7
ቄሰ ማልከጻድቀ
1 ማልከጻድቄ፥ ሳሌመ ካታይ፥ ኡባፕ ኣꬅ ጾስ ቄሰ። የ ማልከጻድቀ አፍራመ ካትታና ኦሊ ጋሚ ማቆዳር ኤዛ ሄሊ አንጄዛ። መ. 14:17-20 2 አፍራመ ፋ የዛ ባዝ ኡባይፕ ኤስ አስራታ ከሲ እንጌዛ። ማልከጻድቀ ሱንꬃይ ቲና «ጽሎትꬅ ካት»፥ ናምእንꬆ፥ «ሳሌመ ካት» ብልእꬃይ፥ «ሳሮትꬅ ካት» ጉሲ። 3 ማልከጻድቀስ እንዳ ዎይ አደ ዎይ ዛረ ታይቦ ባያ። ኤ ላይꬃይስ ደንዶ ዎይ ኤ ላይꬃይስ ዉርስꬂ ባያ፥ ዝን ጾስ ናአ ኣዚ መꬍናስ ቄሰ ማቄዛ።
4 ማልከጻድቀ አብ ጋርክ ዳማዛኮ ቦኦይታ። ኑ አድታይስ ማይዛይ፥ አፍራመ፥ ፋ የዛ ባዛይፕ ኤስ አስራታ እንጌዛ። 5 ቄሰ ማቄዝ ለወ ዛራይ እስሬለ አሳይፕ፥ የይካ አፍራመ ዘረꬅ ማቄዝ ፋ እሽታይፕ አስራታ ኤኮዳይ ጋርክ ህገ ኪትዛ። ታይ. 18:21 6 ማልከጻድቀ ለወ ዛረ ማቃም እጽኮካ አፍራመፕ አስራታ ኤኬዛ፤ ኡፋይስ ቃላ የዝ አፍራመና አንጄዛ። 7 ጽቃይ ዳማይር አንጅንትዛይ ፓላምꬆያ።
8 ፐቲ ባጋር፥ አስራታ ኤክዝታይ Ꮊይቅዝ አስታ፥ ዝን ሀራ ባጋር አስራታ ኤክዛይ Ꮊይቀካ የዛ ዬጊ ኦድንቴዝ መልከጻድቀ። 9 ይኬ፥ አስራታ ኤክዝ ለወ፥ አፍራመ ባጋር አስራታ እንጌዝ ጎዳይስ ዳንዳእንትዛ። 10 አብስ ጊኮ፥ ማልከጻድቀ አፍራመር ዎል ሄሎዳር ለወ ሀጋ የልንተካ ማቅኮካ፥ ፋ ማይዛ አፍራመ ጉልባታይድ የዛ።
11 እስሬለ አሳይስ ህገ ለወ ቄሰትꬃይ ባጋር እንግቴዛ። የ ለወ ቄሰትꬃይ ፎሎ ማቄዝ ባዝ ማቄዛኮ ኣሮናሳይ ጋርክ ባዝን፥ ማልከጻድቀ ጋርክ ሀራ ቄሰ ሹሞዳይስ ኮሻምዝን። 12 ይኬ፥ ቄስታይ ላምንቶዳር ህጋይካ ማ ላምንቶዳይስ ቤዝዛ። 13 የያ ኑ ኤባዝ ኦድዛ አꬃይ ሀራ ዛረ፤ ኤ ሼሻይፕ ኦንካ ያርሾ አቆ ቄሰትꬅ ኦꬄካያ። 14 ኑ ጎዳይ ይሁዳ ሼሻይፕ የኤዛይ ኤርንቴዛያ። ሀኖ ዝን፥ ሙሰ ቄስታይ ባጋ ኦድታር ይሁዳ ኮች ባጋ አብካ ኦደካያ።
15 ማልከጻድቀ ጋርክ ሀራ ቄሰ የኤዝባዝ ማቄዛኮ Ꮊ ኑ ኦድዛባዛይ ኣꬊ ቆንጮዳ። 16 ኤ ቄሰ ማቄዛይ ꬋቦዋ ደኦ ዎልቃይራፕ አትን ኤ ማይዛ ህገራኔ ዎጋይር ባያ። 17 ጌሻ ማጻፋይ፥
«ማልከጻድቀ ቄሰትꬃይ ጋርክ፥
ኔኒ መꬍናስ ቄሰ»
ዬጊ ማርካትዛ። ማዝ. 110:4 18 ቲና ህጋይ ዳቡራኔ ማዳማ ማቄዝ ግሾስ ሻርንቴዛ። 19 ሙሰ ህጋይ አባራካ ፎሎ ማቆዳይስ ዳንዳኤካያ። ዝን ኑኒ Ꮊት ጾስኮ ሺቆዳይስ ኡባይፕ ኣꬊዝ ኡፋይስ ቃላይ ኑስ እንግንቴዛ።
20 ክርስቶሳ ቄሰ ማቄዝ ዎደ ጾሲ ጫቄዛ፥ ዝን Ꮊንክታይ ቄሰ ማቄዝ ዎደ የይ ጋርክ ጫቃይ ባያ። 21 ዝን የሱሳ ቄሰ ማቄዛይ ጾስ ጫቆራ፤
«ጎዳይ ኤኮ ‹ኔኒ መꬍና ቄሰ› ዬጊ ጫቄዛ፤ ኤ ፋ ቆፋ ላሞያ»
ዬጌዛ።ማዝ. 110:4 22 ያ ጫቃይፕ ደንዴዛይድ የሱሳ ኑስ ኡባይፕ ኣꬊዝ ቃላ ጫቃይስ ዋሰ ማቄዛ።
23 ቲና ቄስታይ ታይባይ ጋመ ዝን ቄሰትꬅ ኦꬃማይ ጋርክ Ꮊይቆ ኡንታን ካዬዛ። 24 ዝን የሱሳ መꬍናስ የዝዛ ግሾስ ኤ ቄሰትꬃይ ላምንቶያ። 25 የይ ግሾስ፥ ኤ ኡባ ዎደ ኡ ግሾስ ጉሮዳይስ መꬍናስ የዝ ግሾስ ጾስኮ ኤ ባጋር ይእዝታ ፎሎ አሾዳይስ ዳንዳእዛ።
26 ይኬ፥ ኑስ ቤዝዛ ባዝ እንግዛ፥ ጌሻይ፥ ቦሮኔ ቱና ባዛይ፥ ናጋራንችታይፐ ሻክንቴዛይኔ ሳሎፕ ኣꬊ ꬎቄዝ ቄሰ ሀላቃይ ኑስ ኮሽዛ። 27 ኤ Ꮊንኮ ቄሰ ሀላቅታይ ጋርክ ቲና ፋ ናጋራ ግሾስ ካሊ አስ ናጋራ ግሾስ ጋላስ ጋላስ ያርሾ ያርሾዳይስ ኮሾያ። ኤ ፋና ያርሼዝ ዎደ Ꮊያ ላማማይስ ፐቲ ቶኬ ዉርሲ አሼዛ ለዊ. 9:7 28 ሙሰ ህጋይ ዳቡራ አሳ ቄሰ ሀላቃ ኡዲ ሹምዛ። ዝን ህጋይፕ ጉየ የኤዝ ጫቆ ቃላይ መꬍናስ ፎሎ ማቄዝ ጾስ ናአና ሹሜዛ።