ማርቆሳ ጻፌዝ የሱስ ክርስቶሳ ዎንግለ
ገሎ
ማርቆሳ ዎንግላይ፥ «Ꮊይ ጾስ ናአ የሱስ ክርስቶሳ ዎንግለ አይꬅ» ጊታር ደንድዛ። Ꮊ ዎንግላይድ የሱሳ ኦሶ አስኔ ማዉተር የዝ አስ ማቂ ሺቄዛ። ኤ ማዉታይ ኤ ትምርታይር፥ ኢታ አያናል አፋ የዝ ዎልቃይራኔ አሲ ኦꬄዝ ናጋራ ማሮር በንቴዛ። የሱሳ፥ «ታኒ፥ አሲ ኦꬄዝ ናጋራ አይለትꬃፕ ዋሎ ከሶዳይስኔ ታ ሸምፖ ኣꬂ እማዳይስ የኤዝ አስ ናአ» ዬጊ ፋ ዶናር ኦዴዛ።
ማርቆሳ የሱሳ ታርካ ሉሎ ኦገራኔ ዎልቃ ኩሜዝ ኦገር ኦዴዛ። ማርቆሳ ኦድዛይ የሱሳ ቃላኔ ትምርተ ኣዳ ባዝን ኦꬄዝ ማላባዝታ ባይራꬂ ኦድዛ። ማርቆሳ ጻማቅዛ ዋንሳ ታርካ፥ የሱሳ ጽንቃታኔ ኤ ፓጭንታ ሃታር ኦዲ ማቂ፥ የሱሳ ትምርታኔ ኤ ፓꬄዛና ፓድዛ። አቅ አቅ Ꮊማዳር የሱሳ ታማርታይ የሱሳና ኡሳ ኤርታር Ꮊንጌዛይ ጋርክ የሱሳ እጽዝታይካ ኡሳ እጽታር Ꮊንጌዛ። ዉርስꬅ ሸምፕታይ የሱሳ ፓꬅ የዝን ዉርስꬅ ሳምንታ ፖልንቴዝ ኦስታይ ባዝ ኦድዛ። የይትታይካ ኤ ሶጽንታኔ ኤ ደንዶ ባጋ ኦድዛ።
ማርቆሳ ዎንግላይ አይኬዝ ቆፍታ
Ꮊ ዎንግላይ አይꬅ 1:1-13
የሱሳ ጋልላ ቢታ ፋ ኦሳ አይኬዛ 1:14—9:50
የሱሳ የሩሳላመ ቢታ ኦꬄዝ ኦሶ 10:1-52
ዉርስꬅ ሳምንታ የሩሳላመ ሄራ 11:1—15:47
የሱሳ Ꮊይቆፕ ደንዶ 16:1-8
Ꮊይቆፕ ደንዴዝ ጎዳይ በንትꬅኔ ደንዲ ሳሎ ቅቶ 16:9-20
1
ጻማቅዛ ዋንሳ ሳባኮ
(ማቶ. 3:1-12፤ ሉቃ. 3:1-18፤ ዋን. 1:19-28)
1 Ꮊይ ጾስ ናአ የሱስ ክርስቶሳ ዎንግለ አይꬅ 2 ናበ ኢሳያሳ ጻፌዝ ማጻፋይ ጋንጨ ጾሳይ፥
«ዬዛኮ፥ ታኒ ታ ኪታ ናአ
ኔፕ ቲና ዳኮዳ።
ኤ ነ ኦጋ ፕጾዳ። ሚል. 3:1
3 ፐታይ ሊዦ ጋꬋር ኡኪ ኦድታር፥
‹ጎዳይስ ኦገ ፕጾይታ፤
ኤ የꬎዳይስ ጎሰ
ኤዝስ ሉልሶይታ ጌዛ»
ጊንቲ ጻፍንቴዛ። ኢሳ. 40:3
4 ጻማቅዛ ዋንሳ አሳ ጻማቅታር፥ «ይ ናጋራይፕ ማቂ ጻማቅንቶይታ፤ ጾሳይ ይ ናጋራ ይንትስ አቶ ጎዳ» ዬጊ ቃላ ኦድታር ሊዦ ጋꬋፕ የኤዛ። 5 ይሁዳ ቢታ የዝ አስ ኡቢታይኔ የሩሳላመ ካታማ አስ ኡቢታይ ዋንሳኮ ይእዛ። ፋ ናጋራ ቡጽን፥ ዋንሳ ኡንታን ዮርዳኖሳ ቦርካ ጻማቅዛ።
6 ዋንሳ ግማለ እክሰፕ ዳድንቴዝ አፍላ ማእዛ። ፋ ጼሳይድ ዳፈ ዳንጭዛ፤ ማ ቦለራኔ ደገራ ኤሳራ ሚዛ። 2ካት. 1:8 7 ዋንሳ ቃላ ኦድታር፥ «ታፕ ጉየር ሎእꬂ ሚንግዛይ ይእዛ። ሀራ አቶዝን፥ ታ ኤ ጫማ ዎዶራ ዙጊ ብሎዳይስ ቤዞያ። 8 ታ ይንታን ሃꬃር ጻማቅዛ፥ ዝን ኤ ይንታን ጌሻ አያናር ጻማቆዳ» ዬጌዛ።
የሱሳ ጻማቅንቶኔ ፓጭንቶ
(ማቶ. 3:13-17፤ 4:1-11፤ ሉቃ. 3:21-22፤ 4:1-13)
9 የሱሳ የ ዎደ ጋልላ ቢታ የዝ ናዝረተ ካታማፕ ይእን፥ ዋንሳ ዮርዳኖሳ ቦርካ ኤዛ ጻማቄዛ። 10 የሱሳ ሃꬃፕ ከዜዛን ጋርክ ሳሎ ዶይንትን፥ ጌሻ አያናይ ኤዛል አፋ ሆለ ጋርክ ዎꬋዳር በኤዛ። 11 ማካ፥ «ታ ቃꬊዛ ታ ናአይ ነና፤ ታ ኔል ኡፋይትዛ» ዬግዝ ግርꬂ ሳሎፕ የኤዛ። መ. 22:2፤ ማዝ. 2:7፤ ኢሳ. 42:1፤ ማቶ. 3:17፤ 12:18፤ ማር. 9:7፤ ሉቃ. 3:22
12 እዝር ጌሻ አያናይ የሱሳ ሊዦ ጋꬋ ካንጌዛ። 13 የሱሳ ሊዦ ጋꬋ ጻላሄር ፓጭንትታር ኦይታም ጋላስ ጋምኤዛ። ዶእታይር የዜዛ፥ ዝን ኪታንችታይ ይኢ ኤዛ ማዴዛ።
የሱሳ ሞሎ አይክዝ ኦይዲ አስታና ጼጌዛ
(ማቶ. 4:12-22፤ ሉቃ. 4:14-15፤ 5:1-11)
14 ዋንሳ አጭንቴዛይፕ ጉየ የሱሳ ጾስ ካተትꬅ ዎንግለ ኦድታር ጋልላ ቢታ Ꮊንጌዛ። 15 «ላይꬃይ ሄሌዛ፤ ጾስ ካተትꬃይ ኡኬዛ። ይ ናጋራይፕ ማቂ፥ ዎንግላ አማኖይታ» ዬጌዛ። ማቶ. 3:2
16 የሱሳ ጋልላ አባ ላንቀር ኣꬊታር፥ ሞሎ አይክዝ፥ ስሞናራኔ ኤ እሻ እንድራሰራ፥ ፋ ግተ አባል አፋ ኦልዝታ በኤዛ። 17 ኡንትኮ፥ «ታና ካሎይታ፤ ታ ይንታን አስ አይክꬅ ታማርሶዳ» ዬጌዛ። 18 ኡንትካ እዝር ፋ ግትታ ኦሊ አሺ የሱሳና ካሎ አይኬዛ።
19 እዝፕ ጽቃል ቲን Ꮊንጊ፥ ናምኢ እሽታ ዛብዶሳ ናእታ፥ ያይቆባራኔ ዋንሳራ ዎጎሎ ጋንጨ ፋ ግተ ሎእꬅዝታ በኤዛ። 20 የሱሳ ኤልሲ ኡንታን ጼጌዛ። ኡንትካ ፋ ኣዳ ዛብዶሳ፥ ኤ ኦሶ አስታይር ዎጎሎ ጋንጨ ኦሊ አሺ ኤዛ ካሊ Ꮊንጌዛ።
ቱና አያና አይኬዝ አꬃይ ፓጼዛ
(ሉቃ. 4:31-37)
21 ኡንቲ ቅፍርናሆመ ካታማ ገሌዛ። ማላ ጋላስ ሄሌዛን ጋርክ የሱሳ ኤልሲ አይሁደ ዎሳ ኬꬃ ገሊ ታማርሶ አይኬዛ። 22 ማዉተር የዝ አስ ጋርክ ታማርስዛፕ አትን ሀገ አስታማርታይ ጋርክ ታማርሶዋ ግሾስ አሳይ ኤ ትምርታ Ꮊይ ማላባዝ ጌዛ። ማቶ. 7:28
23 የ ዎደ ቱና አያና አይኬዝ ፐቲ አꬃይ አይሁድታይ ዎሳ ኬꬃ ገሊ ኡኪ፥ 24 «ናዝረተ የሱሳ፥ ኔራኔ ኑር አባ አላለ የኔ? ኑና ꬋብሶዳይስ የኤኔ? ነ ኦኖዛኮ ታ ኤርዛ፤ ነ ጾሳ ጌሻ» ዬጌዛ።
25 የሱሳ ያ ቱና አያና፥ «ሀይዞባ፥ Ꮊ አꬃይፕ ከዞባ» ዬጊ አዛዜዛ።
26 ቱና አያናይ አꬃ ዛርድዛርድ ኡዲ፥ ጽላሲ ኡኪ ኤዛፕ ከዜዝ። 27 አሳይ ኡባይ ማላባዝ ግ፥ «Ꮊይ አባ? Ꮊ አꬃይ ፋ ማዉተር ሀራ አቶዝን ቱና አያንታካ አዛዝዛ። ኡንትካ ኤስ አዛዝንትዛ፤ Ꮊይ አባ ኦሮꬅ ትምርተ?» ዬጊ፥ ፋ ጋንጨር ፐታይ ፐታይ ዎል ኦይች አይኬዛ።
28 የሱሳ ዋራይ ኤልሲ ጋልላ አዉራጃ የዝ ሄራ ኡባ ከዜዝ።
የሱሳ ጋመ ሀርጋንችታ ፓꬄዛ
(ማቶ. 8:14-17፤ ሉቃ. 4:38-41)
29 የሱሳ የ ዎደ አይሁድታይ ዎሳ ኬꬃፕ ከዚ፥ ያይቆባራ ዋንሳራ ስሞና ካራኔ እንድራሰ ካራ ገሌዛ። 30 ስሞና ማቻቲ እንዳት ኦጸ ምሻ ሀርገር ዎይኢ የዝን የሱሳ እዘ ሄልን ኤዝስ ኦዴዛ። 31 ኤ እዝኮ ሺቂ፥ እ ኩሻ አይኪ፥ እዞ ደንꬂ ኤሴዛ። ኦጸ ምሻ ሀርጋይ ኤልሲ እዞ ዳክን እዛ ኡንታን ሞኬዛ።
32 ሀርግንቴዝ አሳ ኡብታኔ ቱና አያንታይ አይኬዝ አሳ ኡባ ኦማꬅ አዋ ገሊ ለምእለምኦዳር ኤዝኮ ከኤዛ። 33 ካታማ የዝ አስ ኡባይ ይኢ ኬꬃይስ ባለ ሺቄዛ። 34 የሱሳ ዱማ ዱማ ሀርገር አይክንቴዝ ጋመ አስታ ፓꬂ፥ ጋመ ቱና አያንታ ከሴዛ። ኤ ኦኖዛኮ ቱና አያንታይ ኤሬዛ። ዝን የሱሳ ኡንታን ናሾዳ ካዬዛ።
የሱሳ ጋልላ ቢታ ታማርሴዛ
(ሉቃ. 4:42-44)
35 የሱሳ ዣባሮ ደንዲ፥ አሲ ባ አቆ ዎሶዳይስ Ꮊንጌዛ። 36 ስሞናራኔ ኤዛር የዝታይ ኤዛ ኮይታር Ꮊንጌዛ። 37 ኡንቲ ኤዛ ደንጊ፥ «አሳይ ኡቢታይ ነና ኮይዛ» ዬጌዛ።
38 የሱሳ ማ ኡንታን፥ «ሀራ አቆ ኡከ ሄርታ የꬎይታ። ታ የኤዛይ ዎንግለ ኦዶዳይስ ማቄዝ ግሾስ ኤዛይዳካ ቃላ ኦዶዳይስ ቤዝዛ» ዬጌዛ። 39 አይሁድታይ ዎሳ ኬꬅታይድ ቃላ ኦድታር፥ ቱና አያንታ ከስታር፥ ጋልላ ቢታ ኡባ ዉቴዛ። ማቶ. 4:23፤ 9:35
የሱሳ ቦርቆንቶ ሀርገር የዝ አꬃ ፓꬄዛ
(ማቶ. 8:1-4፤ ሉቃ. 5:12-17)
40 ቦርቆንቶ ሀርገ አይኬዝ ፐቲ አꬃይ የሱሳኮ ይኢ፥ ኤ ቲናይድ ጹጉኒ፥ «ነ ቃꬊኮ ታና ጌሾዳይስ ዳንዳእዛ» ዬጊ ዎሴዛ።
41 የሱሳ ኤዝስ ቃꬊንቲ፥ ፋ ኩሻ ዳኪ ኤዛ ቦቺ፥ «ታ ኮይዛ፥ ጌዦባ» ዬጌዛ። 42 እዝር ቦርቆንታይ አꬃ ዳክን አꬃይ ኤልሲ ጌዤዛ። 43 የሱሳ አꬃይኮ ሚንꬂ ናግንቶባ ግ ሞይዜዛ። 44 የሱሳ ኤዛ፥ «ነና ኤሮባ፥ Ꮊኖ ኦስካ ኦድፐ። ዝን Ꮊንጊ ነ ጋላ ቄሰ ቤዞባ። ነ Ꮊት ጌሻ ማቄዛና አሳ ኤርሶዳይስ፥ ሙሰ ኪቴዝ ያርሾ ያርሾባ» ዬጊ ኪቴዛ። ለዊ. 14:1
45 ዝን አꬃይ Ꮊንጊ፥ ሄራ ኡባይድ አስስ ኦዴዛ። የይ ግሾስ፥ የሱሳ ቆንጨር፥ ካታማ ገሎዳይስ ዳንዳኤካያ። ዝን አሲ ባ አቆ ጋጻ የዜዛ፤ ማ አሲ ኡባ አቆፕ ኤዝኮ ይእዛ።