स्तोत्र 70
संगीत दिग्दर्शकासाठी. दावीदाची रचना. एक याचिका.
1 हे परमेश्वरा, त्वरा करून मला वाचवा;
याहवेह, मला साहाय्य करण्यासाठी त्वरेने या.
2 माझा जीव घेऊ पाहणार्‍यांना
लज्जित करा व गोंधळात पाडा;
जे सर्वजण माझे विघ्नसंतोषी आहेत
ते अप्रतिष्ठित होऊन माघारी फिरोत.
3 जे लोक मला, “अहाहा! अहाहा!” म्हणतात,
ते लज्जित होऊन माघारी फिरोत.
4 परंतु जे सर्व तुमचा शोध घेतात
ते तुमच्यामध्ये आनंद आणि हर्ष करोत;
जे तुमच्या तारणाच्या साहाय्याची अपेक्षा बाळगतात
ते सर्व नेहमी हेच म्हणोत, “परमेश्वर किती महान आहेत!”
5 परंतु मी तर गरीब आणि गरजवंत आहे;
हे परमेश्वरा, माझ्याकडे त्वरेने या.
तुम्ही माझे साहाय्यकर्ता आणि मला सोडविणारे आहात;
याहवेह, विलंब करू नका.