï kwoo më Ciritic ï dhö nam më Libia, cë gïn öcakö lyano gin na jükö mel pïny ëk ömïï mel owoth momoth nakun yamö ënë kölö. 18 Kodiko mërë na yamö na ger ömëdërë kï kudho rwök, cë etic më mel öcakö gïnï yuno jami ökö kï ï mel ï öd pii. 19 Ï nïnö më adek, öcakö gïnï yuno jami kom mel mökö ï öd pii kï cïng-gï. 20 Wan ebedo pï nïnö na pol na ba ënënö wang ceng onyo cër, ëka yamö ömëdërë kï kudho na rac. Ï ajiki mërë wan ëjalö gen kïbëc më larö kwöwa.

21 Kinge na jö n'onwongo tye ï mel obedo gïnï pï nïnö na pol na ba camö gïnï gin mörö, Paulo öya malö ocung ï nyimgï cë okobo nï, “Un onwongo myero iwinya unu ëk kür ëya kï ï Kurete, kono ba epodho ï can ni ëka kï rwenyo jami. 22 Ëntö kobedini akwaöwu nï ïdïï unu cwinywu, pïën kwö ka ngat mörö kï ï kinwu ba bino rwenyo, ëntö mel ënë bino bal ökö. 23 Wono kiwor malaika k'Obanga na an abedo dhanö mërë ëka na an atio pïrë, obino ëka ocung ï ngeta 24 cë okobo nï, ‘Paulo, kür ibed kï lworo. In myero icung ï nyim Cija, ëka Obanga otyeko mïö kwö ka jö na in iwotho ködgï kïbëc bothi.’ 25 Dong bed unu na cwinywu tëk, pïën atye kï yee ï kom Obanga nï gin na kïbëc bino tïmërë kite na ën okobo nïna ködë. 26 Ëntö wang na mel otwomere kï cula nam mörö.”

27 Ï kiwor më nïnö më apar angwën, yamö onwongo pod terowa arii ï dyere nam më Adria, cë na dong cwök römö dingwor, etic më mel opimo nï ëcwök thuno gïnï ï ngöm. 28 Ï karë na gïn opimo thuth më ï nam cë onwongo gïnï nï römö tyëlö mia acël kï pyer arïö. Kinge na gïn dök önyïnyïkö na nönök, opimo gïnï cë onwongo nï thuth mërë römö tyëlö pyer abungwën. 29 Gïn onwongo lworo nï mel twërö twomo kidi kï öd nam cë öcakö gïnï bolo gin na jükö mel angwën kï kungee, ëka öcakö gïnï lëga nï ëk pïny oru. 30 Ï karë n'etic ï mel onwongo tye gïnï ka rangö yoo më lüü ökö kï ï mel, gïn otero yeya ï nam na calö mïtö gïnï bolo gin na jükö mel kï kunyime. 31 Cë Paulo okobo n'adit acikari ëka acikari gïnï nï, “Ka etic më mel ba obedo gïnï ï mel onu ba ebino kwö.” 32 Cë acikari öcakö gïnï ngölö thöl na makö yeya ëka ëwëkö opodho ï öd pii.

33 Ï karë na pïny dong mïtö ruu, Paulo öcükö cwinygï kïbëc më cem. Ën okobo nï, “Pï nïnö apar angwën n'opoth, un ibedo kï thwön par na dit ëka ba ïcamö unu gin mörö. 34 Kobedini akwaöwu ïcam unu cem mörö pï bedo na kwö. Ngat mörö ope kï kinwa na bino rwenyo yer wie mörö acël.” 35 Kinge na dong okobo köp ni, ökwanyö ogati, öpwöyö Obanga ï nyimgï ëka opoko ïë cë öcakö camö. 36 Gïn kïbëc cwinygï öjïng ëka öcakö gïnï cem. 37 Jö kïbëc na tye ï mel onwongo tye 276. 38 Ï karë na dong ocemo gïnï oyeng, oyuo gïnï ngano kïbëc ï öd nam ëk mel obed na yot.

39 Na pïny dong oru, gïn ba ongeo lobo nön, ëntö önënö gïnï dhö nam n'opong kï kwoo, kanya gïn omoko thamagï më tero mel ïë ka twërë. 40 Öngölö gïnï gin na jükö mel, cë ëwëkö ölüny ökö ï nam, ï caa nön thon ögönyö gïnï thöl na makö gin n'ëdwö kï mel. Cë öngabö gïnï böngü na tïdï kï kunyime ëk yamö ömakï, ëka ëwëkö mel öcïdhö na kemo dhö nam. 41 Ëntö ï karë na gïn othuno kanya pii më nam romo ïë, cë nyim mel otwomere kï kwoo na tye ï thë pii ëka mel omoko ökö na tëk, thërë thon ötür na thïthïnö kï tëkö ka pii.

42 Acikari öcakö gïnï yübö köp më neko emabuc ëk mörö kür ökwang ölü ökö. 43 Ëntö adit acikari onwongo mïtö larö kwö ka Paulo, cë öjükögï kï yübgï nön. Ën ömïö twërö nï jö na ngeo kwang öcak gïnï pye ï pii më cïdhö ï lak nam. 44 Jö nökënë ölüb körgï ï wi bao onyo ï wi ngïny mel n'ötütüra. Cë öwëkö gïn kïbëc othuno yo dhö nam na bër.