1 Tị́tọ̃, mí igá ꞌbá mídrị́ ꞌdĩ kí ãrútáŋá idéjó ꞌbá kí drị̃lẹ́ gá rĩ kí ụrụꞌbá gá, ãzị́táŋá ĩꞌbadrị̂ kí ị̃nzị̃jó sĩ adrujó bábá sĩ ị́jọ́ múké rĩ idéjó. 2 Ílũ ĩꞌbaní ꞌbã jọ kí ị́jọ́ ũnzí ꞌbá ãzí ụrụꞌbá gá ku, ꞌbã ãwã kí ꞌbá kí abe ku, ꞌbã ndre kí ꞌbá ꞌbã ízákĩzã ãzíla ꞌbã rụ kí ꞌbá kí ị́jọ́ jã sĩ.

3 Ãma ándrá aza sĩ ị́jọ́ ũnzí kí idé agá drị̃ ũnzí sĩ, ãma acá dó ãtíꞌbó ru ũlẽ ị́jọ́ ũnzĩ idéjó rĩ áni. Ãri sáwã izalé ídri ãmadrị̂ agá ꞌbá kí ngụ̃jó ãzíla ꞌbá kí ndrejó mịfị́ ũnzí sĩ. Ị́jọ́ ꞌdĩ sĩ, ꞌbá ãzí rĩ ngụ̃ kí ãma ũnzí ãngũ vâ kí ũnzí. 4 Wó ásị́ ị̃gbẹ̃ ãzíla lẽtáŋá Ãdróŋá ãma Palépi rĩ drị́ rĩ la mụ ru iꞌdalé ꞌbo, 5 pa ãma rá, adru ãmaní ị́jọ́ múké idélé rĩ sĩ ku, wó ásị́ ị̃gbẹ̃ ĩꞌdidrị́ gá rĩ sĩ. Ũjĩ ị́jọ́ ũnzí ãmadrị̂ kí ãzíla fẽ ãmaní ídri úꞌdí Úríndí Ãlá rĩ sĩ. 6 Ãdróŋá ũsũ Úríndí Ãlá ꞌdĩ ãma drị̃ gá Yẹ́sụ̃ Kúrísĩtõ ꞌBá ãma Palépi rĩ sĩ. 7 Ị́jọ́ ꞌdĩ sĩ, ꞌbã dó ãma ãlá ru ásị́ ị̃gbẹ̃ ĩꞌdidrị́ ãmbógó rĩ sĩ, ãꞌbã ásị́ ãma dó mụ ídri ukólépi ku rĩ nalé ĩꞌdi trũ ãlu. 8 Ị́jọ́ mâ jọlé míní ꞌdĩ kí ị́jọ́ mgbã la, álẽ íjọ ị́jọ́ ꞌdĩ kí ũkpó ru, ꞌbá ásị́ ꞌbãlépi ị́jọ́ Ãdróŋá drị̂ drị̃ gá rĩ ꞌbã adru kí mịfị́ trũ, sĩ ru ásị́ ꞌbãjó pírí ị́jọ́ múké rĩ kí idéjó. Ị́jọ́ ꞌdĩ kí múké ãzíla ụ̃rọ̃drị́ ru ꞌbá pírí ꞌbanî.

9 Ífi ãgátã galé, ãzíla ãwí ífí kóru áꞌbị́ ũlãjó, jõku ãwãŋá ãzíla ãcóŋá cojó, ãzị́táŋá ꞌbá Yãhụ́dị̃ rú ꞌdĩ ꞌbadrị̂ kí agá ku. Ị́jọ́ ꞌdĩ ꞌbã áni ꞌdĩ kí ãzị̂ kóru ãzíla kí sáwã iza. 10 ꞌBá ꞌbá kí awalépi rĩ íli bị́lẹ́ ị̃ndụ́ la pâlé ị̃rị̃, ꞌdã ꞌbã ũngúkú gá drĩ gã úmgbé, mí aꞌbe ĩꞌdi cã. 11 Lẽ ínị̃ cé ꞌbá ꞌdĩ ꞌbã áni rĩ iza kí ru ị́jọ́ ũnzí sĩ rá, ũnzĩkãnã ĩꞌbadrị́ gá rĩ la ị́jọ́ lị kí drị̃ gá nĩ.

12 Má itú ma Ãtémã ꞌi jõku Tụ̃kị́kọ̃ tị pẽlé mí rụ̂lé, kí ãzí drĩ acá mí rụ́ ꞌdâ ꞌbo, mí ụ̃ꞌbị̃ ásị́ pírí sĩ calé má rụ́ táwụ̃nị̃ Nị̃kọ̃pọ́lị̃ gâlé gbõŋáŋá ru, ãꞌdusĩku ápẽ ãngũ ị̃gbẹ́ rĩ tẽjó ꞌdãá. 13 Mí ụ̃ꞌbị̃ Zénã jájĩ rú rĩ kí ãzã kolé Ãpọ́lọ̃ be ãko pírí sĩ ãcị̃ ĩꞌbadrị̂ agá ꞌbã ĩcẽ kí ãko ãzí ĩꞌba kí lẽlé la sĩ ku. 14 ꞌBá ãmadrị̂ ꞌbã ụ̃nị̃ kí ru fẽjó pírí ị́jọ́ múké idéjó, sĩ ãko fẽjó ị́jọ́ lẽlé idélé ụ́ꞌdụ́ pírí rĩ kí ãzã kojó, ꞌbã adru kí ũvũ rú ku.

15 ꞌBá pírí má rụ́ ꞌdõlé rĩ zị kí ĩmi pírí cící ãzíla ꞌbá ãma lẽlépi ãꞌị̃táŋá ꞌdĩ agá ꞌdĩ kí ĩzị kí cící.

Lẽtáŋá uyaŋâ kóru Ãdróŋá drị̂ ꞌbã adru ĩmi abe pírí.