1 ቲና ጫቃይስ ጾስ ጎይኖ ዎጋይኔ ሳአ ዱንካናይ የዛ። 2 ቲና ዱንካናይ ጊጌዛ። ኤዛይድ ጾምፐ ጋድዝ ኮች፥ ጻርጴዛኔ ያርሾ ቦራ የዛ፤ የ አቃይ ጌሺ ግንትትዛ። ከስ 26:1-30፤ 25:31-40 3 ናምአንꬆ ማጋራዣይፕ ጉየ ባጋር የዝ አቃይ ኡባይፕ ኣꬎ ጌሽ አቆ ግንትንትዛ። ከስ 26:31-33 4 ኤ ጋንጨ እጻኔ ጩይሽዝ ዎርቃ ቀንደለኔ ዎርቃር ጎልንቴዝ ቃላ ጫቆ ታቦታይ የዛ። የ ጫቆ ታቦታይድ ማና የዝ ዎርቃ ጻሮ፥ አጬዝ ኣሮና ጉፋይኔ ሙሰ ህገ ጻፍንቴዝ ናምኢ ሎቼ ሹችታይ የዛ። ከስ 30:1-6፤ 25:10-16፤ 16:33፤ ታይ. 17:8-10፤ ከስ 25:16፤ ናምእ. 10:3-5 5 የ ታቦታይል አፋ ባጋር አቶትꬅ ካመ ፋ ቀፋይድ ካምዛ ቦንቾ ክሩቤልታይ የዛ። ዝን Ꮊት የ ኡባ ቆንጭሲ ኦዶዳይስ ዳንዳኦያ። ከስ 25:18-22

6 ያ ኡባይ Ꮊይ ጋርክ ጊጌዛይፕ ጉየ፥ ቄስታይ ኡባ ዎደ ፋ ኦሳ ኦꬆዳይስ ዱንካናይስ ቲና ባጋ ክፍላ ገልዛ። ታይ. 18:2-6 7 ዝን ቄሰ ሀላቃይ ኣዳ ዱንካናይስ ናምእንꬆ ክፍለ ላይꬃፕ ፐቲ ቶኬ ገልዛ። ኤ የያ ገልታር ፋ ናጋራ ግሾኔ አሳይ ኤረካ ኦꬄዝ ናጋራ ግሾስ ሱꬅ ያርሾ ኤከካ ገሎያ። ለዊ. 16:2-34 8 ቲና ዱንካናይ ኤቂ የዝን፥ ኡባፕ ጌሽ አቆ ካንግዛ ኦገ ሀጋ ዶይንተካዛ ጌሻ አያናይ የያ ኤርስዛ።

9 የይ Ꮊ ዎዳይስ ኣዝሶ፤ ጾስስ እንግንትዛ እማኔ ያርሻይ ጎይንዛ አꬃይ ካሃ ጌሾዳይስ ዳንዳኦዛና Ꮊይ ቤዝዛ። 10 የይትታይ ሙስ ባጋ፥ ኡሽ ባጋ ዱማ ዱማ ሜች ዎግታይ ኦድዝታ። ኡንቲ ኦሮጽዛ ዎደ የኦድ ሄሎዳይስ ኦስንትዛ ባለ ዎግታ ባጋ።

11 ዝን ክርስቶሳ Ꮊት ኑ ደንጌዝ ሎኦ ባዝታይስ ቄስታይ ሀላቃ ማቂ የኤዛ። ኤ ገሌዝ ዱንካናይ ዳማኔ ፎሎ ማቄዛ። የ ዱንካናይ አስ ኩሸር ኦስንተካዛኔ Ꮊ አላማይፕ መꬍንቴዛኖ። 12 ክርስቶሳ ኡባፕ ጌሽ አቆ ገልታር ዴሽ ሱꬅኔ ኦጎና ሱꬅ ኤኪ ገለካያ። ዝን መꬍና አቶትꬃ እንጎዳይስ ፋ ሱꬅ ኤኪ ላማማይስ ፐቲ ቶኬ ገሌዛ። 13 ዴሽ ሱꬅኔ ዎፋኖ ሱꬅ፥ ጹግንቴዝ ኡስ ቡዶ፥ ቱኔዝ አሳይል አፋ ꬋርጭንቲ ኡንታን ጌሽዛባዝ ማቅኮ፥ ለዊ. 16:15-16፤ ታይ. 19:9፥ 17-19 14 መꬍና አያና ባጋር ቦሮ ባ ያርሾ ኡዲ፥ ጾሳይስ ፋና እንጌዝ ክርስቶሳ ሱꬅ፥ የዛ ደኦ ጾስ ጎይኖዳይ ጋርክ Ꮊይቆ ካልꬅዛ ኦሳይፕ ኑ ካሃ ዋይዚ ኣꬂ ጌሾሳ?

15 የይ ግሾስ፥ ጼግንቴዝታይ ጾሲ እንጌዝ መꬍና ላታ ኤኮዳይ ጋርክ ክርስቶሳ ኦሮꬅ ጫቃይስ ጋንጨ ገሊ ዳቦꬅዛ ማቄዛ። የይ ሀኔዛይ አሳይ ቲና ጫቃይፕ ኦሞ የዝ ዎደ ኦꬄዝ ናጋራይፕ ኡንታን ዎዞዳይስ ኤ Ꮊይቃይዳ።

16 ይኬ፥ ኬኬ ዬዝኮ፥ የ ኬኬዝ አꬃይ Ꮊይቅꬃይ ኤርንቶዳይስ ኮሽዛ። 17 ኬኬዝ አꬃይ Ꮊይቅኮ ኤ ኬካይ ሚንግዛ። ኬኬዝ አꬃይ Ꮊይቀካ አትኮ ኤ ኬካይ ኦꬆያ።

18 ሀራ አቶዝን፥ ቲና ጫቃይካ ሱꬂ ባይꬅ ምንገካ። 19 ሙሰ ህገ አዛዝታ ኡባ አሳይስ ኦዴዛይፕ ጉየ ኦጎና ሱꬅኔ ዴሽ ሱꬂ ሃꬃር ዋላኪ፥ ዞቆ ዱር እክሰኔ ህሶጰ ኤኪ፥ ማጻፋይል አፋኔ አሳይል አፋ ዉርጼዛ። ከስ 24:6-8 20 ሙሰ አሳይኮ፥ «ይ ናጎዳይ ጋርክ ጾሲ ኪቴዝ ሱꬅ ጫቃይ Ꮊያ» ዬጌዛ። 21 የይ ጋርከካ፥ ዱንካናይዳኔ ኦꬅዛ ሚሸ ኡባይል አፋ ሱꬅ ዉርጼዛ። ለዊ. 8:15 22 ቱማካ ህጋይ ግዛይ ጋርክ ጽቃባዝታይፕ አትን ኡባ ባዝ ሱꬃር ጌዥዛ። ሱꬂ ላልንተካዝን ናጋራ ባራንችንቶያ። ለዊ. 17:11

23 ሳሎባዝ ኣዝሶ ማቄዝታይ ኡባይ መሄ ያርሾር ጌዦዳይስ ኮሽዛ። ዝን ሳሎባዝታይ ፋ ኦማስ የይፕ ኣꬊዝ ያርሾር ጌዦዳይስ ኮሽዛ።

24 ክርስቶሳ ቱማ ጾስ ኬꬃይስ ኣዝሶ ማቄዛ፥ አስ ኩሸር ኦስንቴዝ ኡባፕ ጌሽ አቆ ገለካያ። ዝን ኤ Ꮊት ኑ ግሾስ ጾስ ቲና በንቶዳይስ ሳሎ ገሌዛ። 25 ቄሰ ሀላቃይ ላይꬃ ላይꬃ ፋ ሱꬂ ባዛ ኤኪ፥ ኡባይፕ ኣꬊዝ ጌሽ አቆ ገልዛይ ጋርክ ክርስቶሳ ጋመ ቶኬ ፋና ያርሾዳይስ ማቂ ማቂ ገለካያ። 26 የይ ጋርክ ሀኔዝባዝ ማቄዛኮ፥ ክርስቶሳ አላመ መꬊንቴዛይፕ አይኪ ጋመ ቶኬ ዋይንቶዳይስ ኮሽዛ። ዝን Ꮊተ ዎደ ዉርስꬃ ናጋራ ꬋብሶዳይስ ፋና ያርሼዝ ላምሶዋ ኦገር ፐቲ ቶኬ በንቴዛ።

27 አስ ኡባይስ ፐቲ ቶኬ Ꮊይቆዳይስ የይፕ ጉየ ፕርድንቶዳይስ ቤዝዛ። 28 የይ ጋርከካ፥ ክርስቶሳ ጋመ አሳይ ናጋራ ꬋብሶዳይስ ፐቲ ቶኬ ያርሽንቴዛ። ማቅካ ኤ ናጋራ ቶኮዳይስ ባዝን ፋና ናግዝታ አሾዳይስ ናምእንꬆ ቆንጮዳ። ኢሳ. 53:12