2
የሱሳ ስላ አꬃ ፓꬄዛ
(ማቶ. 9:1-8፤ ሉቃ. 5:17-26)
1 ጽቃ ጋላሳፕ ጉየ የሱሳ ቅፍርናሆመ ማቂ፥ ካራ የዛ ግዝ ዎረ ስንቴዛ። 2 ሺቄዝ አሳ ኬꬃይ ኤካም እጽን ሀራ አቶዝን ባላይካ ኡንኦድ ጋꬆ ጋመ አስ ሺቅን፥ የሱሳ ቃላ ታማርሴዛ። 3 ኦይዲ አስታይ ፐቲ ስላ አꬃ ቶኪ ኤዝኮ ከኤዛ። 4 አሳይ ጋንጌዝ ግሾስ አꬃ የሱሳኮ ሺሾዳይስ ኡንትስ ዳንዳእንታም እጽን፥ የሱሳ የዛ ባጋይር ኬꬃ ቃሪ፥ ሲትንጋ ቃዉጺ አꬃ ኤ ዎይኤዝ አርሳትራ ሱለ ዳኪ የሱሳ ቲናይድ ዎꬄዛ። 5 የሱሳ ኡ አማና ብኢ፥ ያ ስላ አꬃ፥ «ታ ናአዮ፥ ነ ናጋራይ አቶ ግንቴዛ» ዬጌዛ።
6 ህገ አስታማርታይፕ የ አቃይድ በንቴዝ ፐቲ ፐቲ አስታይ ፋ ዎዝናይር፥ 7 «Ꮊ አꬃይ Ꮊይ ጋርክ ኢታ ባዝ ጾሳል አፋ አብስ ኦድንቴ? ጾስ ኣዳፕ አትን ሀራ ኦ ናጋራ አቶ ጎዳይስ ዳንዳኤ?» ዬጊ ቆፔዛ።
8 ኡ ፋ ዎዝናይድ የይ ጋርክ ቆፔዛና የሱሳ ኤልሲ ፋ አያናር ኤሪ፥ ኡንትኮ፥ «ይንቲ ይ ዎዝናይር አብስ Ꮊይ ጋርክ ቆፔ? 9 ስላ አꬃ፥ ‹ነ ናጋራይ አቶ ግንቴዛ› ግዛይ ሻዉክነኔ? ዎይ፥ ‹ደንዲ ኤቂ ነ አርሳ ቶኪ ቅቶባ› ግዛይ ሻዉከ? 10 ዝን ታስ፥ አስ ናአይስ፥ ሳአል አፋ የሳይ ናጋራ አቶ ጎዳይስ ዎልቃ የዛና ይ ኤሮድ ጋርክ» ዬጊ የ ስላ አꬃይኮ፥ 11 «ታ ኔኮ Ꮊት ኦድዛ፥ ደንዲ ነ አርሳ ቶኪ ነ ካራ ቅቶባ» ዬጌዛ።
12 አꬃይ ኤልꬂ ደንዲ፥ ፋ አርሳ ቶኪ አስ ኡባይ ቲና ከዜዝ። አሳይ ኡባይ ማላባዝ ግ፥ «ኑኒ Ꮊይ ጋርክ ባዝ የሻ ብኢ ኤሮያ» ዬጊ ጾሳ ጋላቴዛ።
የሱሳ ለዋና ጼጌዛ
(ማቶ. 9:9-13፤ ሉቃ. 5:27-32)
13 የሱሳ ማካ ጋልላ አባ ላንቀ Ꮊንጊ፥ ኤዝኮ የኤዝ አስ ኡብታ ታማርሴዛ። 14 ኤዛይር ኣꬎዳር፥ ኢልፎሳ ናአ ለወ ግንትንትዛይ ቃራጸ ጋችስዛ አቆ በቴዝን ብኢ፥ «ታና ካሎባ» ዬጌዛ። ለዋይ ደንዲ ኤዛ ካሌዛ።
15 የሱሳ ካꬃ ማዳይስ ለዋይ ካራ በቴዛ። ኤዛ ካልዛ አሳይ ጋመ ማቄዝ ግሾስ ቃራጸ ጋችስዛ ጋመ አሳይኔ ናጋራ ኦꬄዛ አሳይ ኤዛራኔ ኤ ታማርታይር ዎላ በቴዛ። 16 ህገ አስታማረ ማቄዝ ፐቲ ፐቲ ፈርሳወ አሳይ የሱሳ ናጋራ ኦꬄዝ አሳይራኔ ቃራጸ ጋችስዝታይር ካꬃ ማዳር ብኢ፥ «ኤ አብስ ናጋራ ኦꬄዝ አሳይራኔ ቃራጸ ጋችስዝታይር ካꬃ ሜ?» ዬጊ፥ ኤ ታማርታይር ዎል ኦይጬዛ።
17 የሱሳ ኡ ግዛና ስኢ፥ «አክመ ሀርግንትዝታይሳፕ አትን ፓꬅ አስስ ኮሾያ። ታኒ ናጋራ ኦꬄዝታ ጼጎዳይስ የኤዛፕ አትን ጽልታ ጼጎዳይስ የኤካያ» ዬጊ ኡንትስ ማሄዛ።
ጾማ ባጋ ኤሮዳይስ ሺቄዝ ኦይች
(ማቶ. 9:14-17፤ ሉቃ. 5:33-39)
18 ጻማቅዛ ዋንሳ ታማርታይኔ ፈርሳውታይ ጾምዛዝን፥ ፐቲ ፐቲ አሳይ የሱሳኮ ይኢ፥ «ዋንሳ ታማርታይኔ ፈርሳውታይ ታማርታይ ጾምዛ፥ ዝን ነ ታማርታይ አብስ ጾሞሳ?» ዬጌዛ።
19 የሱሳ ኡንትኮ፥ «ማቾ ኤክዛይ ኡንታር የዝን ላዛንꬅታይ፥ ጾሞዳይስ ዳንዳእኔ? ማቾ ኤክዝ አꬃይ ኡንታር የዝን፥ ጾሞዳይስ ዳንዳኦያ። 20 ዝን ማቾ ኤክዛ አꬃይ ኡ ካለፕ ኤክንትዛ ቃማ የኦዳ፥ ኡ ያ ጋላስ ጾሞዳ።
21 «ጭማ አፍላል አፋ ኦሮꬅ እራፈ ጋዲ ስክዛ አሲ ባያ። ጋዲ ስክኮ፥ ኦሮꬃይ ጭማ አፍላና ፐርእዛ፤ ፐርእꬃይካ ቲናሳይፕ ዳልግዛ። 22 ማ ማልአንቶ ዎይነ ጭማ ኦጎሮ ጋንጨ ቡልዝ አሲ ባያ። ቡልዝ ማቅኮ፥ የ ዎይናይ ኦጎራና ꬉስዛ፥ ፋ ኡባስካ ላልንትዛ፥ ኦጎራይካ ኢትዛ። ዝን ማልአንቶ ዎይነ ኦሮꬅ ኦጎሮ ጋንጨ ቡልንትዛ» ዬጌዛ።
ማላ ኤሮዳይስ ሺቄዝ ኦይች
(ማቶ. 12:1-8፤ ሉቃ. 6:1-5)
23 የሱሳ ፐቲ ማላ ጋላስ ባንጋ ጋደ ጋንጨር ኣꬎዳር፥ ኤ ታማርታይ ኤዛር ዎላ Ꮊንግታር ባንጋ ትዣ ምርኪ ሙስ አይኬዛ። 24 ፈርሳወ አሳይ የሱሳኮ፥ «የዝን፥ ነ ታማርታይ ማላ ጋላስ ዎጋ ባባዝ አብስ ኦꬄ?» ዬጌዛ።
25 የሱሳ ኡንትኮ፥ «ዳዉተ ናይንቲ፥ ሚዝ ባዝ ኮዤዝ ዎደ ፓር የዝታይር ኦꬄዛና ይ ናባበካሳ?1ሳም. 21:1-6 26 አብያታራ ቄሰ ሀላቃ ማቂ የዛ ዎደ ዳዉተ ጾሳ ኬꬃ ገሊ፥ ቄስታይ ኣዳ ማዳይስ በዝዛፕ አትን ኦንካ ማዳይስ ዎጋ ባባዝ ጎዳይ ቲና ጋዴዝ ያርሾ ሶሎ ሜዛ፥ ፓር የዝታይስካ እንጌዛ» ዬጌዛ። ለዊ. 24:9
27 ማካ የሱሳ ኡንትኮ፥ «ማላይ አስስ መꬍንቴዛፕ አትን አሲ ማላስ መꬍንተካያ። 28 የይ ግሾስ፥ አስ ናአይ፥ ሀራ አቶዝን ማላስካ ጎዳ» ዬጌዛ።