1 ታ ናኡንꬆ፥ ናጋራ ይ ኦꬃማይ ጋርክ ታኒ Ꮊያ ይንትስ ጻፍዛ። ዝን ኦንካ ናጋራ ኦꬅኮ ጾስ አዳይ ካንታ ኑ አፋካታይ፥ ኤካ ጽላይ፥ የሱስ ክርስቶሳ፥ የዛ። 2 ኑ ናጋራይ ክርስቶሳ ባጋር አቶ ግንትትዛ። ኤ ኑ ናጋራ ኣዳ ባዝን አላመ ኡባይ ናጋራስ ያርሽንቴዛ።

3 ኑኒ ጾስ ኪታ ናግኮ፥ ስ ባይꬅ፥ ቱማ ኑ ኤዛ ኤርዛ። 4 ኦንካ፥ «ታኒ ኤዛ ኤርዛ» ዬግታር፥ ኤ አዛዛ ናጋም እጽኮ የ አꬃይ ዎርዶ፤ ቱማትꬂ ኤዛር ባያ። 5 ዝን ኤ ቃላይስ ኑ አዛዝንትዛ ኡባይስ ጾሳይስ የዝ ሲቃይ ፎሎ ማቅዛ። ኑኒ ጾሳር የዝ የሳይስ የይ ፓስ ቱማ ማርካ። 6 ታኒ፥ «ጾሳር የዛ» ግዝ ኦንካ ክርስቶሳ የዜዛይ ጋርክ የዞዳይስ ቤዝዛ።

7 ታ ሲቆ እሹንꬆ፥ ታኒ ይንትስ ቲናፕ የዝ አዛዛ ጻፍነፕ አትን ኦሮꬅ ኪታ ጻፋሚ። የይካ ይ ስኤዝ ብኒ አዛዛ። ዋን. 13:34 8 ማቆፕ አትን፥ ክርስቶሳራኔ ይ የሳይድ ቱማ ማቂ የዝ፥ ኦሮꬅ አዛዛ ጻፍዛ። ꬉማይ ሀልእን፥ Ꮊት ቱማ ፖአይ ፖእዛ።

9 «ታ ፖኦ የዛ» ጊታር ፋ እሻ እጽዛ ኦንካ፥ Ꮊኖ ሄሎዳይስ ꬉማ የዛ። 10 ፋ እሻ ቃꬍዛ ኦንካ ፖኦ የዛ። የ አꬃይር ሀራ አስ ꬉቢዛባዝ ባያ። 11 ዝን ፋ እሻ እጽዛ ኦንካ ꬉማ የዛ፤ ꬉማር የꬍዛ። ꬉማ ኤ አፋ ቶእሴዝ ግሾስ አና Ꮊንግዛኮ ኤሮያ።

12 ታ ናኡንꬆ፥ ክርስቶሳ ሱንꬃይ ባጋር ይ ናጋራይ አቶ ግንትንቴዝ ግሾስ ታኒ ይንትስ ጻፖዳ። 13 አዱንꬆ፥ ቲናፕ የዛና፥ ይ ኤሬዝ ግሾስ ይንትስ ጻፎዳ። የላግታዮ፥ ጻላሄ ይ ጋሜዝ ግሾስ ይንትስ ጻፎዳ። 14 ናኡንꬆ፥ ጾስ ኣዳ ይ ኤሬዝ ግሾስ ይንትስ ጻፌዛ። አዱንꬆ፥ ቲናፕ የዝ ኤዛ ይ ኤሬዝ ግሾስ ይንትስ ጻፌዛ። ናኡንꬆ፥ ይ ምኖ ማቄዝ ግሾስ ጾስ ቃላይ ይንታር የዛ ግሾኔ ጻላሄና ይ ጋሜዝ ግሾስ ይንትስ ጻፌዛ።

15 አላመ ዎይ አላመ ባዝ ኡባ ዶስፓተ። አላመ ዶስዛ ኦንካ ጾስ ኣዳ ዶሶያ። 16 አላመል የዝ ኡባይ፥ አሾ አሞትꬂ፥ ኣፈስ ሎእዝ ባዝ አሞትꬅኔ ሚሸር ጬቅንትꬂ አላመባዛፕ አትን ጾሳፕ ባያ። 17 አላመኔ አሞትꬅ ኡባይ ኣꬎዳ፥ ዝን ጾስ ሸነ ፖልዛ ኦንካ መꬍናስ የሳዳ።

18 ታ ናኡንꬆ፥ ዎደ ዉርስꬃይ ኡኬዛ። ክርስቶሳ እጽዛይ ቲናፕ የኦዳና ይ ስኤዛይ ጋርክ ሀራ አቶዝን፥ Ꮊተካ ኤዛ እጽዝታይ ጋምታይ ደንዴዛ። የይ ግሾስ፥ ዎደ ዉርስꬃይ ኡኬዛያ Ꮊይር ኑኒ ኤርዛ። 19 የ ጽዝታይ ኑ ባጋ ማቀካ ግሾስ ኑ ጋንጨፕ ከዜዝ። ኡንቲ ኑ ባጋ ማቄዛኮ ኑራ ጋርዢ የዞዳ፥ ዝን ኡንታፕ ኦንካ ኑ ባጋፕ ባዛይ ኤርንቶዳይ ጋርክ ኑ ጋንጨፕ ከዜዝ።

20 ዝን ክርስቶሳ ይንታን ፋ ጌሻ አያናር ትዤዛ፤ የይ ግሾስ ይ ኡባይ ኡባ ባዝ ኤርዛ። 21 ቱማ ይ ኤርዛ ግሾኔ ቱማር አባ ዎርዶካ ባዛያ ይ ኤርዛ ግሾስ ታኒ ይንትስ ጻፍነፕ አትን ቱማ ይ ኤሮዋ ግሾስ ባያ።

22 የሱሳና፥ ጾስ ዶሬዛ ባያ ግ ካድዛ አሳይፕ ሀራ ዎርዳንቻይ ኦኖ? የይ ጋርክ አስ ክርስቶሳ ሞርከ። ናአ ካድኮ አዳካ ካድዛ። 23 ናአ ካድዛ ኦስካ አደ ባያ፤ ማ ናአይስ ማርካትዝ ኦስካ አደ የዛ።

24 የይ ግሾስ፥ ቲና ይ ስኤዝ ቃላ ይ ዎዝናይድ ሚንꬂ ናጎይታ። ቲና ስኤዝ ቃላይድ ሚንጊ የዝኮ ይንትስ ናአይራኔ አዳይራ ፐትፐተꬂ የዞዳ። 25 Ꮊይካ ክርስቶሳ ኑስ እንጌዝ ኡፋይሳይ መꬍና ደኦ።

26 ይንታን ባልꬅዛ አሳይ ግሾስ ታኒ Ꮊያ ይንትስ ጻፌዛ። 27 ክርስቶሳፕ ይ ኤኬዝ አያናይ ይ ጋንጨ የዝዛይ ግሾስ ሀራ አስታማረ ኮሾያ። ኤ ይንታን ኡባ ባዝ ታማርሶዳ አያናይ ይንታን ቱማ ታማርስነፕ አትን ዎርዶ ባያ። የይ ግሾስ ጌሻ አያናይ ይንታን ታማርሴዛይ ጋርክ ክርስቶሳር የዞይታ።

28 ይኬ፥ ታ ናኡንꬆ፥ ኤ ቆንጭዝ ዎደ ኑኒ ያሻ ባይꬅኔ ኤ ማቂ ይእዛ ጋላስ ኤ ቲና ኑ ዬላታማይ ጋርክ ኤዛር የዞይታ። 29 ክርስቶሳ ጌሽ ማቄዛና ይ ኤርኮ ጌሽ ኦሶ ኦꬅዛ ኡባይ ጾሳፕ የልንቴዛ ማቄዛና ኤሮይታ።