1 Ï karë na wan dong ethuno na bër ï dhö nam, enwongo nï cula nam nön ecwodo nï Malta. 2 Jö na bedo ï cula nam nön obedo gïnï kï cwiny më kïca ï komwa, ëka öjölöwa gïnï na bër. Oobo gïnï mac pïën köth onwongo öcakö cwe ëka pïny thon onwongo ngïc. 3 Paulo öcökö rïdö yen cë obolo ï mac, ëka thwol omwomo pï lyetho ka mac cë ödölërë ï cïngë. 4 Ï karë na jö na bedo ï cula nam nön önënö gïnï thwol n'ödölërë ï ngut cïng Paulo, cë öcakö gïnï twak kën-gï nï, “Adyer ëcwö ni myero obed anek. Kadï bed öbüc kï ï nam, Angöl-köp atïr ba bino yeo nï nïnë më bedo na kwö.” 5 Ëntö Paulo ötëngö thwol obolo ï mac na ba ötïmö ën kï gin mörö na rac. 6 Jïï obedo ka kürö nakun thamö gïnï nï badë cakö kwot onyo mïö ën thöö athura. Ëntö gïn ökürö pï karë na lac ëka önënö gïnï nï gin mörö na rac ba ötïmërë ï kome ëka öcakö lökö thamagï ökö cë okobo gïnï nï ën obedo obanga.

7 Ï nget nam kany nön onwongo tye pwothi ka Pubilia adit na löö cula nam. Ën öjölöwa ëka ögwököwa na bër pï nïnö adek. 8 Ï karë nön apap ka Pubilia onwongo kome lïth, obuto pïny na two lyetho ömakö ëka cadö remo. Paulo öcïdhö bothe më nënö ën, kinge lëga oketho cïngë ï kome, ëka öcangö ën. 9 Kinge na man dong ötïmërë, etwoe nökënë kïbëc na tye gïnï ï cula nam obino gïnï bothe ëka öcang gïnï. 10 Gïn ömïöwa wörö kï mïc na pol ëka ï karë na wan ëcakö woth, gïn dökï okelo jami na mïtërë më könyöwa ï wothwa.

11 Kinge dwethe adek, wan ëmëdërë kï wothwa kï mel mörö na dit n'öya kï ï Alegijandaria n'obedo ï cula nam nön ï karë më ngïcö na tye kï cal wi rudi k'obanga.*Rudi k'obanga na nyïng-gï Kactor ëka Pulak. Both jö më Roma onwongo obedo obanga më woth. Më nënö cërgï n'onwongo etero na calö gin na bër pï jö na kwang kï mel. 12 Wan ethuno ï Cirakuca ëka ebedo kunön pï nïnö adek. 13 Ëka kï kunön wan ëya ethuno ï Regio. Kinge nïnö acël yamö na yaa kï kukwap okudho cë ï nïnö më arïö wan ethuno ï Puteoli. 14 Kï kunön wan enwongo utmego mökö n'öjölöwa gïnï më bedo bothgï pï cabït acël. Kinge wan ëya ëka ethuno ï Roma. 15 Utmego na tye kunön owinyo gïnï nï wan etye ka bino, gïn obino naka ï cuk k'Appioc, ëka kabedo n'ecwodo ni Öt Wele Adek më rwatërë ködwa. Ï caa na Paulo önënögï, öpwöyö Obanga ëka cwinye ödökö na tëk. 16 Ï karë na wan ethuno ï Roma, gïn oyeo nï Paulo obed ï ödë kënë ëka k'acikari na gwökö ën.

17 Kinge nïnö adek, Paulo ocwodo ëtëla k'Eyuda kanya acël. Ï karë na gïn öcökërë, ën okobo bothgï nï, “Utmegona, kadï bed ba atïmö gin mörö na rac ï kom jö onu onyo ï kom cïk ka kwere onu, an onwongo ëmaka kï ï Jerucalem ëka ëmïa ï cïng jö më Roma. 18 Jö më Roma ötëmö gïnï rïpö köp ï koma ëka onwongo mïtö gïnï gönyöna, pïën ba onwongo gïnï bal mörö ï koma na römö ngölö nïna thöö. 19 Ëntö ï karë n'Eyuda ökwërö gïnï ökö, ömïö an atero kokona më pido both Cija, kadï bed onwongo ape kï miti më ketho adoth ï kom jö na mëga kikome. 20 Pï tyën köp ni, ënë ömïö an akwaö më nënö ëka më twak kodwu ëk akob niwu körë kï körë nï an etwea kï jëgëlë pïën an ayee nï gen ka jö Icarael otyeko bino dong ökö.”

21 Gïn ögamö nï, “Wan ba enwongo waraga mörö n'öya kï Yudea na makö köp ï komi, ëka ngat mörö ope kï kin utmego n'ömïö ngec onyo n'okobo köp mörö na rac ï komi. 22 Ëntö wan ëmïtö winyo kite na thamani tye ködë, pïën wan engeo nï jö na tye gïnï ï kabedo kïbëc twak gïnï na rac ï kom dul ni.”

23 Gïn öyübö më rwatërë kï Paulo ï nïnö nökënë, ëka jö na pol obino gïnï bothe ï öt kanya onwongo ën bedo ïë. Cakërë kodiko naka kothyeno ën obedo moko caden ëka kï gönyö tyën köp më ker k'Obanga ëka ötëmö më lökö thamagï ï kom Yecu kï cïk ka Muca ëka kï cöc k'edwarpïny. 24 Jö nökënë oyeo gïnï köp na ën ötwakö, ëntö jö nökënë ba obino oyee. 25 Gïn ba oyere ï kin-gï kën-gï ëka öcakö gïnï këth kinge köp na Paulo ötwakö nï, “Tipo Naleng yam okobo köp n'atïr both kwerewu nakun wok kï dhö adwarpïny Icaya nï,

28 “Pï manön amïtö nï inge unu nï larë ni na yaa kï both Obanga dong ëmïö ökö both Erok, ëka gïn bino winyo.” 29 Ï karë na ën okobo köp ni, Eyuda öya öcïdhö gïnï ökö nakun pyem gïnï rwök ï kin-gï kën-gï.†Baibul nökënë ba ketho tyeng ni.

30 Pï mwaka arïö Paulo obedo kunön ï ödë na ën opango ëka obedo jölö jö kïbëc na bino gïnï bothe. 31 Ën obedo ka tïtö köp më ker k'Obanga ëka pwony ï kom Rwoth Yecu Kiricito. Ëka ngat mörö ba ötëmö më jükö ën.